Baebolo ne ɛnga funliyelalɛ nwo edwɛkɛ fɔɔnwo. Mɛla biala ɛnle Baebolo ne anu mɔɔ kile kɛ ɔwɔ kɛ bɛsie menli mɔɔ ɛwu la anzɛɛ bɛyela bɛ a.

 Baebolo ne ka Nyamenle nɔhalɛ azonvolɛ mɔɔ ziele bɛ alɔvolɛ la bie mɔ anwo edwɛkɛ. Kɛ neazo la, Ebileham bɔle mɔdenle kpondɛle ɛleka mɔɔ ɔbazie ɔ ye Sɛla la.​—Mɔlebɛbo 23:2-​20; 49:29-​32.

 Eza Baebolo ne ka nɔhavoma bie mɔ mɔɔ yelale bɛ alɔvolɛ mɔɔ ɛwu la anwo edwɛkɛ. Kɛ neazo la, mɔɔ bɛhunle Yizilayɛ Belemgbunli Sɔɔlo nee ɔ mra mrenyia nsa wɔ konle nu la, bɛ agbɔvolɛma vale bɛ avunli hɔle bɛ maanle nu na bɛyɛle bɛ basabasa. Mɔɔ Yizilayɛ sogyama mɔɔ di nɔhalɛ dele ɛhye anwo bie la, bɛhɔvale Sɔɔlo ne ɔ mra ne mɔ avunli ne bɛyelale bɛ na bɛziele bɛ nzonle ne. (1 Samoɛle 31:8-​13) Baebolo ne maa yɛnwu kɛ ɛhye le adenle kpalɛ mɔɔ bɛluale zo bɛvale menli zɔhane mɔ avunli bɛziele a.​—2 Samoɛle 2:​4-6.

 Adalɛ edwɛkɛ: Nyamenle ɛngola ɛndwazo menli mɔɔ bɛyelale bɛ avunli la.

 Nɔhalɛ edwɛkɛ: Mɔɔ fale ewudwazo ne anwo la, saa bɛziele ahenle o, bɛyelale ye o, ɔwule nyevile nu, fɛlɛ lile ye anzɛɛ nane kposale ye o, Nyamenle bahola adwazo ye. (Yekile 20:13) Tumivolɛ Bedevinli ne kola bɔ nwonane fofolɛ maa ahenle.​—1 Kɔlentema 15:35, 38.