Tukutila inifwa panongwa yakuti yo ndughu witu kangi tukughelaghela ukubomba kilikyosa iki kibaghile ukututula ukufighilila ubumi bwitu. (1 Bakorinti 15:26) Loli abandu bingi bikutila inifwa panongwa yakuti bikusubila ifindu ifya butungulu pamo ifya mbepo inyali, kangi isi sikubapangisya ukuti “baye batumwa mbumi bwabo bosa.” (Bahiburi 2:​15) Yonongwa yake linga umundu abumenye ubwanaloli pa nkhani iyi atikuyitila inifwa, kangi isi sikuya pakumpangisya ukuti ahobokeghe nu bumi.​—Yohani 8:​32.

Ubwanaloli pakuyoba isya nifwa

•   Abafwe bakamanya nasimo. (Salimo 146:4) Tutikulondiwa ukutila ukuti linga tufwile tukuya pakutamiwa panongwa yakuti Ibaibolo likufwanikisya inifwa nu tulo.​—Salimo 13:3; Yohani 11:11-​14.

•   Abafwe bakabaghila ukutufulasya. Aba bali balughu bitu bo bakali ukufwa, linga bafwile bakabaghila ukutufulasya. (Isya Mbupingamu 21:16) Ibaibolo likuti “ulughano lwabo, ulubengo lwabo palikimo nisyakwiyaya syabo fyosa fyafwile palikimo nabo.”​—Undumbilili 9:6.

•   Ubufwe bo bukaya bumalilo bwa fyosa. Panongwa yakuti ukusyuka kwisa kuyako, Kyala isakubapa kangi ubumi bosa aba bafwile.​—Yohani 5:​28, 29; Imbombo sya Batumiwa 24:15.

•   Kyala ikuyoba ukuti akabalilo kakwisa apa “ubufwe butisakuyangako kangi.” (Ubusetuli 21:4) Pakuyoba isya isiku ilyo, Ibaibolo likuti: “Abagholofu bo bisakukikabagha ikisu kangi bisa kwitughalagha mumo bwila na bwila,” yonongwa tukulondiwa ukuleka ukutila ubufwe.​—Salimo 37:29.