BAEBOLO NGYEHYƐNU NGILENU
Ayezaya 42:8—“Medame A Mele AWULAE A”
“Medame a mele Gyihova a. Me duma ɛne; Menva me anyunlunyia memmaa awie biala, yɛɛ menva me ayɛlɛyelɛ memmaa ananze mɔɔ bɛgua la.”—Ayezaya 42:8, Ewiade Fofolɛ Ngilebɛbo.
“Medame a mele AWULAE a: me duma ɛne: na menrɛva me anyunlunyia menrɛmaa awie, yɛɛ menrɛva me ayɛlɛyelɛ menrɛmaa ananze mɔɔ bɛgua la.”—Ayezaya 42:8, King James Version.
Mɔɔ Ayezaya 42:8 abo kile la
Nyamenle maa yɛnwu ye duma na ɔfa ɔboka nwo kɛ ɔnva ye ayɛlɛyelɛ ɔmmaa ananze biala
Nyamenle mumua ne a vale duma ɛhye maanle ɔ nwo a, na bɛhile ɔ bo “Gyihova” wɔ Nzema nu. * (Ɛzɛdɔso 3:14, 15) Nyamenle duma finde fane kɛyɛ 7,000 wɔ Ngyekyeleɛ Dɛba (Hibulu-Elam Ngɛlɛlera) ne anu ɛdeɛ, noko ngilebɛbo dɔɔnwo ɛva amodinli “AWULAE” (mɔɔ bɛyɛ ye mgbole) la ɛzie ɔ gyakɛ anu. Ɛhye anwo neazo wɔ Edwɛne 110:1, mɔɔ le ngapezo mɔɔ fale Gyihova nee Gyisɛse anwo la. Yɛkenga ye wɔ King James Version ne anu kɛ: “AWULAE [Gyihova] zele me Awulae [Gyisɛse].” (Gyima ne 2:34-36) Ewiade Fofolɛ Ngilebɛbo ne maa ngakyile mɔɔ wɔ “Awulae mɔ” nwiɔ ne anu la anu da ɛkɛ ne wienyi ɔlua Nyamenle duma ne mɔɔ ɔfa ɔwula ɔ bo zo ne la azo. Ɔka kɛ: “Gyihova zele me Awulae kɛ: ‘Tɛnla me sa fema zo kɔkpula kɛ mekɛva wɔ kpɔvolɛma mekɛyɛ ɛ gyakɛ abo ebia.”’
Mbɔlɔba dɔɔnwo die di kɛ Nyamenle duma ne abo kile “Ɔmaa Ɔyɛ Ɛkɛ.” Nɔhalɛ Nyamenle ne angomekye a duma ɛhye fɛta ye a, ɔluakɛ ɔ ngomekye a ɔkola ɔyɛ anzɛɛ ɔmaa ye abɔdeɛ bayɛ debie biala mɔɔ hyia amaa ye bodane ara nu a.
Kɛmɔ Gyihova a le yɛ Bɔvolɛ nee nɔhalɛ Nyamenle kokye ne la ati, ɔfɛta kɛ yɛsonle ɔ ngomekye. Ɔnle kɛ yɛsonle awie anzɛɛ debie gyɛne biala, mɔɔ ananze anzɛɛ nvoninli boka nwo la.—Ɛzɛdɔso 20:2-6; 34:14; 1 Dwɔn 5:21.
Mɔɔ Ayezaya 42:8 fale nwo la
Wɔ ngyehyɛnu mɔɔ limoa wɔ Ayezaya tile 42 la anu, Gyihova hanle gyima mɔɔ ‘awie mɔɔ yekpa nu yeye ye’ bayɛ la anwo edwɛkɛ dole ɛkɛ. Nyamenle hanle kɛ sonvolɛ ɛhye mɔɔ yelie ye yedo nu la, ‘bava pɛlepɛlelilɛ arɛlɛ maanle maanle ne mɔ.’ (Ayezaya 42:1) Nyamenle hanle zɔhane ɛwɔkɛ ne anwo edwɛkɛ kɛ: “Kɛkala melɛka ninyɛne fofolɛ nwo edwɛkɛ. Meka nwolɛ edwɛkɛ meahile bɛ kolaa na bɛasisi.” (Ayezaya 42:9) Ngapezo ne mɔɔ fale ‘awie mɔɔ yekpa nu yeye ye’ anwo la rale nu wɔ ɛvoya dɔɔnwo anzi wɔ mekɛ mɔɔ Mɛzaya ne anzɛɛ Kelaese rayɛle ye ɛzonlenlɛ gyima ne wɔ azɛlɛ ye azo la—Mateyu 3:16, 17; 12:15-21.
Ayezaya 42:8 Wɔ Ngilebɛbo Bie Mɔ Anu
“Medame a mele Gyihova a, me duma ɛne; na menrɛva me anyunlunyia menrɛmaa awie biala, yɛɛ menrɛva me ayɛlɛyelɛ menrɛmaa ananze mɔɔ bɛgua la.”—The ‘Holy Scriptures,’ J. N. Darby ɛdeɛ ne.
“Medame a mele Gyihova a; Me duma ɛne; na menrɛva Me anyunlunyia menrɛmaa awie biala, yɛɛ menrɛva Me ayɛlɛyelɛ menrɛmaa ananze mɔɔ bɛgua la.”—A Literal Translation of the Bible.
^ ɛden. 7 Bɛva kɔnsɔnante nna bɛhɛlɛ Nyamenle duma ne wɔ Hibulu nu, na bɛta bɛkɛlɛ ye YHWH wɔ Nrelenza nu. Nrelenza ngilebɛbo bie mɔ kɛlɛ Nyamenle duma ne “Yahweh.” Ɛkpondɛ nwolɛ edwɛkɛ dɔɔnwo a, nea “Nyamenle Duma Ne Wɔ Hibulu Ngɛlɛlera Ne Anu” mɔɔ wɔ Ewiade Fofolɛ Ngilebɛbo ne Mokanwo A4 ne anu la.
Bie A Eza Ɛ Nye Balie
BAEBOLO KPUYA MƆƆ BƐBUA
Aluma Nyɛ A Nyamenle Lɛ A?
Menli dɔɔnwo dwenle kɛ ‘Allah,’ ‘Alefa nee Omiga,’ ‘El Shaddai,’ yɛɛ ‘Gyihova-Gyilɛ’ boka Nyamenle duma ne anwo. Asoo duma mɔɔ yɛfa yɛfɛlɛ Nyamenle la anwo hyia?
BAEBOLO NGILEHILELƐ
Baebolo Ɛzukoalɛ Ninyɛne
Kpa Baebolo ɛzukoalɛ ninyɛne mɔɔ bamaa wɔ debiezukoalɛ ne ayɛ anyelielɛ na wɔanyia zolɛ nvasoɛ la.
