Abakristu bikusubila ukuti Yesu afwile panongwa ya butulanongwa bwitu. (1 Peteri 3:18) Loli ukusubila itolo ukuti Yesu yo Mpoki kukaya kwakufwana ukuti umundu apokiwe. Imbepo inyali syope sikusubila ukuti Yesu “mwana wa Kyala” loli imbepo inyala isi sisakupyutiwa.—Luka 4:41; Yuda 6.

•  Ngimba mbombe isyafiki ukuti mbokiwe?

•  Bule pakuyoba isya “Lwiputo lwa Batulanongwa?”

•  Ngimba yo nani alyandisye “Ulwiputo lwa Batulanongwa?”

•   Mukulondiwa ukusubila ukuti Yesu abikile ubumi bwake panongwa ya butulanongwa bwitu. (Imbombo sya Batumiwa 16:30, 31; 1 Yohani 2:2) Mukulondiwa kangi ukusubila ukuti Yesu aliko naloli, kangi ukuti syosa isi Ibaibolo likuyoba isya Yesu syabwanaloli.

•   Mumanyileghe isi Ibaibolo likumanyisya. (2 Timoti 3:15) Ibaibolo likuyoba ukuti untumiwa Pauli na Sila balimbulile undindililanyumba ya bannyololo ukuti: “Umwitikeghe Mwalafyale Yesu, po kupokiwagha.” Ukufuma apo, balyandile ukum’manyisya “amasyu gha Yehova” a undindililanyumba ya bannyololo. (Imbombo sya Batumiwa 16:31, 32) Isi sikunangisya ukuti undindililanyumba ya bannyololo alondiwagha ukupilikisya tasi Amasyu gha Kyala ukuti ansubile Yesu. Alondiwagha ukubumanya tasi kanunu ubwanaloli ubwakufuma mu Malemba.—1 Timoti 2:3, 4.

•   Amupindukeghe. (Imbombo sya Batumiwa 3:19) Mukulondiwa ukupinduka mundumbula syinu nu kwipilika ikitima panongwa ya isi mwinong’onagha nu kubomba kunyuma. Abandu bosa bisakumanya ukuti mupindwike mundumbula linga mulekile ukubomba ifindu ifi fikunhobosya Kyala nu kwanda ukubomba ‘imbombo isi sibaghisenie nulupinduko.”—Imbombo sya Batumiwa 26:20.

•   Mukulondiwa ukosiwa. (Matai 28:19) Yesu atile umundu ikulondiwa ukosiwa ukuti aye m’manyili wake. Undindililanyumba ya bannyololo uyu tunjobile pabwandilo alyosiwe. (Imbombo sya Batumiwa 16:33) Mwakufwana itolo, umfundiwa Peteri bo akimanyisye ikilundilo kya bandu ubwanaloli pakuyoba isya Yesu, “aba balyambilile ilisyu lyake bo balinkosiwa.”—Imbombo sya Batumiwa 2:40, 41.

•   Mupilikileghe ubulongosi bwa Yesu. (Bahiburi 5:9) Abandu aba “bikukonga syosa isi” Yesu ayobile, bikunangisya mu isi bikubomba pa bumi bwabo bwa isiku ni siku ukuti bamanyili bake. (Matai 28:20) Abene ‘bikubomba isi amasyu ghikuyoba, batikupilika itolo ilisyu.’—Yakobu 1:22.

•   Mwifimbilisyeghe mpaka kubumalikisyo. (Marko 13:13) Abamanyili ba Yesu ‘bikulondiwa ukwifimbilisya’ ukuti basapokiwe. (Bahiburi 10:36) Mwakifwanikisyo, untumiwa Pauli abikilepo fiyo indumbula pakupilikila isi Yesu amanyisye nu kukindilila ukuya nsubiliwa kwa Kyala. Umwene alinkwifimbilisya ku findu fingi ukufuma itolo apa achenjile ukuya Nkristu mpaka apa afwilile.—1 Bakorinti 9:27.

 Mu matchalichi ghamo, abandu bikwiputa inyiputo isyakuti, “Ulwiputo lwa Batulanongwa” nu “Lupwito lwa Bupoki.” Aba bikwiputa bikwitikisya ukuti batulanongwa, kangi bikwitikisya ukuti Yesu afwile panongwa ya butulanongwa bwabo. Kangi bikusuma ukuti Yesu ingile mundumbula syabo pamo mbumi bwabo. Loli Ibaibolo litikuyobapo pamo ukwitikisya inyiputo sya kusunga itolo pandumbula bo “Ulwiputo lwa Batulanongwa.”

 Bamo bikwinong’ona ukuti linga babaghile ukuyoba “Ulwiputo lwa Batulanongwa” ko kuti babaghile ukupokiwa. Loli umundu akabaghila ukupokiwa panongwa yakwiputa kwene itolo. Panongwa yakuti tukaya bagholofu, utubalilo tumo tukonanga. (1 Yohani 1:8) Yonongwa yake Yesu abamanyisye aba bikunkonga ukuti akabalilo kosa biputeghe ukuti bahobokeliweghe imbibi syabo. (Luka 11:2, 4) Yonongwa yake bamo mwa Bakristu aba bali nulusako lwakuya nu bumi kwa bwila na bwila batisakubukaba panongwa yakuti balekile ukumbombela Kyala.—Bahiburi 6:4-6; 2 Peteri 2:20, 21.

 Aba bikuketesya isyambukulu bikususania pa nkhani ya muno “Ulwiputo lwa Batulanongwa” lwalyandile. Bamo bikusakisya ukuti ulwiputo ulu lwalyandile pakabalilo ka Chipulotesitanti. Bamo bikusubila ukuti abandu balyandile ukuyoba “Ulwiputo lwa Batulanongwa” apa balyandile amatchalichi amapya mu ma 1700 na mma 1800. Mulimosa muno sibaghile ukuyila, Amalemba ghatikutukasya ukuti twiputeghe ulwiputo ulu, kangi lukususania na isi Ibaibolo likumanyisya.