MOALƐ MAA ABUSUA | AGYALƐ
Kɛ Ɔkɛyɛ Na Wɔanyia Abotane Subane La
“Kunli nee yelɛ yia tɛnlabelɛ mɔɔ hyia abotane la dahuu biala. Saa ɛtɛgyale a bie a ɛbaha kɛ abotane ɛnle debie mɔɔ nwolɛ hyia dɔɔnwo a, noko saa ɛgya a ɛbanwu kɛ ɔhyia na agyalɛ ayɛ kpalɛ.”—John.
Duzu ati a ɛhyia abotane a?
Saa ɛgya a ɛnwu ɛ hu anzɛɛ ɛ ye sinlidɔlɛ kpalɛ.
“Saa ɛgya na mekɛ gua nu a ɔnyɛ se kɛ ɛbava wɔ adwenle wɔazie ɛ hu anzɛɛ ɛ ye subane mɔɔ ɛ nye ɛnlie nwo la azo. Saa ɛnyia adwenle zɛhae mɔɔ ɛndenrɛ la a, ɔnrɛmaa ɛnrɛnyia abotane.”—Jessena.
Saa ɛnlɛ abotane a ɔmaa ɛka edwɛkɛ mɔɔ wɔandwenle nwo la.
“Meda kɛzi mete nganeɛ la ali ndɛndɛ na ɔmaa meka edwɛkɛ mɔɔ ɔnle kɛ meka la. Saa mesi abotane medwenle mɔɔ meka la anwo kolaa na meadendɛ a anrɛɛ menga edwɛkɛ mɔɔ ɔyɛ a meka la.”—Carmen.
Baebolo ne ka kɛ: “Ɛlɔlɛ lɛ abotane yɛɛ ɔ ti akunlu le kɛnlɛma.” (1 Kɔlentema 13:4) Saa menli nwiɔ kulo bɛ nwo a bɛnyia bɛ nwo abotane. Noko, tɛ dahuu a ɛhye le zɔ a. John mɔɔ yɛlimoa yɛha ɔ nwo edwɛkɛ la hanle kɛ, “Abotane le kɛ subane gyɛne mɔɔ ɛha la, ɔnla aze kɛ yɛbali ye ali. Ɔhyia mɔdenlebɔlɛ na wɔahɔ zo wɔala ye ali.”
Kɛ ɔkɛyɛ na wɔala abotane ali ɛ?
Saa edwɛkɛ bie si arɛlevilɛ nu na ɔsɔ wɔ abotane ɔnea a.
Neazo: Ɛ ye anzɛɛ ɛ hu ɛha edwɛkɛ mɔɔ yɛ nyane la ɛhile wɔ. Ɛnwu ye kɛ ɔwɔ kɛ ɛdawɔ noko ɛka bie ɛkile ye.
Baebolo ngyinlazo: “Mmafa ɛya ndɛndɛ, ɔluakɛ ɛyavalɛ le ahoasea sɛkɛlɛneɛ.”—Nolobɔvo 7:9, ɔbodwɛkɛ.
Kɛzi bɛda abotane ali la: Gyinla ekyii. Kolaa na wɔabua ye la, ka kile ɛ nwo kɛ tɛ ye adwenle a le kɛ ɔmaa meali nyane anzɛɛ ɔbɔ me aholoba. Fighting for Your Marriage buluku ne ka kɛ, “Yɛ nuhua dɔɔnwo fa yɛ adwenle sie kɛzi yɛte edwɛkɛ mɔɔ yɛ hu anzɛɛ yɛ ye ka abo la azo na tɛ edwɛkɛ mumua ne mɔɔ ɔhanle la azo.”
Saa bɔbɔ ɛnee ɛ hu anzɛɛ ɛ ye kulo kɛ ɔmaa ɛdi nyane na ɛnyia abotane na wɔanga bie wɔangile ye a, ɔbamaa wɔali tɛnlabelɛ ne anwo gyima wɔ adenle kpalɛ zo. Baebolo ne ka kɛ, “Saa ɛyɛne ɛnle ɛkɛ a, senle nu.”—Mrɛlɛbulɛ 26:20.
“Saa ɛte nganeɛ kɛ ɛ ye le wɔ kpɔvolɛ a, gyinla na dwenle deɛmɔti ɛkulo ye la anwo na yɛ debie kpalɛ maa ye ɛkɛ ne ala.”—Ethan.
Dwenle ɛhye anwo:
Saa ɛ hu anzɛɛ ɛ ye ka edwɛkɛ anzɛɛ yɛ debie mɔɔ maa ɛdi nyane a, duzu a ɛyɛ a?
Kɛ ɔkɛyɛ na wɔala abotane kpole ali kenle fofolɛ ɛ?
Saa ɛ hu anzɛɛ ɛ ye da subane mɔɔ ɛngulo la ali fane dɔɔnwo a.
Neazo: Dahuu ɛ hu anzɛɛ ɛ ye ka amozi, na ɔmaa ɛfa ɛya wɔ mekɛ mɔɔ ɛlɛkendɛ ye la.
Baebolo ngyinlazo: “Bɛhɔ zo bɛnyia abotane bɛmaa bɛ nwo na bɛva bɛhyɛ bɛ nwo bɔkɔɔ.”—Kɔlɔsaema 3:13.
Kɛzi bɛda abotane ali la: Bɔ mɔdenle fa wɔ adwenle sie wɔ agyalɛ ne azo na tɛ ɛdawɔ mumua ne ɛ nwo zo. Biza ɛ nwo kɛ, ‘Saa mesɔ edwɛkɛ ne anu a, asoo ɔbaboa yɛ agyalɛ ne anzɛɛ ɔbazɛkye ye?’ Eza kakye kɛ, “yɛ muala yɛfo fane dɔɔnwo.” (Gyemise 3:2) Ɛhye kile kɛ ɛdawɔ noko ɛlɛ subane bie mɔ mɔɔ ɔwɔ kɛ ɛdi nwolɛ gyima a.
“Ɔyɛ a menyia me gɔnwo mɔ anwo abotane metɛla me hu. Mesuzu kɛ kɛmɔ me nee me hu ɛdɛnla ɛhyɛ na menwu ye sinlidɔlɛ ne mɔ la ati ɔ. Noko saa menyia abotane a ɔkile kɛ mekulo ye yɛɛ mebu ye—ɔti nwolɛ hyia kpalɛ wɔ me agyalɛ ne anu.”—Nia.
Dwenle ɛhye anwo:
Ɛlɛ ɛ hu anzɛɛ ɛ ye sinlidɔlɛ nwo abotane ɔ?
Kɛzi ɛbahola wɔala abotane kpole ali mekɛ fofolɛ ɛ?
Bie A Eza Ɛ Nye Balie
AGYALƐ & ABUSUA
Nyia Ɛ Ye Anzɛɛ Ɛ Hu Subane Mɔɔ Ka Wɔ Ɛya La Anwo Adwenle Kpalɛ
Mmamaa awie subane mɔɔ ka ɛya la fa akɛsakɛsa ba bɛ avinli, emomu sukoa kɛ ɛbanwu subane ne wɔ adenle ngakyile zo.