Umundu unkabi na Lazaro yali nkhani itolo iyi Yesu afwanikisyagha. (Luka 16:19-31) Nkifwanikisyo iki, abandu aba bimilagha amagulu mabili agha bandu: (1) Abayuda abakwibona aba nkabalilo ka Yesu (2) abandu aba babonekagha ukuya bapasi aba bapilikile amasyu gha Yesu.

Mu nkhani iyi

•  Ngimba Yesu ayobile isyafiki isyakufwana nu mundu unkabi na Lazaro?

•  Ngimba inkhani iyi yabombiwe naloli?

•  Ngimba inkhani iyi yikulingania ukuti umoto wa helo ghuliko naloli?

•  Ngimba inkhani ya mundu unkabi na Lazaro yikusanusya isyafiki?

 Mu buku lya Luka chaputala 16, Yesu alingenie isya bandu babili aba ifindu fyachenjile fiyo pabumi bwabo.

 Isagha tukete mbupimba inkhani iyi Yesu ayobile: Umundu unkabi ikalagha ubumi ubwa pamwanya. Umundu undondo uyu ingamu yake ali yo Lazaro alambalalagha pakifigho kya mundu unkabi; umwene alinkunyonywa ukulya utubululukisya utu twasatukagha patebulo iya nkabi. Popapo undondo yula alinkufwa, abandumi ba Kyala balinkumpimba, balinkwakumbika ndupaghato lwa Abrahamu. Yope nunkabi alinkufwa alinkusyiliwa. Mu nkhani iyi, abanyambala bosa aba bikuyobiwa ukuti bo bafwile bamanyagha isi syabombiwagha. Umundu unkabi yula bo afwile atamiwagha mmoto. Alinsumile Abrahamu ukuti antume Lazaro ukuti ayubike ulobe lwake mmisi ukuti alutalalisye ululimi lwake. Abrahamu akanile isi umundu unkabi yula asumile kangi ayobile ukuti abandu bosa babili aba lino ifindu fichenjile pabumi bwabo. Bakabaghile ukutumusania panongwa yakuti pakati pabo lwalipo ulupanga ulutali.

 Hayi. Iki kyali kifwanikisyo itolo ukuti Yesu abamanyisye abandu. Ikifwanikisyo iki abakalyoto bingi bakimenye. Mwakifwanikisyo, akamutu kamo ka mu 1912 mu Baibolo lya Luther kayobile ukuti inkhani iyi kifwanikisyo itolo. Kangi mu Jerusalem Bible, amasyu ghapasi, ghikuyoba ukuti iki “kifwanikisyo kya kapango kya bandu aba bakaliko.”

 Ngimba Yesu abamanyisyagha abandu ukuti linga umundu afwile ikuya nu bumi ku malo ghamo? Ngimba asanusyagha ukuti abandu bamo bikutamiwa mmoto wa helo kangi ukuti Abrahamu na Lazaro bali kumwanya? Ifundo nyingi sikunangisya ukuti inkhani iyi yikali yanaloli.

 Mwakifwanikisyo:

•   Umundu wakyuma yula akali mmoto wanaloli, panongwa yakuti linga ali ku moto angali amisi agha ghali ku nyobe ya Lazaro ghalyumile.

•   Ngimba amisi agha ghali kunyobe angali ghalintulile ukuti amasye ikyumilwa kyake iki ali nakyo mmoto wa helo?

•   Pakabalilo aka Yesu ayobagha inkhani iyi, akalipo nayumo umundu uyu abukileko kumwanya.—Yohani 3:13.

 Hayi. Nalinga inkhani iyi yikabombiwe, loli abandu bamo bikuyoba ukuti ubu buketi bwakuti abandu abanunu bikubuka kumwanya kangi abandu ababibi bikupya ku moto. a

 Ngimba isi syakupilikiwa? Hayi.

 Ikimanyisyo iki kitikukolelana na isi Ibaibolo likumanyisya pa nkhani ya bafwe. Litikuyoba ukuti abandu abanunu aba bafwile bikuya balusekelo linga babukile kumwanya pamo ukuti abandu ababibi bikutamiwa ku moto wa helo. Loli, Ibaibolo likuti: “Aba baliko ku bumi bo bamenye ukuti bisakufwagha, loli abafwe bo bakamanya nasimo.”—Undumbilili 9:5.

 Inkhani iyi yikunangisya ukuti ifindu fyayagha pakuchenja ku bandu bamo.

 Ubuketi bukunangisya ukuti umundu unkabi ikwimila Abalongosi Bakiyuda aba “basighanile indalama.” (Luka 16:14) Abene bapilikisyagha bo Yesu ikumanyisya, loli bansusyagha. Abalongosi aba babaketagha abandu abangi ukuti bali bapasi.—Yohani 7:49.

 Ubuketi bukunangisya ukuti Lazaro ikwimila abandu bapasi aba bakongagha isi Yesu amanyisyagha, kangi abandu aba babengiwe fiyo na balongosi Bakiyuda.

 Ifindu fyachenjile fiyo ku bosa.

•   Abalongosi Bakiyuda binong’onagha ukuti bali pabumanyani ubununu fiyo na Kyala. Loli panongwa yakuti bakalimpilikile Yesu, Kyala abakanile. Isi syafwene itolo ukuti bafwile. Amasyu gha Yesu na gha aba bankongagha agha bafumusyagha ghafwanagha itolo ghikubokya.—Matai 23:29, 30; Imbombo sya Batumiwa 5:29-33.

•   Abandu aba babonekagha ukuya bapasi kwa kabalilo akatali, bo aba baghaniwe fiyo na Kyala. Bingi balitikisye isi Yesu amanyisyagha kangi basayiwe fiyo. Lino bali nu lusako lwa kughaniwa na Kyala kwa bwila na bwila.—Yohani 17:3.