Pabufumusi bwake bwa pa Kyamba, Yesu ayobile ukuti: “Syosa isi mukulonda ukuti abandu bababombeleghe, syo mubabombeleghe sisyo nanumwe.” (Matai 7:12 NWT; Luka 6:31) Ibuku limo lyatile amasyu agha Yesu ayobile ghikusanusya ukuti: “Mubabombeleghe abininu ifindu ifi mubaghile ukulonda ukuti bope bababombeleghe umwe.”—Encyclopedia of Philosophy.

•  Ngimba ululaghilo ulwakuti mubombeghe isi mukulonda ukuti abininu bababombeleghe, lukusanusya isyafiki?

•  Nongwa yafiki ululaghilo ulu lwakulondiwa?

•  Ngimba ululaghilo ulu lukusanusya itolo isi abinitu bikulondiwa ukutubombela?

•  Ngimba tubaghile ukulubombela bulebule ululaghilo ulu?

 Ululaghilo ulu lukutukasya ukuti tubabombeleghe abinitu ifindu ifi tubaghile ukulonda ukuti bope batubombeleghe. Mwakifwanikisyo, abandu bingi bikuhoboka linga umundu ikubomba nabo ifindu mwalughindiko, mwakisa kangi mwalughano. Ukuyoba ubwanaloli, momuno nanuswe “tukulondiwa ukubabombela” abinitu.—Luka 6:31.

 Ululaghilo ulwakuti mubombeghe isi mukulonda ukuti abininu bababombeleghe lwakutula fiyo. Mwakifwanikisyo, . . .

•   Lukutula ukuti ubweghi buye bwamaka.—Baefesi 5:28, 33.

•   Lukutula muno abapapi babaghile ukubalelela kanunu abanabo.—Baefesi 6:4.

•   Lukutula ukuti twikaleghe kanunu nabamanyani bitu, abapalamani kangi na bandu aba tukubomba nabo imbombo.—Isya Mbupingamu 3:27, 28; Bakolosi 3:13.

 Ululaghilo ulwakuti mubombeghe isi mukulonda ukuti abininu bababombeleghe lukufwana itolo ni fundo isi sikwaghiwa fiyo Mulwitikano Ulukulu. Isi Yesu ayobile “syo isi Indaghilo [amabuku 5 aghakwanda agha mu Baibolo] kangi nabasololi [amabuku agha busololi] sikusanusya.” (Matai 7:12) Mmasyu aghangi, Ululaghilo ulu, luli nu bwanaloli ubwakulondiwa fiyo ubu bukwaghiwa kangi Mulwitikano Ulukulu, ubwakuti: Unganeghe unnino bo papo wighanile wimwene.—Baroma 13:8-10.

 Hayi. Ifundo inywamu mu Lulaghilo ulu yo yakuti tubabombeleghe abinitu ifindu ifinunu. Pakubika ululaghilo ulu, Yesu asanusyagha isi tukulondiwa ukubabombela abandu bosa ukongelelapo abalughu bitu. (Luka 6:27-31, 35) Ululaghilo ulwakuti tubombeghe ifindu ifi tukulonda ukuti abinitu batubombeleghe lukutukasya ukuti tubabombeleghe ifinunu abandu bosa.

1.  1. Muketeghe muno ifindu fiyilile. Muketeghe muno ifindu fiyilile na bandu aba bali pabupipi nanumwe. Mwakifwanikisyo, mubaghile ukuketa ukuti umundu yumo ikutamiwa ukupimba katundu, lumo abapalamani binu bamo baghonekiwe nkipatala pamo mubaghile ukunketa umundu uyu mukubomba nawe imbombo uyu awile amaka. Linga ‘mukwinong’onela ifyakulonda fya bangi,’ mukuya pakwinong’onela injila isi mubaghile ukubatulila nu kubakasyila.—Bafilipi 2:4.

2.  2. Muyeghe bakisa. Mwinong’oneleghe ifi fikubabonekela abininu, fifwaneghe fikubabonekela umwe. Ngimba mwayagha pakwipilika bulebule linga mwali yomwe? (Baroma 12:15) Linga mukupilikisya muno abininu bikwipilikila, sikuya pakubatula ukuti mubombepo simo ukuti mubatule.

3.  3. Muyeghe bakwitendekesya ukuchenja ifindu fimo pabumi bwinu. Mukumbukeghe ukuti twebandu tukindene. Isi umundu yumo abaghile ukulonda ukuti mumbombele sikabaghila ukufwana na isi umwe mukulonda ukuti ababombele. Yonongwa yake akabalilo kosa mugheleghe ukubomba ifindu ifi abininu babaghile ukulonda ukuti mubabombele.—1 Bakorinti 10:24.