Kyɛkyɛ, ɔnle kɛ yɛyɛ zɔ. New Catholic Encyclopedia ne ka mɛla mɔɔ Nyamenle vale maanle Yizilayɛma anwo edwɛkɛ la, ɔhanle kɛ: “Baebolo kɛlɛtokɛ ngakyile maa yɛnwu ye wienyi kɛ ananze ɛmboka nɔhalɛ ɛzonlenlɛ mɔɔ bɛfa bɛmaa Nyamenle la anwo.” Suzu Baebolo ngyehyɛnu ɛhye mɔ anwo:

•   “Bɛmmayɛ ananze, anzɛɛ debie biala mɔɔ wɔ anwuma anzɛɛ aze anzɛɛ nzule nu wɔ azɛlɛ bo la sɔhovolɛ. Bɛmmabɔ bɛ ti aze bɛmaa bɛ anzɛɛ bɛmmasonle bɛ. Ɔluakɛ medame [Gyihova] bɛ Nyamenle ne, mele nungule Nyamenle.” (Adendulɛ 20:4, 5) Kɛmɔ Nyamenle twe “nungule” la ati, ɔ nye ɛnlie kɛ yɛbayeyɛ ananze anzɛɛ yɛbazonle nvoninli, aboduaba anzɛɛ ninyɛne gyɛne biala.

•   “Menrɛva me ayɛlɛyelɛ menrɛmaa ananze.” (Ayezaya 42:8, Easy-to-Read Version) Nyamenle kpo ɛzonlenlɛ mɔɔ bɛdua ananze nwo zo bɛfa bɛmaa ye la. Mɔɔ Yizilayɛma bie mɔ bɔle mɔdenle kɛ bɛdua ɛnlankɛ ralɛ ananze nwo zo bɛazonle ye la, Nyamenle hanle kɛ bɛyɛ “ɛtane kpole.”​—Adendulɛ 32:7-9, Easy-to-Read Version.

•   “Ɔnle kɛ yɛdwenle kɛ Nyamenle le abɔdeɛ bie mɔɔ le kɛ ezukoa nvutuke anzɛɛ dwɛtɛ fufule anzɛɛ bolɛ ananze bie mɔɔ sonla ɔdaye yeva ye adwenle yehyehyɛ na yeyɛ la.” (Gyima ne 17:29) Awozonle ɛzonlenlɛma ta fa ananze mɔɔ “sonla ɔdaye yeva ye adwenle yehyehyɛ na yeyɛ la” di gyima, noko Baebolo ne ka kɛ ɔwɔ kɛ Kilisienema ‘fa diedi bɔ bɛ ɛbɛla, na tɛ mɔɔ ɛnyelɛ nwu ye la ɔ.’​—2 Kɔlentema 5:7.

•   “Bɛhwe bɛ nwo bɛvi awozonle ɛzonlenlɛ nwo.” (1 Dwɔn 5:21) Wɔ mɛla mɔɔ bɛvale bɛmaanle Yizilayɛma nee Kilisienema la anu, Baebolo ne kɔ zo bu ananze nee ninyɛne ngakyile mɔɔ bɛfa bɛdi gyima wɔ ɛzonlenlɛ nu mɔɔ bɛkilehile kɛ Nyamenle die to nu la kɛ ɔle nwɔra.