Kyala akabaghila ukunhobokela umundu uyu ikubombela matingo ifindu ifibibi kangi atikulonda ukuchenja. Ngimba ifi fibaghile ukubombiwa bulebule?

 Kyala abaghile ukunhobokela umundu uyu alapile nukuleka ifi abombagha. Abaghile ukunhobokela linga ali nulwitiko mwa Yesu Kristu. (Imbombo sya Batumiwa 3:​19, 20) Loli utubalilo tumo umundu abaghile ukwanda ukubomba imbibi, ukwisibila nasyo mpaka ukufika pakuti akabaghila ukuchenja. Ibaibolo likunjoba umundu bo uyu ukuti “wandumbula imbibi” kangi “ayipelile ngafu nubusyobi bwa butulanongwa.” (Bahiburi 3:​12, 13) Indumbula ya mundu bo uyu yikufwana ni ndeko iyi yiniongele bo yikokyiwa mumvunu iyi yikabaghila ukugholosiwa. (Yesaya 45:9) Umundu bo uyu akabaghila ukuhobokeliwa, panongwa yakuti abombile ubutulanongwa ubu Kyala akabaghila ukunhobokela.​—Bahiburi 10:26, 27.

 Abakulumba ba kipanga kya Chiyuda bamo nkabalilo ka Yesu babombagha ubutulanongwa bo ubu. Basimenye naloli ukuti mbepo wa Kyala antulagha Yesu pakubomba ifindu ifyakukindanakindana. Nalinga basimenye, loli bayobagha ukuti Yesu atuliwagha na Setano Mohesi.​—Marko 3:​22, 28-​30.

Ubutulanongwa ubu Kyala abaghile ukunhobokela umundu

•  Ukuntuka Kyala kisita kumanya. Pabwandilo, untumiwa Pauli ali mundu uyu anyozagha Kyala, loli bo achenjile ayobile ukuti: “Kyala ali nikisa kumyangu namanga nabombelagha mbusita kumanya na mbusita lwitiko.”​—1 Timoti 1:​13.

•  Ubulowe. Ibaibolo likuyoba isya bandu bamo aba pabwandilo babombagha ubulowe. Loli bo balekile akayilo kabo, Kyala abahobokile.​—1 Bakorinti 6:​9-​11.

“Ngimba une mbombile ubutulanongwa ubu Kyala akabaghila ukunhobokela?”

 Linga ikitima kikubakola bo mukwinong’onelapo pa butulanongwa ubu mwabombile pabwandilo kangi mukulonda ukuchenja, kokuti mukabombile ubutulanongwa ubu Kyala akabaghile ukubahobokela. Kyala abaghile ukuhobokela ubutulanongwa nalinga umundu ikonanga kabilikabili. Abaghile ukunhobokela umundu linga ikuketa ukuti indumbula yake nnunu itolo.​—Isya Mbupingamu 24:16.

 Abandu bamo bikuketa ukuti babombile ubutulanongwa ubu Kyala akabaghila ukubahobokela linga bikwiyipa inongwa pa butulanongwa bwabo. Loli Ibaibolo likutumanyisya ukuti tungayisubilagha indumbula yitu. (Yeremiya 17:9) Kyala akatupa amaka ukuti tubalongeleghe abangi pamo twibene. (Baroma 14:​4, 12) Kyala abaghile ukutuhobokela nalinga indumbula yitu yikutulonga.​—1 Yohani 3:​19, 20.

Ngimba Yudasi Isikarioti abombile ubutulanongwa ubu Kyala akabaghile ukunhobokela?

 Ena. Ali nindumbula imbibi iyi yalimpangisye ukuti ahiyeghe indalama isi abandu babikagha ukuti situleghe pa findu ifikemo. Akabalilo kamo ayobile isyabutungulu ukuti ikubapelela ikisa abalondo loli alondagha ukuhiya indalama nyingi. (Yohani 12:​4-8) Bo indumbula ya Yuda yifikile pabubibi fiyo, alimulisye Yesu ni ndalama sya siliva 30. Yesu asimenye ukuti Yuda akabaghile ukulapa nu kuchenja pa isi abombagha yonongwa alinkolile ukuti “nnya lonangiko.” (Yohani 17:12) Isi sikunangisya ukuti Yuda akaya nulusubilo lwa kwisa kusyuka.​—Marko 14:21.

 Yuda akanangisye ukuti alapile ukufuma pasi pandumbula. Akalapile kwa Kyala, loli alapile ku balongosi ba kipanga aba apangene nabo isya kumulisya Yesu.​—Matai 27:​3-5; 2 Bakorinti 7:​10.