Mubaghile ukumumanya Kyala linga mukumanyila nu kubikapo indumbula pakubomba ifindu ifi fikunhobosya umwene. Linga mubombile isi, “Kyala ikuya pakuseghelela kumyinu.” (Yakobu 4:8) Kangi Ibaibolo likutusimikisyila ukuti “umwene akaya pabutali pali yumoyumo mmyitu.”—Imbombo sya Batumiwa 17:27.

•  Isi mubaghile ukubomba ukuti mummanye kanunu Kyala

•  Ubutungulu ubu abandu bikuyoba pa nkhani yakumummanya kanunu Kyala

 Mubelengeghe Ibaibolo

•  Ibaibolo likuti: ‘Buno ghosa Amalemba agha Mbepo wa Kyala aghatuyile.’—2 Timoti 3:16.

•  Isi sikusanusya ukuti: Kyala yo mwenenalyo Ibaibolo. Umwene abikile aminong’ono ghake mu bandu aba balembile Ibaibolo. Ukwendela mu buku lya padela ili, Kyala ikutubula ifindu ifinunu ifi ikutulondela. Ikutubula kangi utuyilo twa padela utu ali nato, bo ulughano, ubugholofu ni kisa.—Ukusoka 34:6; Ukukumbusya Indaghilo 32:4.

•  Isi mukulondiwa ukubomba: Mubelengeghe Ibaibolo isiku lililyosa. (Yoswa 1:8) Mwinong’onelengepo pa isi mukubelenga nu kwilalusya ukuti: ‘Ngimba inkhani iyi yikummanyisya isyafiki pakuyoba isya Kyala?’—Salimo 77:12.

   Mwakifwanikisyo, belenga Yeremiya 29:11, kangi mwilalusye ukuti: ‘Ngimba Kyala ikundondela ifiki, inunu pamo imbibi? Ngimba yo Kyala wankhaza, pamo ikundondela ifindu ifinunu nkyeni?’

 Muketeghe ikipeliwa

•  Ibaibolo likuti: “Akayilo ka [Kyala] aka katikuboneka, . . . kabonekile pabwelu ntundu utu apelile.”—Baroma 1:20.

•  Isi sikusanusya ukuti: Ifindu ifi Kyala apelile fikufumbula utuyilo twake. Bo muno fikuyila linga umundu apangile ikindu kimo, ikindu ikyo kikufumbula fingi ifya mundu uyo apangile. Mwakufwana itolo, muno ubongo bwa mundu buyilile namuno bukubombela imbombo, sikufumbula ukuti Kyala wamahala. Isi sikubombiwa ukuti isuba lileke ukokya fiyo kangi muno indondwa sikubombela imbombo, sikunangisya ukuti wamaka fiyo.—Salimo 104:24; Yesaya 40:26.

•  Isi mukulondiwa ukubomba: Muye na kabalilo akakuti muketeghe ikipeliwa nu kumanyilako ku kipeliwa iki. Linga mukubomba isi, mwilalusyeghe ukuti, ‘Ngimba ifindu fyakuswighisya ifi nguketa nkipeliwa, fikufumbula isyafiki isya Kyala?’ a Ubwanaloli bo bwakuti, ikipeliwa kikabaghila ukutubula syosa isyakufwana na Kyala witu. Yonongwa yake Kyala atupele Ibaibolo.

 Mubombeleghe ingamu ya Kyala

•  Ibaibolo likuti: “Nisakumpokagha papo ayimenye ingamu yangu. Apa linga ikwiputa kumyangu nisakumpilikagha.”—Salimo 91:14, 15.

•  Isi sikusanusya ukuti: Kyala uyu ingamu yo Yehova, ikubapilikisya bosa aba bayimenye ingamu yake kangi bikuyibombela imbombo kanunu. b (Salimo 83:18; Malaki 3:16) Kyala ikulonda ukuti tumummanye yonongwa yake ikutubula ingamu yake. Umwene ikuti, “Yo une Yehova. Iyi yo ngamu yangu.”—Yesaya 42:8 NWT.

•  Isi mukulondiwa ukubomba: Muyobeghe ingamu ya Yehova linga mukulonda ukuyoba nawe.

 Muyobeghe na Yehova ndwiputo

•  Ibaibolo likuti: “Yehova ali pipi itolo kuli bosa aba binkunsuma.”—Salimo 145:18.

•  Isi sikusanusya ukuti: Yehova ikuseghelela ku aba bikwiputa kumyake nulwitiko. Ulwiputo lope kighaba kya kwiputa, kangi linga tukubomba isi tukunangisya ukuti tukungindika Kyala.

•  Isi mukulondiwa ukubomba: Mwiputeghe akabalilo kosa kwa Yehova. (1 Batesalonike 5:17) Mbula isi mukwiyaya nasyo kangi muno mukwipilikila.—Salimo 62:8. c

 Muyeghe nulwitiko mwa Kyala

•  Ibaibolo likuti: “Nayumo akamanya ukunkyela Kyala linga akaya nulwitiko.”—Bahiburi 11:6.

•  Isi sikusanusya ukuti: Ukuti tuseghelele kwa Kyala, tukulondiwa ukuya nulwitiko mwa Kyala. Mu Baibolo, ukuya nulwitiko sikusanusya nyingi m’malo mwa kusubila itolo ukuti Kyala aliko. Sikusanusya kangi ukunsubila nindumbula yosa, ukusubila ukuti syosa isi afingile sikwisa kufwanisiwa kangi ifundo syake syosa syakutula. Ukuti tuye pabumanyani nu mundu, tukulondiwa ukunsubila tasi.

•  Isi mukulondiwa ukubomba: Ukuti tuye nulwitiko lwa naloli, tukulondiwa ukughamanya kanunu Amalemba. (Baroma 10:17) Mukulondiwa ukumanyila Ibaibolo nu kulipilikisya ukuti munsubileghe fiyo Kyala nu bulongosi bwake. Abaketi ba Yehova babaghile ukuhoboka fiyo ukuti bamanyileghe nanumwe Ibaibolo. d

 Mubombeghe ifindu ifi fikunhobosya Kyala

•  Ibaibolo likuti: “Namanga ukungana Kyala, ko uku linga tusikongile indaghilo syake.”—1 Yohani 5:3.

•  Isi sikusanusya ukuti: Yehova ali pabupipi na aba banganile kangi aba bikughelaghela ukubomba kilikyosa ukuti bapilikileghe indaghilo syake.

•  Isi mukulondiwa ukubomba: Linga mukumanyila Ibaibolo, muketeghe ifindu ifi Kyala afighanile na ifi afibengile. Mwilalusye ukuti, ‘Ngimba findu fiki ifi ngulondiwa ukuchenja ukuti nunhobosyeghe Umpeli wangu?’—1 Batesalonike 4:1.

 Mukongeghe ubulongosi bwa Kyala ukuti mukete muno ikubapasikisya

•  Ibaibolo likuti: “Oko mungele Kyala, mukete muno buyilile ubununu bwake.”—Salimo 34:8.

•  Isi sikusanusya ukuti: Kyala ikubasuma ukuti mukete mwibene muno ayilile ubununu. Linga muketile muno abaghanile kangi muno ikubatulila, numwe mukuya pakulonda ukuya nawe pabumanyani.

•  Isi mukulondiwa ukubomba: Linga mukubelenga Ibaibolo, mukongeghe ubulungosi bwa Kyala kangi mukuya pakuketa muno ifindu fikuya pakwendela kanunu pa bumi bwinu. (Yesaya 48:17, 18) Kangi muketeghe ififwanikisyo fya bandu aba Kyala abatulile ukuti batole indamyo isi balyaghene nasyo, muno ubumi bwabo nu bwa ba mumbumba yabo bwachenjile namuno pabumalilo balwaghile ulusekelo. e

 Ubutungulu: Tukabaghila ukum’manya Kyala panongwa yakuti tukabaghila ukumpilikisya.

 Ubwanaloli: Ifindu fimo ifyakufwana na Kyala fyakutamya ukupilikisya, mwakifwanikisyo umwene atikuboneka panongwa yakuti yo mbepo. Loli tubaghile ukummanya Kyala. Ibaibolo likuti tukulondiwa ukummanya kanunu Kyala ukuti tusabwaghe ubumi bwa bwila na bwila. (Yohani 17:3) Mu Baibolo muli amasyu agha ghabaghile ukututula ukupilikisya isyakufwana nu Mpeli witu, utuyilo twake, ifindu ifi ikulonda ukubabombela abandu, ni kisu kyapasi kangi nindaghilo syake. (Yesaya 45:18, 19); 1 Timoti 2:4) Ukufwana namuno tuyobile pabwandilo bwa nkhani iyi, Ibaibolo likufumbula kangi ingamu ya Kyala. (Salimo 83:18 NWT) Polelo tubaghile ukummanya Kyala nu kuseghelela kumyake.—Yakobu 4:8.