Amasyu aghakuti “Yerusalemu Umpya,” ko kaya kakufwanikisya itolo. Amasyu agha ghikwaghiwa kabili mu Baibolo kangi ghikwimila igulu lya bandu aba bikunkonga Yesu aba bikubuka kumwanya ukuti bakalaghileghe pampene na Yesu mu Bunyafyale bwa Kyala. (Ubusetuli 3:12; 21:2) Ibaibolo likunangisya ukuti igulu ili likukoleliwa kangi ukuti unkasi wa Kristu.

1.   Yerusalemu Umpya ali kumwanya. Akabalilo kosa linga Ibaibolo likuyoba isya Yerusalemu Umpya, likuyoba ukuti ikusuluka ukufuma kumwanya kuno abandumi bikulindilila ifipata fya kaya aka. (Ubusetuli 3:12; 21:2, 10, 12) Kangi akaya aka kanywamu fiyo kakabaghila ukufwana pa kisu kyapasi iki. Ifighaba 4 fyosa ifya kaya iki fikufwana itolo kangi ubunywamu bwake gho “masitadiyo 12,000.” a (Ubusetuli 21:16; King James Version) Ubutali bwake, ukufuma pasi ukufyuka m’mwanya bwali amakilomita pabupipi 560 (350 mi).

2.   Yerusalemu Umpya Bakristu aba bikukonga Yesu, unkasi wa Kristu. Yerusalemu Umpya ikukoleliwa ukuti “unkikulu uyu ikweghiwa, unkasi wa Kang’osi.” (Ubusetuli 21:9, 10) Amasyu aghakuti Kang’osi ghikwimila Yesu Kristu. (Yohani 1:29; Ubusetuli 5:12) “Unkasi wa Kang’osi,” uyu yo nkasi wa Kristu, ikwimila Abakristu aba bisakulaghilagha pampene na Yesu kumwanya. Ibaibolo likufwanikisya ubumanyani bwa pakati pa Yesu na Bakristu aba bo muno ikuyila undume nu nkasi. (2 Bakorinti 11:2; Baefesi 5:23-25) Kangi pa mabwe gha lwalo lwa Yerusalemu Umpya palembiwe “ingamu 12 isya bafundiwa 12 ba ka Ng’osi ka Kyala.” (Ubusetuli 21:14) Ifundo iyi yikututula ukum’manya kanunu Yerusalemu Umpya, panongwa yakuti Abakristu aba bikukoleliwa ukubuka kumwanya “bayengiwe palwalo lwa bafundiwa na basololi.”—Baefesi 2:20.

3.   Yerusalemu Umpya kighaba kya boma lya Kyala. Yerusalemu wa iyolo kali kaya kanywamu ka Israeli. Ku malo agha ko kuno Davidi, umwanake Solomoni kangi na banyafyale abangi balaghilagha “pakikota iki Kyala ikyimike.” (1 Syambukulu 29:23) Polelo Yerusalemu ikukoleliwa ukuya “kaya akikemo,” aka kimilagha Ubunyafyale bwa Kyala mumbumba ya Davidi. (Nehemiya 11:1) Abandu aba bikupanga Yerusalemu Umpya, uyu ikukoleliwa kangi ukuti “akaya akikemo,” bababa “bo bisakulaghilagha pa kisu,” ukuya banyafyale kumwanya pampene na Yesu.—Ubusetuli 5:9, 10; 21:2.

4.   Abandu ba pa kisu kyapasi bikusayiwa panongwa ya Yerusalemu Umpya. Ibaibolo likuti Yerusalemu Umpya “ikusuluka ukufuma kumwanya kwa Kyala.” Isi sikunangisya ukuti Kyala ikumubombesyela imbombo pa findu fimo ifya pa kisu kyapasi. (Ubusetuli 21:2) Amasyu agha ghikunangisya ukuti kulipo ukukolelana pakati pa Yerusalemu Umpya nu Bunyafyale bwa Kyala, ubu ikububombela imbombo ukuti afwanisye ubwighane bwake “pasi apa bo kumwanya.” (Matai 6:10) Ubwighane bumo bwa Kyala ku bandu pa kisu kyapasi bo ubu:

   •   Isakusosyapo ubutulanongwa. “Ulusoko lwa misi gha bumi” ulu lukusuluka ukufuma ku Yerusalemu Umpya lukonelela amisi ku “mipiki ya bumi” iyi amani ghake “gha ku fighangula ifikolo fya bandu.” (Ubusetuli 22:1, 2) Linga Kyala asosisyepo ubutulanongwa, abandu bisakubumbuluka mwakumbili na mwambepo kangi abandu bisakuya nu bumi ubununu, bo muno Kyala alondelagha pabwandilo.—Baroma 8:21.

   •   Ukuti Kyala na bandu baye pabumanyani ubununu. Ubutulanongwa bukutupaghula kwa Kyala. (Yesaya 59:2) Linga asosisyepo ubutulanongwa, ubusololi ubu bwisakufwanisiwa: “Keta ubwitughalo bwa Kyala buli mbandu bake, umwene ikutughalagha m’myabo, abene bo bikuyagha bandu bake, umwene Kyala yo ikuyagha nabo.”—Ubusetuli 21:3.

   •   Ukusosyapo indamyo syosa. Ukwendela mu Bunyafyale bwake, Kyala “Isakupyasilagha amasosi ghosa, bope nubufwe nalinga bo busulumanie, nalinga ko kukuta pamo ko kubaba fitisakuyangako kangi.”—Ubusetuli 21:4.