Bamo babaghile ukulalusya ukuti, “Nongwa Yafiki tuli nu bumi?” pamo “Ngimba ubumi bwangu bwakulondiwa?” Ibaibolo likunangisya ukuti tuli nu bumi ukuti tuye pabumanyani na Kyala. Keta ifundo simo isi Ibaibolo likumanyisya.

•   Kyala yo Mpeli witu. Ibaibolo likuti: ‘Kyala yo yuyo atupelile, kangi uswe tuli bake.’​—Salimo 100:3; Ubusetuli 4:11.

•   Kyala ali nubwighane pakupela fyosa ifi apelile, ukongelelapo uswe.​—Yesaya 45:18.

•   Kyala atupelile nubwighane bwakuti twiputeghe. Yonongwa yake tukulonda ukumanya ikifukwa iki atupelile. (Matai 5:3) Umwene ikulonda ukuti tumanye inongwa iyi tuli nu bumi.​—Salimo 145:16.

•   Tukwikutisya injala yitu ya mwa mbepo linga tuli pabumanyani na Kyala. Nalinga bamo babaghile ukuketa ukuti bakabaghila ukuya pabumanyani na Kyala, Ibabolo likutukasya ukuti: “Amusegheleleghe kwa Kyala, po yope isakuseghelelagha ku myinu.”​—Yakobu 4:8; 2:23.

•   Ukuti tuye pabumanyani na Kyala, tukulondiwa ukubomba ukufwana na isi ikulonda. Pilemba lya Undumbilili 12:13, Ibaibolo likuti: “Umwimikeghe Kyala, usikongeghe indaghilo syake, namanga yonongwa iyi Kyala alimpelile umundu

•   Mu nkyeni, Kyala isakubapa abamanyani bake ubumi bwa bwila na bwila ubusita ndamyo. Isakubomba isi panongwa yakuti ubu bo bwali bwighane bwake pakabalilo aka apelagha abandu.​—Salimo 37:10, 11.