Ɔ ye nwunle mɔɔ ɔyɛ ye fealeranu la. Ɔkpale ye kyɛlɛ fane dɔɔnwo. Ɔbɔle ye ɛwɔkɛ kɛ ɔbagyakyi, na ɔyɛle zɔ mekɛ ekyii. Mekɛ ɛlɛkɔ la ɔnleanle bieko, akee ɔkpale ɔ ye kyɛlɛ na zɔhane ala a ɛnee dahuu ɔyɛ a.

 Ɛwɔ tɛnlabelɛ mɔɔ le kɛ ɛhye bie la anu ɔ? Saa ɔle zɔ a, ɛnee ɔhyia kɛ ɛsuzu kɛzi wɔ nlanwonvoninli ɛnleanlɛ ne ɛlɛka wɔ bokavolɛ ne nee kɛzi ɛbahola wɔagyakyi ye bɔkɔɔ la anwo. a

Wɔ edwɛkɛ ɛhye anu

•  Mɔɔ ɔwɔ kɛ ɛnwu ye la

•  Mɔɔ ɛbahola wɔayɛ la

•  Saa ɛ hu nea nlanwonvoninli a

 Nlanwonvoninli bahola azɛkye agyalɛ. Ɔmaa ɛ ye fa ɛ nwo ɛya yɛɛ ɔmmaa ɔnlie wɔ ɔnli. b

 Yelɛ mɔɔ ɔ hu nea nlanwonvoninli la bahola ade nganeɛ zɛhae:

•   Ɔ hu ɛye ye ɛmaa. Yelɛ bie mɔɔ bɛfɛlɛ ye Sarah la hanle kɛ, “Mendele nganeɛ kɛ me hu ɛzɛkye agyalɛ fane dɔɔnwo.”

•   Ɔmbɔ ɔ nwo mɔdenle. Yelɛ ko hanle kɛ, nlanwonvoninli mɔɔ ɔ hu nea ye dahuu la maanle ɔdele nganeɛ kɛ “ɔ nwo ɛnyɛ fɛ yɛɛ yebɔ anyiemgba.”

•   Ɔnlie ɔ hu ɔnli. Yelɛ bie mɔɔ bɛfɛlɛ ye Helen la hanle kɛ, “Mekulo kɛ menwu debie biala mɔɔ me hu ɛlɛyɛ la.”

•   Adwenleadwenle. Yelɛ bie mɔɔ bɛfɛlɛ ye Catherine la hanle kɛ, “Me hu subane zɔhane ala a ɛnee dahuu medwenle nwo a.”

 Dwenle ɛhye anwo: Baebolo ne ka kɛ ɔwɔ kɛ kunli kulo ɔ ye. (Ɛfɛsɛsema 5:25) Asoo kunli mɔɔ kulo ɔ ye la bamaa ɔ ye ahɔ tɛnlabelɛ mɔɔ yɛha nwolɛ edwɛkɛ la anu?

 Ɔnla aze kɛ awie mɔɔ nea nlanwonvoninli la bagyakyi. Yelɛ bie mɔɔ bɛfɛlɛ ye Stacey la hanle kɛ, “Me hu gyakyile sigalɛte, wii nee nza ɛnlonlɛ, noko ɔyɛ se ɔmaa ye kɛ ɔbagyakyi nlanwonvoninli ɛnleanlɛ.”

 Saa ɛwɔ tɛnlabelɛ ɛhye bie anu a, nzuzulɛ ɛhye mɔ baboa wɔ yeamaa wɔagyakyi nlanwonvoninli ɛnleanlɛ bɔkɔɔ.

•   Nwu deɛmɔti nlanwonvoninli ɛnle kpalɛ la. Nlanwonvoninli maa awie yɛ angomedi na ɔyɛ debie mɔɔ ɔsuzu kɛ ɔbamaa ɔ nye alie la, na ɛhye sɛkye ninyɛne mɔɔ maa agyalɛ yɛ anyelielɛ mɔɔ le kɛ ɛlɔlɛ, anwodozo nee nɔhalɛlilɛ. Eza ɔngile ɛbulɛ ɔmmaa Gyihova Nyamenle mɔɔ hyehyɛle agyalɛ la.

   Baebolo ngyinlazo: “Bɛli agyalɛ eni.”​—Hibuluma 13:4.

•   Die wɔ nvonleɛ to nu na di nwolɛ gyima. Mmaka kɛ, ‘Saa me ye da ɛlɔlɛ ali kile me a anrɛɛ menrɛnlea nlanwonvoninli.’ Ɔnle kpalɛ kɛ ɛbabɔ ɛ ye somolɛ, ɛyɛ ye zɔ a ɔbamaa wɔanyia debie wɔagyinla zo wɔanlea nlanwonvoninli bieko wɔ mekɛ mɔɔ ɔbayɛ debie mɔɔ ɛ nye ɛnlie nwo la.

   Baebolo ngyinlazo: “Mɔɔ sɔ awie nea la a le ɔdaye ye atiakunluwɔzo mɔɔ twehwe ye na ɔbɛlɛbɛla ye la.”​—Gyemise 1:14.

•   Mmafa debie biala ɛfea ɛ ye. Kunli bie mɔɔ bɛfɛlɛ ye Kevin la hanle kɛ: “Dahuu mebiza me ye kɛ, Asoo meneanle debie bie mɔɔ ɔtwehwe adwenle ɔkɔ nla zo la ɔ? Ɛhye mɔɔ yɛdi nwolɛ adwelie dahuu la ammaa meanva debie biala meanvea ye.”

   Baebolo ngyinlazo: “Yɛkulo kɛ yɛfa nɔhalɛlilɛ yɛbɔ yɛ ɛbɛla wɔ debie biala.”​—Hibuluma 13:18.

•   Maa ɛ nye ɛhɔ zo ɛla ɛkɛ. Saa wɔbɔ mɔdenle wɔgyakyi nlanwonvoninli ɛnleanlɛ mekɛ tendenle bɔbɔ a, wɔannea a ɛbanlea ko bie wɔava nu. Kevin mɔɔ yelimoa yɛha ɔ nwo edwɛkɛ la hanle kɛ, “Mengyakyile nlanwonvoninli ɛnleanlɛ too ɛvolɛ bulu na mendele nganeɛ kɛ mehola meli me ngyegyelɛ ne anwo gyima bɔkɔɔ. Noko mekɛ ɛlɛkɔ la ɔyele ɔ ti bieko.”

   Baebolo ngyinlazo: “Mɔɔ dwenle kɛ ɔgyi kpundii la, ɛnlea boɛ na yeandɔ aze.”​—1 Kɔlentema 10:12.

•   Saa ɛte nganeɛ kɛ ɛnlea bieko a, kendɛ ekyii. Ɛnrɛhola ɛnrɛzi atiakunluwɔzo ɛtane adenle, noko ɛbahola wɔakpa kɛ ɛbali ɔ nzi anzɛɛ ɛnrɛyɛ. Atiakunluwɔzo ɛtane ne bahɔ, noko saa ɛbɔ mɔdenle ɛdwenle ninyɛne gyɛne nwo a, ɔbahɔ ndɛndɛ.

   Baebolo ngyinlazo: “Ɔwɔ kɛ bɛ nuhua ko biala nwu kɛzi ɔbahomo ɔdaye ye sonlabaka ne azo wɔ anwodelɛ nee enililɛ nu la, tɛ wɔ nla nwo atiakunluwɔzo ɛtane mɔɔ bɛngola bɛngomo zo la anu.”​—1 Tɛsalonaekama 4:4, 5.

•   Kpo tɛnlabelɛ mɔɔ ɔbamaa wɔanlea bieko la. Willpower’s Not Enough buluku ne hanle kɛ, “Saa ɛwɔ ɛleka mɔɔ twehwe wɔ atiakunluwɔzo la a, ɔle kɛ wɔkpa mandese la. Mɔɔ hyia la ala a le kɛ ɛbava patulo ekyi wɔagua . . . wɔamaa senle ne azɔ kpole.”

   Baebolo ngyinlazo: “Mmamaa debie ɛtane biala di me nwo zo konim.”​—Edwɛne 119:133.

•   Mmamaa ɛ sa nu to. Ɔbahola yealie mekɛ tendenle na ɛ ye alie wɔ ali bieko. Noko awie mɔ anwubielɛ kile kɛ ɔbahola yealie wɔ yeali bieko.

   Baebolo ngyinlazo: “Ɛlɔlɛ lɛ abotane.”​—1 Kɔlentema 13:4.