Ɛhɛe, ɔkakyi ye adwenle. Saa menli kakyi bɛ subane a, Nyamenle noko yɛ nzenzaleɛ wɔ kɛzi ɔ nee bɛ di la anu. Kɛ neazo la, mekɛ mɔɔ Nyamenle vale ndɛnebualɛ edwɛkɛ hɔmaanle tete Yizilayɛma la, ɔhanle kɛ: ‘Wɔannea a ɔkɛyɛ kɛ menli ne badie na awie biala ahwe ɔ nwo avi ye ɛtane nwo. Saa bɛyɛ ɛhye a mebahakyi me adwenle wɔ ɛzɛkyelɛ mɔɔ bɛ ɛtane ne mɔ ati mevua kɛ mesɛkye bɛ la anwo.’​—Gyɛlɛmaya 26:3.

 Baebolo ngilebɛbo dɔɔnwo kile ngyɛnu ɛhye abo kɛ Nyamenle “banlu” ɔ nwo wɔ ɛzɛkyelɛ mɔɔ ɛnee yevua kɛ ɔsɛkye bɛ la anwo. Ɛhye bahola ahile kɛ Nyamenle yɛle nvonleɛ. Noko akee, Hibulu edwɛkɛkpɔkɛ ne bahola ahile kɛ “ɛkakyi wɔ adwenle anzɛɛ wɔ bodane.” Abɔlɔba bie hɛlɛle kɛ: “Saa sonla kakyi ye subane a, ɔmaa Nyamenle yɛ nzenzaleɛ wɔ ye ndɛnebualɛ nu.”

 Nɔhalɛ nu, Nyamenle kola kakyi ye adwenle noko ɛhye ɛngile kɛ, kɛ ɔde ye biala la ɔwɔ kɛ ɔkakyi ye adwenle. Suzu tɛnlabelɛ bie mɔ mɔɔ Baebolo ne maa yɛnwu kɛ Nyamenle angakyi ye adwenle wɔ nu la anwo:

•   Nyamenle ammaa Beelake angakyi Ye adwenle na Yeanwa Yizilayɛ maanle ne amonle.​—Ɛdianlɛ 23:18-​20.

•   Mɔɔ Yizilayɛ Belemgbunli Sɔɔlo vale ɔ ti minli ɛtaneyɛlɛ nu la, Nyamenle kpole ye na yeangakyi ye adwenle.​—1 Samoɛle 15:28, 29.

•   Nyamenle bali ɛwɔkɛ mɔɔ yebɔ kɛ ɔbamaa ɔ ra ne ayɛ ɛsɔfo dahuu la azo. Nyamenle ɛnrɛhakyi Ye adwenle.​—Edwɛndolɛ 110:4.

 Ɛhɛe, bɛhɛlɛ Nyamenle edwɛkɛ mɔɔ se: ‘Medame Gyihova, mengakyi ɛlɛ’ la wɔ Baebolo ne anu. (Malakae 3:6) Zɔhane ala a Baebolo ne ka kɛ Nyamenle ‘ɛngakyi anzɛɛ ɔnle kɛ ɛlawolɛ mɔɔ kakyihakyi la.’ (Gyemise 1:​17) Noko akee, edwɛkɛ ɛhye nee mɔɔ Baebolo ne ka kɛ Nyamenle kakyi ye adwenle la ɛngo ɛntia bɛ nwo. Saa Baebolo ne ka kɛ Nyamenle ɛngakyi a, ɔkile kɛ ye subane nee ye ngyinlazo ne mɔ mɔɔ gyi ɛlɔlɛ nee pɛlepɛlelilɛ zo la ɛngakyi. (Mɛla ne 32:4; 1 Dwɔn 4:8) Noko, ɔkola ɔfa adehilelɛ ngakyile ɔmaa menli wɔ mekɛ ngakyile nu. Kɛ neazo la, Nyamenle vale adehilelɛ ngakyile maanle Belemgbunli Devidi wɔ konle nwiɔ bie mɔɔ ɔhonle la anu, noko ɔlile konim wɔ ɔ mu nwiɔ anu.​—2 Samoɛle 5:​18-​25.

 Kyɛkyɛ, noko akee ɔyɛ ye nyane kɛ menli dɔɔnwo ɛkpo ye la. Baebolo ne ka kɛzi ɛnee tɛnlabelɛ ne de kolaa na Azuyilɛ ne ara la anwo edwɛkɛ kɛ: “Na ɔyɛle [Gyihova] nyane kɛ yebɔ sonla yedo azɛlɛ ye azo a. Ɔyɛle ye nyane somaa.” (Mɔlebɛbo 6:6) Wɔ Hibulu aneɛ nu, bɛvale edwɛkɛ “nyane” a bɛlile gyima a na ɛhye bahola ahile kɛ “ɛkakyi wɔ adwenle.” Nyamenle hakyile adwenle mɔɔ ɛnee ɔlɛ ye wɔ menli mɔɔ dɛnlanle aze kolaa na azuyilɛ ne ara la anu dɔɔnwo anwo ɔluakɛ ɛnee bɛyɛ amumuyɛ. (Mɔlebɛbo 6:​5, 11) Ɔwɔ nu kɛ ɔyɛle Nyamenle nyane kɛ bɛzile kpɔkɛ kɛ bɛbayɛ ɛtane la, noko yeangakyi adwenle mɔɔ ɔlɛ ye wɔ alesama abusua ne amuala anwo la. Nɔhalɛ nu, ɔluale Nowa nee ye abusua ne anwo zo ɔbɔle alesama anwo bane wɔ Azuyilɛ ne anu.​—Mɔlebɛbo 8:​21; 2 Pita 2:​5, 9.