Ena. Ibaibolo libaghile ukututula ukuti tubombe ifindu mwa mahala ukuti tuleke ukwiyipa inongwa. (Salimo 32:1-5) Linga tumonangile Kyala kangi tukwipilika naloli ukuti tusobile, umwene ikuya pakutuhobokela nu kututula ukuti twande kangi ukwipilika kanunu. (Salimo 86:5) Ibaibolo likunangisya ukuti utubalilo tumo kununu ukwiyipa inongwa papo kubaghile ukututula ukuti tusaleke ukutula kangi inongwa nkyeni. (Salimo 51:17; Isya Mbupingamu 14:9) Loli Ibaibolo likutusoka ukuti tungiyipagha fiyo inongwa ukukinda umpaka, bo ukwinong’ona ukuti tukaya nu lusubilo ulununu ulwa nkyeni pamo tukaya bakulondiwa pamaso pa Kyala. Ukwiketa munjila imbibi bo iyi, kubaghile ukutupangisya ukuti “tumiliweghe nubusulumanie bwitu ubu bukindilile.”—2 Bakorinti 2:7.

•  Ngimba findu fiki fikubapangisya abandu ukuti biyipeghe inongwa?

•  Ngimba mbaghile ukubomba isyafiki ukuti ndeke ukwiyipa inongwa?

•  Amavesi gha mu Baibolo pa nkhani ya kwiyipa inongwa nu kuhobokela

 Filipo ififukwa fingi ifi fibaghile ukutupangisya ukuti twiyipeghe inongwa. Tubaghile ukwanda ukwiyipa inongwa ukuti tumonangile umundu yumo uyu tunganile pamo ukuti tutoliwe ukukonga ulubatiko lumo ulu twalondiwagha ukulukonga. Utubalilo tumo, tubaghile ukwiyipa inongwa napapo tukatulapo inongwa. Mwakifwanikisyo, linga twibikile ifundo ingafu fiyo isyakuti tukongeghe, tubaghile ukwanda ukwiyipa inongwa utubalilo tosa linga tutoliwe ukusifwanisya. Yonongwa yake Ibaibolo likutukasya ukuti tungaghulilagha ukubomba ifindu ifi tukabaghila ukufwanisya.—Undumbilili 7:16.

 M’malo mwakuwa amaka panongwa ya kwiyipa inongwa, mubombeghe isi mubaghile ukufwanisya ukuti mutendekesye ifindu ifi fyonangike. Bulebule?

•   Mwitikisyeghe ukuti fibombiwe. Ndwiputo, munsumeghe Yehova a ukuti abahobokele. (Salimo 38:18; Luka 11:4) Musubileghe ukuti Kyala ikuya pakupilika inyiputo syinu linga mulapile kangi mukwipilika naloli ukuti musobile nu kwiyula fiyo ukuti muleke ukwandisya kangi ukubomba ifi mwabombile. (2 Syambukulu 33:13; Salimo 34:18) Umwene ikunketa umundu wa nkati uyu nayumo umundu abaghile ukumbona. Linga Kyala ikuketa ukuti tusilekile imbibi isi twabombile, “umwene nsubiliwa itolo kangi ngolofu, po ikutuswa ubutulanongwa bwitu bosa.”—1 Yohani 1:9; Isya Mbupingamu 28:13.

   Syabwanaloli ukuti linga mumonangile umundu yumo, lumo mubaghile ukwitikisya ukuti musobile nu kwakunsuma ukuti abahobokele. Lumo kukabaghila ukuya kupepe ukubomba bo isi. Loli ukusuma uluhobokelo ukufuma pasi pandumbula kuli nu bununu bubili ubu: Kukutula ukuti mutule katundu unsito nu kughomolelapo ulutengano.—Matai 3:8; 5:23, 24.

•   Amwinong’oneleghe amalemba agha ghikuyoba isya kisa kya Kyala. Mwakifwanikisyo, inong’onela ilemba lya 1 Yohani 3:19, 20. Ibaibolo likuyoba kisitakufisa ukuti “indumbula syitu sikutuyoba ububibi” ko kuti utubalilo tumo tubaghile ukwilonga ukukinda umpaka lumo nu kwanda ukuketa ukuti Kyala akabaghila ukutughana kangi. Loli ivesi ili likuyoba kangi ukuti “Kyala yo nkulumba ukusikinda indumbula syitu.” Nongwa yafiki sili bo ulu? Atumenye fiyo muno tuyilile kangi ikumanya muno tukwipilikila na isi tukutoliwa ukufwanisya. Asimenye kangi ukuti tukaya bagholofu kangi tubaghile ukusowa. b (Salimo 51:5) Panongwa iyi, atikubakana aba bikwitikisya naloli ubusobi bwabo.—Salimo 32:5.

•   Koma ukukindilila ukwinong’onela imbibi syinu isya iyolo. Ibaibolo lili ni nkhani nyingi isya banyambala na bakikulu aba babombile ifindu ifibibi loli panyuma pake bachenjile utuyilo twabo. Ikifwanikisyo kimo yo Sauli uwa ku Tarisi, uyu panyuma pake alisile kumanyiwa ukuya ntumiwa Pauli. Pakabalilo aka ali Mfarisai, abanyozagha fiyo abandu aba bankongagha Yesu. (Imbombo sya Batumiwa 8:3; 9:1, 2, 11) Loli bo amanyile ukuti isi abombagha ampingagha yo Kyala na Mesiya pamo ukuti Kristu, alapile, achenjile injila syake, alinkuya Nkristu wa kifwanikisyo ikinunu fiyo. Tutikukayikila ukuti Pauli ali ni kitima panongwa ya isi abombagha kunyuma, loli akakindilile ukwinong’onela imbibi syake. Bo asyaghenie ukuti Kyala annangisye ikisa, Pauli alinkuya mfumusi wa kwiyipa fiyo kangi akalekile ukwinong’onela ulusubilo lwa bumi bwa bwila na bwila.—Bafilipi 3:13, 14.

 Yeremiya 31:34: “Nisakubaswa imbibi syabo syope nimbibi syabo ndisakusikumbukagha kangi.”

 Isi sikusanusya ukuti: Linga Kyala atuhobokile itolo, atikutukumbusya kangi imbibi syitu. Ikisa kyake kyabwanaloli.