Yesu atabwile abandu abasubiliwa mwakuninga ubumi bwake ukuya ikemo. (Matai 20:28) Yonongwa Ibaibolo likunjoba Yesu ukuti “Mpoki wa kisu.” (1 Yohani 4:14) Likuyoba kangi ukuti: “Bukayamo ubupoki mmundu uyungi namanga yikayako ingamu iyingi kusi ku mpalanga iyi bapeliwe abandu, muli iyi fikuti mo tubwaghileghe ubupoki.”—Imbombo sya Batumiwa 4:12.

 Yesu ‘afwilile umundu aliwesa’ uyu ali nu lwitiko myake. (Bahiburi 2:9; Yohani 3:16) Ukufuma apo, “Kyala alinsyusisye mbafwe,” kangi Yesu aghomokile kumwanya bo kipeliwa kya mwambepo. (Imbombo sya Batumiwa 3:15) Yonongwa Yesu “abaghile ukubapoka naloli bosa aba linga bikwendela mu mmyake ukwisa kwa Kyala, papo umwene mumi bwila na bwila kangi ikubapyelekesya (ikubalambila).”—Bahiburi 7:25.

Nongwa yafiki tukulondiwa ukuti Yesu atulambileghe?

 Twesa tuli batulanogwa. (Baroma 3:23) Ubutulanongwa bwabikile umpaka pakati pa uswe na Yehova kangi bo ubu bukutulongosyela ku bufwe. (Baroma 6:23) Loli Yesu, yo uyu “ikubimila” bosa aba bali nu lwitiko mu ikemo lyake. (1 Yohani 2:1,) Ikubalambila nu kubasumila kwa Kyala ukuti apilikeghe inyiputo syabo, kangi nukubahobokela imbibi syabo ukwendela mu ikemo lya Yesu. (Matai 1:21; Baroma 8:34) Yehova ikwitikisya isi Yesu ikunsuma panongwa yakuti sikukolelana nu bwighane bwake. Kyala alintumile Yesu pakisu “ukuti ikisu kipokeliweghe mmyake.”—Yohani 3:17.

Ngimba ukusubila itolo mwa Yesu kwakufwana ukuti umundu apokiwe?

 Hayi. Nalinga ukusubila mwa Yesu kwakulondiwa ukuti tusapokiwe, loli filipo kangi ifingi ifi tukulondiwa ukubomba. (Imbombo sya Batumiwa 16:30, 31) Ibaibolo likuyoba ukuti: “Namanga bo mumo umbili ghukuya mfwe linga ghukaya numuyi, mo mumo lope ulwitiko lukuya lufwe itolo apa linga lukaya nimbombo.” (Yakobu 2:26) Ukuti tusapokiwe, tukulondiwa:

•   Manyila isya Yesu nisya Tata wake, Yehova.—Yohani 17:3.

•   Ukuya nu ulwitiko mmyabo.—Yohani 12:44; 14:1.

•   Tukulondiwa ukukusya ulwitiko lwitu mwa kupilikila indaghilo syabo. (Luka 6:46; 1 Yohani 2:17) Yesu ayobile ukuti akaya wesa uyu ikukolela kumyake ukuti “Mwalafyale” yo isa kupokiwagha loli uyu linga “ikubomba ubwighane bwa Tata uyu ali kumwanya.”—Matai 7:21.

•   Tukindilile ukunangisya ulwitiko nalinga tukwaghana nindamyo. Yesu ayobile kanunu apa atile: “Loli uyu linga ikumilisya ukufika kubumalikisyo yo isa kupokiwagha.”—Matai 24:13.