Kyɛkyɛ, bɛnrɛzɛkye Azɛlɛ ne ɛlɛ, bɛnrɛyela ye yɛɛ bɛnrɛva fofolɛ bɛnrɛzie ɔ gyakɛ anu. Baebolo ne kilehile kɛ Nyamenle bɔle azɛlɛ ne kɛ yɛdɛnla zo dahuu.

•   “Tenlenema bava azɛlɛ ne ayɛ bɛ ɛdeɛ, na bɛadɛnla zolɛ dahuu.”​​—Edwɛndolɛ 37:29.

•   ‘Nyamenle wulale azɛlɛ ne adiabo, amaa bɛangola ye kpusu.’​​—Edwɛndolɛ 104:5.

•   “Azɛlɛ ne wɔ ɛkɛ ne dahuu.”​—Nolobɔvo ne 1:4, New World Translation.

•   ‘Yemɔ mɔɔ ɔhyehyɛle na ɔbɔle azɛlɛ ye la, . . . yeambɔ ye sesakaa biala yeanzie ɛkɛ; ɔbɔle, amaa sonla adɛnla zo.’​—Ayezaya 45:18.

 Nyamenle ɛnrɛmaa alesama ɛnrɛva evinli, konle anzɛɛ debie fofolɛ biala ɛnrɛzɛkye azɛlɛ ne. Emomu, ɔbazɛkye “bɛdabɛ mɔɔ bɛlɛsɛkye azɛlɛ ne la.” (Yekile 11:18) Kɛzi ɔbayɛ ɛhye ɛ?

 Nyamenle bava ye anwuma Belemgbunlililɛ mɔɔ ɔdi munli la yeazie alesama arane mɔɔ ɛngola ɛmbɔ azɛlɛ ne anwo bane la agyakɛ anu. (Daneɛle 2:​44; Mateyu 6:​9, 10) Nyamenle Ara, Gyisɛse Kelaese a bali zɔhane Belemgbunlililɛ ne azo belemgbunli a. (Ayezaya 9:6, 7) Mekɛ mɔɔ Gyisɛse wɔ azɛlɛ ye azo la, ɔnyianle tumi wɔ abɔdeɛ nwo zo. (Maake 4:35-41) Kɛ Nyamenle Belemgbunlililɛ ne azo Belemgbunli la, Gyisɛse banyia azɛlɛ ne nee debie biala mɔɔ wɔ zo la azo tumi. Ɔbayɛ ninyɛne mɔɔ wɔ azɛlɛ ne azo la fofolɛ yeamaa yeayɛ kɛ mɔɔ ɛnee wɔ Yidɛn tola ne anu la.​​—Mateyu 19:28; Luku 23:43.

 Kyɛkyɛ, ɔngilehile zɔ. Bɛka adalɛ edwɛkɛ ɛhye ɔlua edwɛkɛ mɔɔ wɔ 2 Pita 3:7, mɔɔ ɔka kɛ: “Bɛva anwuma nee azɛlɛ ne mɔɔ wɔ ɛkɛ ne la bɛzie ɛkɛ bɛmaa senle” mɔɔ bɛnde ɔ bo la ati. Suzu neazo nwiɔ mɔɔ anwo hyia mɔɔ boa yɛ maa yɛte edwɛkɛ zɔhane mɔ abo la anwo:

1.   Baebolo ne fa edwɛkɛ agbɔkɛ “anwuma,” “azɛlɛ,” nee “senle” ka ninyɛne dɔɔnwo anwo edwɛkɛ. Kɛ neazo la Mɔlebɛbo 11:1, New World Translation ne ka kɛ: “Ɛnee azɛlɛ ne amuala ka aneɛ ko.” Wɔ ɛke, “azɛlɛ” ne kile alesama abusua ne.

2.   Edwɛkɛ mɔɔ wɔ 2 Pita 3:7 la maa yɛnwu mɔɔ anwuma, azɛlɛ nee senle kile la. Ngyehyɛnu 5 nee 6 fa toto Nowa mekɛ zo Azuyilɛ ne anwo. Zɔhane mekɛ ne, bɛzɛkyele tete ewiade ne, noko yɛ azɛlɛ ne anzɛkye. Emomu, Azuyilɛ ne zɛkyele zɔhane amumuyɛ ewiade anzɛɛ “azɛlɛ” ne. (Mɔlebɛbo 6:11) Eza noko ɔzɛkyele “anwuma”​​—menli mɔɔ ɛnee sie azɛlɛ ne la. Ɔti, bɛzɛkyele amumuyɛma, na tɛ yɛ azɛlɛ ne ɔ. Nowa nee ye abusua ne nyianle ngoane wɔ zɔhane ewiade ne ɛzɛkyelɛ ne anu na bɛdɛnlanle azɛlɛ ne azo wɔ Azuyilɛ ne anzi.​—Mɔlebɛbo 8:15-18.

 Kɛ mɔɔ Azuyilɛ ne yɛle la, ɛzɛkyelɛ ne anzɛɛ “senle” ne mɔɔ wɔ 2 Pita 3:7 la baye amumuyɛma avi ɛkɛ na tɛ azɛlɛ ne mɔɔ yɛde zo la. Nyamenle ɛva “anwuma fofolɛ nee azɛlɛ fofolɛ” mɔɔ “tenleneyɛlɛ badɛnla” nu la ɛbɔ ɛwɔkɛ. (2 Pita 3:13) “Anwuma fofolɛ” anzɛɛ tumililɛ fofolɛ a banlea “azɛlɛ fofolɛ” anzɛɛ alesama abusua fofolɛ ne anwo zo wɔ Nyamenle Belemgbunlililɛ ne anu a. Wɔ zɔhane tumililɛ ne abo, anzodwolɛ bara azɛlɛ ye azo wɔ paladaese.​​—Yekile 21:1-4.