Ngimba Ukuya Mundu wa Mwambepo Findu Fiki? Ngimba Mbaghile Ukuya Mundu wa Mwambepo Kisita Kuya Mutchalichi?
Isi Ibaibolo likuyoba
Ukufwana na muno ilisyu ili balibombile imbombo mu Baibolo, ukuya mundu wa mwambepo kukusanusya ukulonda ukunhobosya Kyala kangi ukumanyila ukwinong’ona bo muno umwene ikwinong’onela. Umundu wa mwambepo ikughelaghela ukukonga ubulongosi ni fundo sya Kyala pa bumi bwake. a—Baroma 8:5; Baefesi 5:1.
Ibaibolo likulingania muno umundu wa mwambepo ikubombela ifindu. Mwakifwanikisyo, mwakukindana nu mundu wa mwambepo, “umundu uyu ikulongosiwa ni nifinyonywa ifyakumbili, yo atikusyambilila isya mbepo wa Kyala,” pamo ifimanyisyo fya Kyala. (1 Bakorinti 2:14-16) Mwakukindana nu mundu wa mwambepo, abandu aba bikulongosiwa ni finyonywa ifyakumbili utubalilo twingi ‘bikuya nakabini kangi bikulwana.’ Bakaya nindumbula yakupa kangi bakaya balutengano. (1 Bakorinti 3:1-3) Ibaibolo likuyoba kangi ukuti abandu aba bighanile ukuheha kangi bikwandisya ukubayabania abamanyani “bikwinong’ona si sya nkisu itolo, bakaya nawe mbepo.”—Yuda 19; Isya Mbupingamu 16:28. b
Isi sili mu nkhani iyi
Ngimba fikwenda bulebule ukuti umundu aye wa mwambepo?
Tuli nu lusako panongwa yakuti tubaghile ukuya mundu wa mwambepo panongwa yakuti tupeliwe nkifwani kya Kyala. (Ubwandilo 1:27) Yonongwa yake fikaya fyakuswighisya ukuti abandu bingi bikundaghisya kangi bikulonda ukumanyila ifindu ifi bakabaghila ukufiketa nu kufipalamasya.
Tupeliwe nutuyilo utununu bo utu Yehova c alinato. Mwakifwanikisyo, tuli balutengano, bakisa nu kuleka ukusalana. (Yakobu 3:17) Yonongwa yake Kyala ikubapa mbepo mwikemo aba bikughelaghela ukupilikila indaghilo syake.—Imbombo sya Batumiwa 5:32.
Nongwa yafiki ukuya mundu wa mwambepo kwakulondiwa?
Ukwinong’onela isya mbepo sikutwala “ubumi nu lutengano.” (Baroma 8:6) Ubumi nu lutengano fyabupe fyapamwanya fiyo ifyakufuma kwa Kyala.
Ubumi: Kyala afingile ukubapa ubumi bwa bwila na bwila abandu aba ba mwambepo.—Yohani 17:3; Bagalatia 6:8.
Ulutengano: Isi sikusanusya ukuya palutengano na Kyala. Abandu aba bikwiyipa ukulonda ifindu ifyakumbili bikuya balughu ba Kyala. (Baroma 8:7) Kangi Kyala ikubasaya aba bikughelaghela ukuya bandu ba mwambepo nu kuya “nulutengano lwa Kyala ulu lughakindile amahala ghosa.” (Bafilipi 4:6, 7) Ulutengano ulwa mundumbula ulu, lukututula ukuti tuhobokeghe pa bumi bwitu.—Matai 5:3
Ngimba mbaghile ukubomba isyafiki ukuti niye mundu wa mwambepo?
Mumanyileghe nu kupilikila indaghilo sya Kyala. Mubaghile ukubomba isi mwakubelenga Ibaibolo ili lyalembiwe na banyambala aba Kyala ‘abasukenie na mbepo mwikemo.’ (2 Peteri 1:21) Isi mukumanyila sikuya pakubatula ukuti mumwiputeghe Kyala “mwambepo na mbwanaloli,” mwakulongosiwa na mbepo mwikemo kangi mwakukolelana nu bwighane bwake.—Yohani 4:24.
Musumeghe ubutuli kwa Kyala. (Luka 11:13) Kyala ikuya pakubatula ukuti munangisyeghe utuyilo utu tukunangisya ukuti muli bandu ba mwambepo. (Bagalatia 5:22, 23) Kangi abaghile ukubapa amahala ukuti mumalane ni ndamyo isi mukwaghana nasyo pa bumi bwinu.—Yakobu 1:5.
Muyeghe pabumanyani na bandu ba mwambepo. Abene bikuya pakubakasya ukuti muye mundu wa mwambepo. (Baroma 1:11, 12) Linga mwighanile ukwangala na bandu aba batikubomba isi Kyala ikulonda mubaghile ukonanga ulwitiko lwinu.—Yakobu 4:4.
Ngimba ngulondiwa ukuya mutchalichi limo ukuti niye mundu wa mwambepo?
Ubwanaloli bo bwakuti ukuya mutchalichi limo kutikusanusya ukuti muli mundu wa mwambepo. Ibaibolo likuti: “Loli umundu uyu ikwibona ukuya ntila Kyala, linga atikulughomola ululimi lwake, loli ikuyisyoba indumbula yake, bo ubutila Kyala bwake bwa itolo.”—Yakobu 1:26.
Nalinga sili bo ulu, Ibaibolo likunangisya ukuti abandu ba mwambepo bikumwiputa Kyala munjila iyi umwene ikwitikisya ukuti tumwiputeghe. Abene bikumanya ukuti pali “mbepo ghumowene,” ughu gho mbepo mwikemo wa Kyala. Mbepo ughu gho ghukubakasya ukuti bamwiputeghe Kyala bo ‘umbili ughu ghuli ghumowene,’ igulu ilyakukolelana ili “likwiyula ukuya mbunyamundu bwa mwambepo, lubapinyanieghe lu lutengano.”—Baefesi 4:1-4.
Ifindu ifyabutungulu pa nkhani yakuya mundu wa mwambepo
Ubutungulu: Ukuya mundu wa mwambepo fikongelelapo fyosa ifi umundu ikubomba pa bumi bwake ifi fikuntula umundu ukuti ikutisiweghe pamo ifi fibaghile ukuntula ukuti aye mundu unnunu.
Ubwanaloli: Ibaibolo likuyoba isya mundu wa mwambepo ukuti yo uyu ikulongosiwa naminong’ono gha Kyala. Ukuya mundu wa mwambepo kutikusanusya ukughelaghela ukuya mundu unnunu kisita kulongosiwa na Kyala. Abandu ba mwambepo bikwikutisiwa mwakumanya ukuti Yehova yo Mpeli wabo kangi bikubomba ifindu mwakukolelana nu bwighane bwake.—Salimo 100:3.
Ubutungulu: Umundu abaghile ukuya wa mwambepo linga ikuleka ukuya ni findu ifi afighanile pamo ifi fibaghile ukumpangisya ukupilika ifyakubaba.
Ubwanaloli: Linga tukubomba ifindu ifyakughutamya umbili witu ko kuti tukubombela “amahala agha ghikubafilimbilisya abandu ukwiputa” kangi ukwinong’ona mwa kumbili. (Bakolosi 2:18, 23) Ibaibolo likuyoba ukuti ubumi bwitu ubwa mwambepo bukutwala ulusekelo komma ifyakubaba.—Isya Mbupingamu 10:22.
Ubutungulu: Kilikyosa iki kikukolelana ni mbepo inyala, ukongelelapo ifya bulaghusi, fikutula ukuya mundu wa mwambepo.
Ubwanaloli: Injila yimo iyakukolelana ni mbepo inyali, ko kusubila ukuti abafwe babaghile ukuyobesania na bandu abumi. Loli Ibaibolo likumanyisya ukuti abafwe batikumanya nasimo. (Undumbilili 9:5) Ukupanga ifya bulaghusi ko kuyobesania ni fipeliwa fya mwambepo ifi fikwimikana na Kyala. Ifya bulaghusi fikunkalalisya Kyala kangi fikumpangisya umundu ukuti aleke ukuya pabumanyani na Kyala.—Abanyalevi 20:6; Ukukumbusya Indaghilo 18:11, 12.
Ubutungulu: Ifipeliwa fyosa fikuya fya mwambepo.
Ubwanaloli: Kilikyosa iki Kyala apelile kikungindika umwene. (Salimo 145:10; Baroma 1:20) Loli abandumi na bandu bo bene aba babaghile ukuya ba mwambepo. Twe bandu tukabaghila ukufwana ni finyamana. Ifinyamana fikubomba itolo ifindu muno fipapiliwe kangi fikabaghila ukuya pabumanyani na Kyala. Ifyakubombiwa fya finyamana fikunangisya itolo ukuti fikulonda ifindu fyakumbili. (2 Peteri 2:12) Yonongwa yake Ibaibolo likuti umundu wa mwambepo akindene fiyo nu mundu uyu ikwinong’ona si sya nkisu itolo.—Yakobu 3:15; Yuda 19.
a Munjobelo iyakwanda iya mu Baibolo, amasyu agha ghasanusiwe ukuti “mbepo” fiyofiyo ghikusanusya “umuyi.” Amasyu agha ghabaghile ukusanusya kangi ikindu iki tukabaghila ukukibona na maso ghitu loli kibaghile ukutupa ubuketi ubwakuti kiliko kangi kya maka. Ibaibolo likundingania Kyala ukuti wa Mwambepo kangi Wapamwanya fiyo. Umundu wa mwambepo ifyakubomba fyake fikunhobosya Kyala kangi ikulongosiwa na mbepo wake mwikemo.
b Ibaibolo likubombela amasyu aghakuti ifindu ‘ifyakumbili’ linga likuyoba isya bandu. Utubalilo twingi amasyu agha ghikusanusya abandu aba ifya kubomba naminong’ono ghabo ghitotike itolo pa findu ifyakumbili, kangi batikubikako amahala pamo ukuti bikukana ukwendela ifundo sya Kyala.
c Ingamu ya Kyala yo Yehova ukufwana na muno Baibolo likuyobela.—Salimo 83:18.
Lumo Mubaghile Ukulonda Ukumanya Isya Nkhani iyi
ISYA USWE
Suma Ukuti Mumanyileghe Ibaibolo
Muyobesanie amalalusyo aghakufwana ni Baibolo, pamo manyila nyingi isyakufwana na Baketi ba Yehova.