Asoo Mebahola Meanyia Arɛlekyekyelɛ Edwɛkɛ Wɔ Baebolo Ne Anu?
Baebolo ne bua kɛ
Ɛhɛe. (Wulomuma 15:4) Suzu Baebolo ne anu edwɛkɛ bie mɔ mɔɔ ɛmaa menli dɔɔnwo mɔɔ gyi tɛnlabelɛ mɔɔ anu yɛ se nee ngyegyelɛ bie mɔ anloa la ɛnyia arɛlekyekyelɛ la anwo nea.
Wɔ edwɛkɛ ɛhye anu
Ngyegyelɛ
Edwɛne 23:4: “Saa melua awozinli kabii bɔnza nu bɔbɔ a, menzulo munzule biala, ɔluakɛ ɛ nee me lua.”
Mɔɔ ɔkile: Saa ɛsɛlɛ Nyamenle na ɛfa ɛ nwo ɛto ye Edwɛkɛ, Baebolo ne azo ɛkpondɛ adehilelɛ a, ɛbanyia akɛnrasesebɛ wɔagyinla ngyegyelɛ nloa.
Felepaema 4:13: “Melɛ anwosesebɛ wɔ debie biala anu ɔlua ahenle mɔɔ maa me tumi la ati.”
Mɔɔ ɔkile: Nyamenle bahola amaa wɔ anwosesebɛ yeamaa wɔagyinla ngyegyelɛ biala anloa.
Kulovolɛ bie ewule
Nolobɔvo 9:10: “Gyima anzɛɛ ngyehyɛleɛ anzɛɛ adwenle anzɛɛ nrɛlɛbɛ ɛnle Nla ne anu.”
Mɔɔ ɔkile: Menli mɔɔ ɛwu la ɛnnwu amaneɛ yɛɛ bɛngola bɛngyegye yɛ. Bɛnze ɛhwee.
Gyima ne 24:15: ‘Bɛbadwazo menli bɛavi ewule nu.’
Mɔɔ ɔkile: Nyamenle bahola adwazo yɛ alɔvolɛ mɔɔ ɛwu la.
Fɔlɛbualɛ kpole
Edwɛne 86:5: “O Gyihova, * ɛle kpalɛ yɛɛ ɛlɛ ɛhulolɛ kɛ ɛbava ɛtane wɔahyɛ; wɔ ɛlɔlɛ kpundii ne zonle maa bɛdabɛ mɔɔ bɛsu bɛfɛlɛ wɔ la amuala.”
Mɔɔ ɔkile: Nyamenle fa bɛdabɛ mɔɔ bɛnlu bɛ nwo bɔkɔɔ bɛvi nvonleɛ mɔɔ bɛyɛle ye dɛba ne la anwo na bɛbɔ kpɔkɛ kɛ bɛnrɛyɛ bieko la ɛtane kyɛ bɛ.
Edwɛne 103:12: “Kɛ mɔɔ aduduleɛ nee adɔleɛ avinli twe la, zɔhane ala a yemaa yɛ nee yɛ mɛladonlɛ ne mɔ avinli ɛhwe a.”
Mɔɔ ɔkile: Saa Nyamenle fa yɛ ɛtane kyɛ yɛ a, ɔfuandi yɛ ɛtane ne mɔ ɔgua ye moamoa. Ɔnva nwolɛ edwɛkɛ ɔndoa yɛ bieko ɔndo yɛ ɛzonle anzɛɛ ɔndwe yɛ nzo wɔ nwolɛ.
Alɔbɔlɛlilɛ
Edwɛne 31:7: “Wɔnwu me nyanelilɛ; ɛze ngyegyelɛ mɔɔ mewɔ nu la.”
Mɔɔ ɔkile: Nyamenle ze nyane biala mɔɔ ɛlɛdi la kpalɛ. Ɔte nyane kpole mɔɔ ɛlɛdi la abo—saa bɔbɔ awie mɔ ɛnde ɔ bo a.
Edwɛne 34:18: “Gyihova bikye bɛdabɛ mɔɔ bɛ ahonle ɛbubu la; na ɔdie bɛdabɛ mɔɔ bɛ sa nu ɛdo la.”
Mɔɔ ɔkile: Nyamenle ɛbɔ ɛwɔkɛ kɛ saa ɛlɛdi nyane a ɔbaboa wɔ. Ɔbamaa wɔanyia anwosesebɛ wɔava wɔagyinla wɔ nyanelilɛ ne anloa.
Anwodolɛ
Edwɛne 41:3: “Gyihova baboa ye wɔ ye anwonyane ɛkpa zo.”
Mɔɔ ɔkile: Nyamenle baboa wɔ yeamaa wɔagyinla kpundii na wɔanyia anzodwolɛ, anwosesebɛ nee nrɛlɛbɛ mɔɔ ɛbava wɔazi kpɔkɛ kpalɛ wɔ mekɛ mɔɔ ɛ nwo kɛdo wɔ kpole la.
Ayezaya 33:24: “Maanlema ne anu biala ɛnrɛha kɛ: ‘Me nwo ɛdo me.’”
Mɔɔ ɔkile: Nyamenle ɛbɔ ɛwɔkɛ kɛ mekɛ bara mɔɔ alesama kɔsɔɔti bade kpɔkɛ kpalɛ a.
Adwenleadwenle
Edwɛne 94:19: “Mɔɔ adwenleadwenle bole me nwo zo la, ɛkyekyele me rɛle na ɛmaanle me ahonle dɔle me azule nu.”
Mɔɔ ɔkile: Saa adwenleadwenle tɔ yɛ nwo na yɛsɛlɛ Nyamenle a, ɔbahola yeaboa yɛ yeamaa yɛazie yɛ nwo dii.
1 Pita 5:7: “Bɛvuandi bɛ adwenleadwenle muala bɛgua ɔ nwo zo ɔluakɛ ɔdwenle bɛ nwo.”
Mɔɔ ɔkile: Nyamenle dwenle yɛ amaneɛnwunlɛ nwo. Ɔse yɛha yɛ ngyegyelɛ ne mɔ anwo edwɛkɛ yɛhile ye wɔ asɔneyɛlɛ nu.
Konle
Edwɛne 46:9: “Ɔmaa bɛgyakyi konle wɔ azɛlɛ ye kɔsɔɔti azo.”
Mɔɔ ɔkile: Ɔnrɛhyɛ Nyamenle Belemgbunlililɛ ne baye konle kɔsɔɔti avi azɛlɛ ye azo.
Edwɛne 37:11, 29: “Bɛlɛvoma banyia azɛlɛ ne, na bɛ nye balie kpalɛ wɔ anzodwolɛ dɔɔnwo anu. . . . Tenlenema banyia azɛlɛ ne, na bɛadɛnla zolɛ dahuu.”
Mɔɔ ɔkile: Kpalɛma badɛnla anzodwolɛ nu wɔ azɛlɛ ye azo dahuu.
Kenle bie nwo adwenleadwenle
Gyɛlɛmaya 29:11: “‘Meze adwenle mɔɔ melɛdwenle ye wɔ bɛ nwo la,’ Gyihova a se a, ‘anzodwolɛ adwenle ɔ, na tɛ munzule adwenle, kɛ mebamaa bɛ kenle bie nee anyelazo.’”
Mɔɔ ɔkile: Nyamenle ɛmaa ye menli ɛnyia anwodozo kɛ bɛbahola bɛanyia kenle bie mɔɔ yɛ anyelielɛ la.
Yekile 21:4: “Ɔbakyikyi bɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko. Alimoa ninyɛne ne ɛpɛ nu.”
Mɔɔ ɔkile: Nyamenle ɛbɔ ɛwɔkɛ kɛ ɔbaye ninyɛndane kɔsɔɔti mɔɔ ɛnwu ye kɛ ɔlɛkɔ zo ɛnɛ la yeavi ɛkɛ.
^ Nyamenle duma a le Gyihova. (Edwɛne 83:18) Nea edwɛkɛ “Gyihova A Le Nwane?”
Bie A Eza Ɛ Nye Balie
ƐZINZALƐ ARANE
Ɛbahola Wɔanyia Kɛzi Nyamenle Dwenle Yɛ Nwo La Azo Nvasoɛ
Ngɛlɛlera ne boa yɛ maa yɛnyia diedi wɔ kenle bie ɛwɔkɛ mɔɔ Nyamenle ɛbɔ yɛ la anu.
EDWƐKƐTILE NGAKYILE
Arɛlekyekyelɛ Maa Bɛdabɛ Mɔɔ Bɛlɛdi Alɔbɔlɛ La
Saa yɛ dɔvolɛ bie wu a, bie a yɛbade nganeɛ kɛ awie biala ɛnde yɛ nyane bo. Noko Nyamenle te ɔ bo yɛɛ ɔkulo kɛ ɔboa yɛ.
ƐZINZALƐ ARANE
Mekɛ Mɔɔ Asetɛnla Nu Kɛyɛ Se Kpalɛ La
Ɔnva nwo kɛ asetɛnla nu bahola ayɛ se la, nvasoɛ wɔ zo kɛ yɛbadɛnla ngoane nu.
