Ngimba Mbaghile Ukubomba Isyafiki Ukuti Umundu Aleke Ukumbombela Ifya Bukonyofu?

IGHULA

Isi Ibaibolo Likuyoba

Keta ifundo sya mu Baibolo isi :

Mwinong’oneleghe itolo isya mbombo. Mwangaleghe kanunu kangi mubaghindikeghe aba mukubomba nabo imbombo. Linga mukwangala nabo mungabombagha bo nanumwe mukubalonda.—Matai 10:16; Bakolosi 4:6.
Mufwaleghe kanunu. Linga mukufwala ububibi, abandu babaghile ukuketa ukuti mukwifumusya. Ibaibolo likuti mufwaleghe mwa “soni nulwiyufyo.”—1 Timoti 2:9.
Musaleghe kanunu abamanyani. Linga mwighanile ukwangala na bandu aba bighanile ifya bukonyofu kokuti mukubapa ulusako lwakuti babingile.—Isya Mbupingamu 13:20.
Mungamulagha amasyu amakonyofu. Linga abinako bandile ukuyoba “imbelakinyanyasi, amasyu amakonyofu pamo isunga imbosya mino.” usokengepo—Baefesi 5:4,.
Mwepukeghe ku findu ifi fibaghile ukubabika mundamyo. Mwakifwanikisyo, mukaneghe linga yumo ikuti musyalikile panyuma pakabalilo kakukotokela pa fifukwa ifisita kupilikiwa.—Isya Mbupingamu 22:3.
Mukaneghe namaka. Linga umundu ikulonda ukukubombela ifya bukonyofu, umbule ukuti ndikulonda ifyabukonyofu. (1 Bakorinti 14:9) Mwakifwanikisyo, mubaghile ukuyoba ukuti: “Ifya bukonyofu une ndikulya kangi fikumbilusya kummilo, kangi fikunsobesya ulutengano. Ukufuma umwisyughu ulekele papapa ukumbula ifya bukonyofu.” Mubaghile ukundembela kalata ukumbula ukuti ifi ikubomba, fikubakalalisya. Umulinganie ukuti mukukana utuyilo utubibi panongwa ya ifi mukumanyila mu Baibolo.—1 Batesalonike 4:3-5.
Mubabuleghe abangi ukuti babatule. Linga umundu uyu ikukindilila ukubatamya, mumbule umundu uyu munsubile ukuti abatule. Mubaghile ukumbula uwa mumbumba yinu pamo umwininu wa kumbombo pamo umundu uyu ikutula abandu aba bali nindamyo bo iyi mwaghene nayo. (Isya Mbupingamu 27:9) Abandu bingi aba bikwaghana nindamyo iyi, batuliwe ukwendela ndwiputo. Nalinga mukiputamo siku kwa Kyala, mungakayikilagha ukuti mubaghile ukwambilila ubutuli ukufuma kwa Yehova uyu yo “Kyala umwene lusubisyo losa.”—2 Bakorinti 1:3.