Ɛhɛe. Baebolo ne le buluku mɔɔ nrɛlɛbɛ edwɛkɛ wɔ nu mɔɔ ɛhyɛ kpalɛ noko ɔbua ɛbɛlabɔlɛ nu kpuya mɔɔ anwo hyia la yɛɛ ɔbahola yeaboa wɔ yeamaa ɛ nye alie. Suzu kpuya mɔɔ ɔbua la bie mɔ anwo.

1.   Bɔvolɛ bie wɔ ɛkɛ ɔ? Baebolo ne ka kɛ Nyamenle a ‘bɔle ninyɛne kɔsɔɔti a.’ (Yekile 4:11) Kɛmɔ Nyamenle le yɛ Bɔvolɛ la ati ɔze mɔɔ yɛhyia nwo amaa yɛ nye alie na yɛanyia ahunlundwolɛ wɔ ɛbɛlabɔlɛ nu la.

2.   Asoo Nyamenle dwenle me nwo ɔ? Baebolo ne ɛnga kɛ Nyamenle nee alesama avinli twe emomu ɔka kɛ: “Nyamenle nee yɛ nuhua biala avinli ande biala.” (Gyima ne 17:27) Ninyɛne mɔɔ ɛyɛ la anwo hyia ye yɛɛ ɔkpondɛ kɛ wɔ ɛbɛlabɔlɛ wie wɔ boɛ.​—Ayezaya 48:17, 18; 1 Pita 5:7.

3.   Nzɔne ati a menwu Nyamenle a ɔbamaa me nye alie ɛ? Nyamenle bɔle yɛ mɔɔ yɛlɛ “sunsum nu ngyianlɛ” mɔɔ yemɔ maa yɛnwu bodane mɔɔ yɛ ɛbɛlabɔlɛ ne gyi zo la. (Mateyu 5:3) Ɛhulolɛ mɔɔ yɛlɛ kɛ yɛbanwu yɛ bɔvolɛ ne na yɛ nee ye anyia agɔnwolɛvalɛ la noko boka nwo. Nyamenle anye die mɔdenle mɔɔ ɛbɔ kɛ ɛbanwu ye la anwo ɔluakɛ Baebolo ne ka kɛ: “Bɛhwe bɛbikye Nyamenle, na ɔdaye noko ɔkɛbikye bɛ.”​—Gyemise 4:8.

 Menli mgbe dɔɔnwo ɛnwu ye kɛ Nyamenle mɔɔ bɛ nee ye ɛnyia agɔnwolɛvalɛ la ɛmaa bɛ ɛbɛlabɔlɛ ɛyɛ kpalɛ na yemaa bɛ nye ɛlie. Nyamenle mɔɔ ɛbanwu ye la ɛngile kɛ ɛnrɛyia ngyegyelɛ biala noko nrɛlɛbɛ mɔɔ wɔ Baebolo ne anu la baboa wɔ yeamaa

•   Wɔ abusua asetɛnla ayɛ anyelielɛ.

•   Anzodwolɛ adɛnla ɛ nee awie mɔ avinli.

•   Wɔali ngyegyelɛ ngakyile le kɛ adwenleadwenle, ezukoa nwo ngyegyelɛ nee ewule mɔɔ ɛnlɛ ye ayile la anwo gyima.

 Ɛzonlenlɛ dɔɔnwo mɔɔ fa Baebolo ne di gyima la ɛnli nuhua ngilehilelɛ ne azo. Mɔɔ nee ɛhye le ngakyile la, nɔhalɛ ɛzonlenlɛ mɔɔ di mɔɔ Baebolo ne ka azo la baboa wɔ yeamaa wɔanwu Nyamenle.