Ɛhɛe, Abɔnsam wɔ ɛkɛ ne amgba. Ɔdaye a ɔsie “ɛtane ewiade ɛhye” a, na ɔle sunsum nu abɔdeɛ mɔɔ ɔ ti rayɛle se na ɔdele Nyamenle anwo atua a. (Dwɔn 14:30; Ɛfɛsɛsema 6:11, 12) Baebolo ne da Abɔnsam subane ali ɔlua aluma ɛhye mɔ mɔɔ ɔfa ɔfɛlɛ ye nee mɔɔ bɛkile la azo:

•   Seetan, ɔkile “Dwazotiavolɛ.”​—Dwobu 1:6.

•   Abɔnsam, ɔkile “Dumasɛkyevo.”​—Yekile 12:9.

•   Ɛwɔlɛ, bɛfa bɛdi gyima wɔ Baebolo ne anu bɛkile “Mɛlɛbɛla.”​—2 Kɔlentema 11:3.

•   Sɔneavolɛ.​—Mateyu 4:3.

•   Adalɛ.​—Dwɔn 8:44.

Ɔnle ngyinlazo anzɛɛ ɛtanevolɛ subane

 Bie mɔ bu Seetan Abɔnsam kɛ ɔle ngyinlazo anzɛɛ subane ɛtane bie mɔɔ wɔ yɛ nu a. Noko akee, bɛhɛlɛ wɔ Baebolo ne anu kɛ Nyamenle nee Seetan dendɛle. Nyamenle di munli, ɔti ɔnrɛyɛ nɔhalɛ kɛ ɔ nee subane ɛtane bie mɔɔ wɔ ye nu la a dendɛle a. (Mɛla ne 32:4; Dwobu 2:1-6) Zɔhane ala a, Seetan zɔle Gyisɛse mɔɔ ɛtane biala ɛnle ɔ nwo la nleanle a. (Mateyu 4:8-10; 1 Dwɔn 3:5) Baebolo ne kile kɛ Abɔnsam wɔ ɛkɛ na ɔnle subane ɛtane bie ala.

 Asoo ɔwɔ kɛ ɔyɛ yɛ azibɛnwo kɛ menli dɔɔnwo ɛnlie ɛnli kɛ Abɔnsam wɔ ɛkɛ ne la ɔ? Kyɛkyɛ, Baebolo ne ka kɛ Seetan dua mɛlɛbɛla adenle zo fa di ye bodane nwo gyima. (2 Tɛsalonaekama 2:9, 10) Ye mɛlɛbɛla adenle titili ne mɔ ko a le kɛ ɔsi menli anye na ɔmmaa bɛnnwu ye kɛ ɔwɔ ɛkɛ ne amgba.​—2 Kɔlentema 4:4.

  Adalɛ Edwɛkɛ: Lucifer le Abɔnsam duma fofolɛ.

 Nɔhalɛ edwɛkɛ: Hibulu edwɛkɛkpɔkɛ mɔɔ wɔ Baebolo ne anu mɔɔ menli ɛhile ɔ bo kɛ “Lucifer” la kile “Alehyenlɛ Ɛwɔlɔra.” (Ayezaya 14:12) Adwenle mɔɔ wɔ edwɛkɛ ne anu la maa ɔda ali kɛ ɛnee bɛlɛka Babelɔn arelemgbunli anzɛɛ abusua ebialilɛ mɔɔ Nyamenle bɛlɛle bɛ aze ɔlua bɛ anwomemaazo ti la anwo edwɛkɛ. (Ayezaya 14:4, 13-20) Bɛvale edwɛkɛkpɔkɛ “Alehyenlɛ Ɛwɔlɔra” bɛgolole Babelɔn ebialilɛ ne anwo wɔ mekɛ mɔɔ bɛdule ye bɛguale la.

  Adalɛ edwɛkɛ: Seetan a “babua ɛtanevolɛma ndɛne” yeamaa Nyamenle a.

 Nɔhalɛ edwɛkɛ: Abɔnsam ɛnle Nyamenle sonvolɛ emomu ɔle ye kpɔvolɛ. Seetan Abɔnsam kpɔ menli mɔɔ sonle Nyamenle la na ɔto bɛ ɛzonle.​—1 Pita 5:8; Yekile 12:10.