Amagɛdɔn le konle mɔɔ li awieleɛ bɔkɔɔ mɔɔ alesama arane nee Nyamenle baho a. Arane ɛhye mɔ nee menli mɔɔ gyi bɛ nzi la dwazo tia Nyamenle, na ɛnɛ bɔbɔ bɛmbɛlɛ bɛ nwo aze bɛmmaa ye tumililɛ ne. (Edwɛne 2:2) Amagɛdɔn konle ne bava alesama tumililɛ ara awieleɛ bɔkɔɔ.​—Daneɛle 2:44.

 Edwɛkɛkpɔkɛ “Amagɛdɔn” finde Baebolo ne anu ko pɛ ala, wɔ Yekile 16:16. Yekile hanle kɛ, “arelemgbunli mɔɔ wɔ azɛlɛ ye azo amuala la” ‘baboɔboa bɛ nloa’ amaa “Nyamenle, Tumivolɛ Bedevinli ne kenle kpole ne anu konle ne” wɔ “ɛleka mɔɔ bɛfɛlɛ ye Hibulu nu Amagɛdɔn la.”​—Yekile 16:14.

 Nwane mɔ a baho wɔ Amagɛdɔn a? Gyisɛse Kelaese bali anwuma ɛlɔne dɔɔnwo anyunlu yeamaa bɛali Nyamenle agbɔvolɛ nwo zo konim. (Yekile 19:11-16, 19-21) Menli mɔɔ dwazo tia Nyamenle tumililɛ ne la yɛɛ bɛdabɛ mɔɔ bɛmbu ye la kɔsɔɔti boka agbɔvolɛ ne mɔ anwo.​—Yizikeɛle 39:7.

 Asoo bɛbaho Amagɛdɔn konle ne wɔ Middle East? Kyɛkyɛ. Bɛnrɛho Amagɛdɔn konle ne wɔ ɛleka ko ala emomu ɔle konle mɔɔ bahɔ zo wɔ azɛlɛ ye azo ɛleka biala a.​—Gyɛlɛmaya 25:32-34; Yizikeɛle 39:17-20.

 Amagɛdɔn mɔɔ eza bɛfɛlɛ ye “Har–​Magedon” (Hibulu nu Har Meghiddohnʹ), la kile “Mɛgido Boka.” Ɛnee Mɛgido le suakpole wɔ tete Yizilayɛ. Tetedwɛkɛ ka konle ngakyile mɔɔ bɛhonle ye wɔ ɛkɛ ne la anwo edwɛkɛ, mɔɔ Baebolo ne bɔbɔ yɛle bie mɔ anwo kɛlɛtokɛ a. (Ndɛnebuavolɛma 5:19, 20; 2 Arelemgbunli 9:27; 23:29) Noko akee, Amagɛdɔn ɛnrɛhola ɛnrɛhile ɛleka kpɔtee bie mɔɔ bikye tete Mɛgido la. Awoka ndendenle ɛnle ɛkɛ, yɛɛ menli mɔɔ bɛbaho konle ne bɛatia Nyamenle la amuala ɛnrɛhɔ Gyɛzeɛle azɛlɛ sɛsɛ ne azo. Emomu, Amagɛdɔn le tɛnlabelɛ mɔɔ nuhua a maanle maanle mɔɔ wɔ ewiade amuala la babɔ nu adwazo atia Nyamenle tumililɛ ne a.

 Kɛzi ninyɛne bayɛ wɔ Amagɛdɔn konle ne anu a? Yɛnze kɛzi Nyamenle bava ye tumi ne ali gyima wɔ zɔhane mekɛ ne ɛdeɛ, noko yɛze kɛ ɔbava ninyɛne mɔɔ ɔvale ɔlile gyima wɔ tete ne le kɛ ezuawolɛ, azɛlɛkpusulɛ, azuyilɛ, senle yɛɛ sɔlefa, ɛsɛlɛmanye yɛɛ ewulenzane yeali gyima. (Dwobu 38:22, 23; Yizikeɛle 38:19, 22; Habakɛke 3:10, 11; Zɛkalaya 14:12) Yeanyɛ boɛ fee la, Nyamenle agbɔvolɛ bie mɔ anye zo bɛada bɛ na bɛahuhu bɛ nwo, nzinlii bɛbanwu ye kɛ Nyamenle a ɛlɛko atia bɛ a.​—Yizikeɛle 38:21, 23; Zɛkalaya 14:13.

 Asoo Amagɛdɔn bazɛkye ewiade ne bɔkɔɔ ɔ? Ɔnrɛzɛkye azɛlɛ ne mɔɔ yɛde zo la ɔluakɛ azɛlɛ ne le alesama sua nu. (Edwɛne 37:29; 96:10; Nolobɔvo 1:4) Amagɛdɔn ɛnrɛzɛkye alesama amuala bɔkɔɔ , ɔluakɛ “menli ekpunli kpole” bie mɔɔ bɛle Nyamenle azonvolɛ la banyia ngoane.​—Yekile 7:9, 14; Edwɛne 37:34.

 Bɛfa edwɛkɛkpɔkɛ “ewiade” bɛgyinla ɛkɛ bɛmaa azɛlɛ ne, noko ɔyɛ a wɔ Baebolo ne anu bɛfa bɛgyinla ɛkɛ bɛmaa alesama mɔɔ bɛte atua bɛtia Nyamenle la. (1 Dwɔn 2:15-17) Amagɛdɔn bava ewiade ne mɔɔ le menli mɔɔ te atua tia Nyamenle la ara ye “awieleɛ” bɔkɔɔ.​—Mateyu 24:3.

 Mekɛ boni a Amagɛdɔn babɔ ɔ bo a? Mekɛ mɔɔ Gyisɛse ka “anwongyelelɛ kpole” ne mɔɔ bahɔwie Amagɛdɔn konle ne anu anwo edwɛkɛ la, ɔhanle kɛ: “Mɔɔ fale kenle zɔhane nee dɔnehwele ne anwo la ɛdeɛ, awie biala ɛnze, anwumabɔvolɛma mɔɔ wɔ anwuma nee Ralɛ ne bɔbɔ ɛnze, kyesɛ Selɛ ne ala.” (Mateyu 24:21, 36) Noko akee, Baebolo ne ka kɛ Amagɛdɔn bara wɔ Gyisɛse ɛralɛ ne mɔɔ ɛnyelɛ ɛnnwu ye la anu, ɛhye bɔle ɔ bo wɔ 1914.​—Mateyu 24:37-39.