Ibaibolo likunangisya ukuti kwakulondiwa ukuti umundu ighaneghe mwene, loli kuli numpaka. Ukwighana wimwene kukongelelapo ukwimoghesya, ukwighindika kangi ukwiketa ukuya wakulondiwa. (Matai 10:31) Ibaibolo likuyoba kangi ukuti umundu ikulondiwa ukuya nu mpaka pa nkhani yakwinong’onela ifyakulonda fyake panongwa yakuti abaghile ukwanda ukwibona.

Ngimba uwakwanda uyu tukulondiwa ukungana yonani?

1.   Ukungana Kyala ko kukulondiwa ukuya pakwanda pa bumi bwitu. Ibaibolo likutumanyisya ukuti ululaghilo ulunywamu lo ulu: “Unganeghe Yehova Kyala wako nindumbula yako yosa.”—Marko 12:28-30; Ukukumbusya Indaghilo 6:5.

2.   Ululaghilo ulukulumba ulwabubili lo ulu: “Unganeghe unnino bo apo wighanile wimwene.”—Marko 12:31; Abanyalevi 19:18.

3.   Nalinga Ibaibolo likayobapo isya kwighana wimwene, loli ululaghilo ulwakuti “unganeghe unnino bo apo wighanile wimwene” lukunangisya ukuti umundu abaghile ukwighana mwene kisita ukukinda umpaka.

Ngimba Yesu alinganile fiyo nani?

 Yesu akindanisyagha ulughano lwake kwa Yehova, kubanine kangi namuno ighanilagha mwene kangi ababulile abafundiwa wake ukuti syo bope babombeghe.—Yohani 13:34, 35.

1.   Umwene alinganile Yehova kyakwanda kangi aliyipile fiyo ukuti amalisye imbombo yake. Umwene ayobile ukuti “Kokuti ikisu kimanyeghe ukuti une nunganile Tata,” “nukuti nikubomba bo muno andaghilile Tata.”—Yohani 14:31.

2.   Yesu abaghanile abandu, anangisye ukuti abaghanile mwakubapako ifyakulondiwa pa bumi bwabo kangi nukufwa panongwa yabo.—Matai 20:28.

3.   Yesu anangisye ukuti ighanagha mwene mwakuya nakabalilo kakutusya, ukulya, nukwangala nabafundiwa bake na bangi aba bamukongagha.—Marko 6:31, 32; Luka 5:29; Yohani 2:1, 2; 12:2.

Ngimba umundu uyu abaghanile abinake ukukinda mwene atikuya wa luhobofu kangi atikughindikiwa?

 Hayi, panongwa yakuti tupeliwe nkifwani kya Kyala uyu akayilo kake akanywamu lo lughano. (Ubwandilo 1:27; 1 Yohani 4:8) Isi sikunangisya ukuti tupeliwe ukuti tunangisyeghe ulughano ku bangi. Ukwighana twibene kope kwakulondiwa kangi kuli na kabalilo kake. Loli tukuya bahobofu linga tumughanile Kyala kangi nukwiyipa ukubabombela abangi ifinunu. Mwakufwana namuno Ibaibolo likuyobela ukuti, “ukupa nukwambilila kusayiwa kukupa.”—Imbombo sya Batumiwa 20:35.

 Amasiku agha abandu bingi bikuyoba ukuti ubuhobofu bukwisa linga umundu atalile ukwighana mwene. Kwa bene, “ukubaghana abinabo” kukwingila mmalo mwa “ukwighana wimwene.” Loli, ifyakubombiwa fingi lino fikunangisya ukuti umundu ikuya walusekelo kangi atikubinabina linga ikukonga ifundo iya mu Baibolo iyakuti: “Umundu wesa angasilondagha si syake,loli si sya yungi.”—1 Bakorinti 10:24.