Edwɛkɛkpɔkɛ “ɛkolɛyelɛ” mɔɔ kile sonla ngoane mɔɔ la bɛ kunlu mɔɔ bɛye bɛgua la ɛnle Baebolo ne anu. Noko Baebolo ngyɛnu dɔɔnwo wɔ ɛkɛ ne mɔɔ ɔmaa yɛnwu adwenle mɔɔ Nyamenle lɛ wɔ sonla ngoane nwo mɔɔ kakula mɔɔ la bɛ kunlu ɛdeɛ boka nwo la.

 Ngoane le ahyɛlɛdeɛ mɔɔ vi Nyamenle ɛkɛ. (Mɔlebɛbo 9:6; Edwɛndolɛ 36:9) Ɔbu ngoane biala kɛ ɔsonle bolɛ, kakula mɔɔ la ɛkolɛ nu la bɔbɔ ngoane boka nwo. Yemɔti saa awie anye fuu ku kakula mɔɔ la ɛkolɛ nu la a, ɛnee ɔle kodiawu.

 Nyamenle Mɛla mɔɔ ɔvale ɔmaanle Yizilayɛma la hanle kɛ: “Saa mrenyia nwiɔ ɛlɛko na bɛsi raalɛ nrenzɛvolɛ, na ɔ ko ne kpɔne, na nrenzɛvolɛ mumua ne amboda a, ɔwɔ kɛ bɛtwe ahenle mɔɔ zile ye la anzo. Ezukoa bolɛ biala mɔɔ nrenzɛvolɛ ne ɔ hu kɛbɔ la, saa ndɛnebuavolɛma die to nu a, ɔwɔ kɛ ahenle ne tua. Na saa nrenzɛvolɛ ne anwo bu ɛbonle a, ɛnee yemɔ, ɔbayɛ mɔɔ ɛku ɛ gɔnwo a bɛku wɔ.”​—Adendulɛ 21:22, 23. *

•  Mekɛ boni a sonla ngoane bɔ ɔ bo a?

•  Asoo Nyamenle bava awie mɔɔ ɛye ɔ ko ɛlɛ la ɛtane ahyɛ ye?

•  Asoo ɔle ɛtane kɛ awie baye ɔ ko wɔ mekɛ mɔɔ nrenzɛvolɛ ne anzɛɛ kakula ne ngoane la esiane nu la ɔ?

 Nyamenle bu sonla ngoane nwo mgbonda ɔvi mekɛ mɔɔ limoa mɔɔ raalɛ bava ɛkolɛ la. Nyamenle ɛmaa yela ali wɔ Ye Edwɛkɛ Baebolo ne anu fane dɔɔnwo kɛ, kakula mɔɔ la ɛkolɛ nu la ngoane sonle bolɛ. Suzu neazo bie mɔ mɔɔ kile kɛ Nyamenle bu kakula mɔɔ bɛwo ye nee mɔɔ la ɛkolɛ nu la kɛ bɛ muala bɛ ngoane nwo hyia la anwo.

•   Sunsum ne maanle Belemgbunli Devidi hanle hilele Nyamenle kɛ: “Mekɛ mɔɔ metɛsɔhonle ɛhwee la ɛnee ɛ nye gyi me nwo.” (Edwɛndolɛ 139:16) Mɔɔ Devidi la ɛkolɛ nu bɔbɔ la, Nyamenle nwunle ye kɛ ɔle sonla.

•   Bieko, mɔɔ bɛtɛwole ngapezonli Gyɛlɛmaya bɔbɔ la, Nyamenle nwunle kɛ ɔbahola yeava ye yeali bodane titili bie anwo gyima. Nyamenle zele ye kɛ: “Mekabɔ wɔ meado ɛ nli akunlu la ɛnee meze wɔ, yɛɛ bɛkawo wɔ la ɛnee mekpa nu meye wɔ, na meyɛ wɔ maanle maanle Nyamenle kpɔmavolɛ.”​—Gyɛlɛmaya 1:5.

•   Baebolo kɛlɛvolɛ Luku mɔɔ ɛnee le dɔketa la vale edwɛkɛkpɔkɛ ko ne ala hanle kakula mɔɔ la ɛkolɛ nu yɛɛ mɔɔ bɛwo ye fofolɛ la anwo edwɛkɛ.​—Luku 1:41; 2:12, 16.

 Nyamenle bahola ava menli mɔɔ bɛye bɛ ko ɛlɛ la ɛtane ahyɛ bɛ. Saa bɛnyia Nyamenle adwenle wɔ ngoane nwo a, ɔnle kɛ bɛmaa bɛ adwenle bua bɛ fɔlɛ. ‘Gyihova le dovolɛ nee anwunvɔnezelɛnli . . . Kɛ aduduleɛ nee adɔleɛ avinli si twe la, zɔhane ala yɛɛ ɔye yɛ ɛtane ne mɔ ɔmaa yɛ nee bɛ avinli twe a.’ * (Edwɛndolɛ 103:8-12) Gyihova bava awie biala mɔɔ ɛnlu ɔ nwo nɔhalɛ nu wɔ ye ɛtane dɛba, mɔɔ ɛkolɛyelɛ boka nwo la ɛtane ahyɛ ye.​—Edwɛndolɛ 86:5.

 Ɔlua mɔɔ Baebolo ne ka ye wɔ kakula mɔɔ la ɛkolɛ nu ngoane nwo la ati, awie ɛnrɛhola ɛnrɛha kɛ ɔbahola yeaye ɔ ko ɔluakɛ bie a kakula ne anzɛɛ mame ne kpɔkɛdelɛ bazɛkye la ati.

 Na saa ɔbaye kɛ ɔwɔ kɛ bɛdie kakula ne anzɛɛ ye mame ngoane wɔ mekɛ mɔɔ ye awolɛ nu bayɛ se la ɛ? Ɛhye ɛnda ɛnzi, noko wɔ tɛnlabelɛ zɛhae mɔ anu, ɔwɔ kɛ menli mɔɔ wɔ nwo la si kpɔkɛ wɔ ngoane nwiɔ ne nuhua ne mɔɔ bɛbɔ nwolɛ bane la anwo.