Baebolo ne ka kɛ Nyamenle kulo kɛ menli ‘twe bɛ nwo fi adwɔmane ɛbɛla nwo.’ (1 Tɛsalonaekama 4:3) Wɔ Baebolo ne anu, edwɛkɛ “adwɔmane ɛbɛla” kile agyalɛzɛkyelɛ, nrenyia nee nrenyia nla yɛɛ nrenyia nee raalɛ mɔɔ bɛtɛgyale la avinli nla.

•  Duzu ati a saa nrenyia nee raalɛ bagya anzɛɛ bɛnrɛgya a ɔhyia Nyamenle a?

•  Na saa nrenyia nee raalɛ de amaa bɛanwu ye saa bɛfɛta bɛ nwo wɔ mekɛ mɔɔ bɛtɛgyale la ɛ?

•  Kɛ ɔkɛyɛ na agyalɛma amaa bɛ agyalɛ ne anu amia ɛ?

•   Nyamenle a yɛle agyalɛ ngyehyɛleɛ ne a. Ɔyɛle ɛhye wɔ mekɛ mɔɔ ɔhanle agyalɛma mɔɔ limoa la ɔbɔle nu la. (Gyɛnɛsese 2:22-24) Ɛnee tɛ ye bodane a le kɛ nrenyia nee raalɛ badɛnla mɔɔ bɛnli nɔhalɛ bɛmmaa agyalɛ ngyehyɛleɛ ne a.

•   Nyamenle ze mɔɔ le kpalɛ maa alesama. Ɔhyehyɛle agyalɛ kɛ ɔha nrenyia nee raalɛ ɔbɔ nu dahuu amaa bɛaboa abusua ne na bɛabɔ bɛ nwo bane. Suzu ndonwo sikalɛ ɛhye anwo. Kɛ mɔɔ yɛtɔ debie a, yɛkenga kɛlata mɔɔ wɔ nwolɛ amaa yɛahola yɛahyehyɛ ye kpalɛ la, zɔhane ala a Nyamenle adehilelɛ maa yɛnwu kɛzi yɛbanyia abusua asetɛnla kpalɛ la a. Bɛdabɛ mɔɔ bɛdi Nyamenle ngyinlazo ne mɔ azo la nyia zolɛ nvasoɛ dahuu.​—Ayezaya 48:17, 18.

•   Nla nu ngitanwolilɛ mɔɔ kɔ zo wɔ menli mɔɔ bɛtɛgyale avinli la fa ngyegyelɛ mgbole ba. Kɛ neazo la, ɔkola ɔfa ɛnrenzɛlɛ mɔɔ bɛ nye ɛnla, nla nu ewule nee nganeɛdelɛ nu ngyegyelɛ ɔba. *

•   Nyamenle maanle mrenyia nee mraalɛ tumi mɔɔ maa bɛkola bɛdua nla zo bɛwo mralɛ. Nyamenle bu ngoane kɛ ɔle nwuanzanwuanza yɛɛ tumi mɔɔ maa yɛkola yɛwo la le ahyɛlɛdeɛ mɔɔ sonle bolɛ. Nyamenle kulo kɛ yɛbu zɔhane ahyɛlɛdeɛ ne ɔlua agyalɛ ngyehyɛleɛ ne mɔɔ yɛbali ye eni la azo.​—Hibuluma 13:4.

 Saa agyalɛ bayɛ kpalɛ a, ɔngyia kɛ menli nwiɔ ne bɔ nu tɛnla wɔ mekɛ bie anu wɔ mekɛ mɔɔ bɛnlɛ ɛhulolɛ kpole kɛ bɛbali nɔhalɛ bɛamaa bɛ nwo la. Emomu, agyalɛ yɛ kpalɛ wɔ mekɛ mɔɔ agyalɛma ne lɛ ɛhulolɛ kpole kɛ bɛbali nɔhalɛ bɛamaa bɛ nwo na bɛ mu nwiɔ bɛabɔ nu bɛali ngyegyelɛ nwo gyima la. * Agyalɛ maa ɛhulolɛ mɔɔ bɛlɛ kɛ bɛbali nɔhalɛ bɛamaa bɛ nwo la anu yɛ se.​—Mateyu 19:6.

 Agyalɛ biala ɛnle ɛkɛ mɔɔ di munli a. Noko akee, saa agyalɛma fa Baebolo nu folɛdulɛ yɛ gyima a, bɛ agyalɛ ne bahola ayɛ kpalɛ. Neazo bie mɔ ɛne:

•   Fa ɛ hu anzɛɛ ɛ ye ngyianlɛ dimoa wɔ ɛdeɛ nyunlu.​—1 Kɔlentema 7:3-5; Felepaema 2:3, 4.

•   Bɛnyia ɛlɔlɛ nee ɛbulɛ bɛmaa bɛ nwo.​—Ɛfɛsɛsema 5:25, 33.

•   Bɛdendɛ kɛnlɛma bɛhile bɛ nwo.​—Mrɛlɛbulɛ 12:18.

•   Bɛnyia abotane bɛmaa bɛ nwo na bɛva ɛtane bɛhyɛ ndɛndɛ.​—Kɔlɔsaema 3:13, 14.