Ibaibolo likuti tubapengeko abinitu ukufumila pasi pandumbula kangi pafifukwa ifinunu. Likuti uyu ikupa nindumbula yosa kangi uyu ikwambilila, bosa bikuya balusekelo. (Isya Mbupingamu 11:25; Luka 6:38) Yesu atile: “Nukupa nukwambilila, kusayiwa ku kupa.”—Imbombo sya Batumiwa 20:35.

•  Ukupa uku Kyala ikuhoboka nako

•  Ukupa uku Kyala atikuhoboka nako

•  Amavesi gha mu Baibolo agha ghikuyoba isya kupa

 Kyala ikuhoboka linga tukubapa abangi ifindu ukufuma pasi pandumbula yitu. Ibaibolo likuti: “Aliwesa apeghe bo muno inong’onile mundumbula yake, angapelagha nkwilamwa pamo nkufimbilisiwa, namanga Kyala anganile yuyo ikupela mbusangalufu.”—2 Bakorinti 9:7

 Ukupa ukufuma pasi pandumbula kighaba kya “kwiputa” uku Kyala ikuhoboka nako. (Yakobu 1:27) Yehova ikuhoboka fiyo linga umundu ikubatula nindumbula yosa aba bikutamiwa, kangi ikuketa ukuti tukumpa umwene (Isya Mbupingamu 19:17) Kangi Ibaibolo likuyoba ukuti Kyala isakutughomolela isi tukumpa.—Luka 14:12-14.

 Linga umundu ikupa naminong’ono amabibi. Mwakifwanikisyo, linga:

•   Ikulonda itolo ukwinangisya.—Matai 6:2.

•   Ikulonda ukuti yope basamupe akabalilo kamo.—Luka 14:12-14.

•   Ikulonda ukuti asapokiwe itolo.—Salimo 49:6, 7.

 Linga mukutula pa findu ifi Kyala afibengile. Mwakifwankisyo, kukaya kununu ukumpa umundu indalama ukuti akakomeghe injuga pamo ukuti akulile unkota wakusyutisya ubongo pamo ubwalwa. (1 Bakorinti 6:9, 10; 2 Bakorinti 7:1) Kangi kukaya kununu ukumpa indalama umundu umolo uyu ikukana ukubomba imbombo.—2 Batesalonike 3:10.

 Linga umundu ikutoliwa ukuyipasikisya imbumba yake loli ikubatula abangi. Ibaibolo likuyoba ukuti abanyambala aba beghile bikulondiwa ukuyipasikisya imbumba yabo. (1 Timoti 5:8) Kukaya kununu ukuti unnyambala abapeghe fiyo abandu abangi loli ikutoliwa ukuyipasikisya imbumba yake. Yesu abasusisye aba batoliwagha ukubapasikisya abapapi babo abakangale nu kuyoba ukuti ikyuma kyabo kyali “ka bupe kwa Kyala.”—Marko 7:9-13.