Tɛ Nyamenle a maa esiane sisi ɛnɛ a, noko ɔdwenle menli mɔɔ esiane to bɛ la anwo. Esiane boka ninyɛne mɔɔ fa amaneɛnwunlɛ ba mɔɔ Nyamenle Belemgbunlililɛ ne baye avi ɛkɛ ne la anwo. Noko kɛkala, Nyamenle kyekye menli mɔɔ esiane to bɛ la arɛle.​—2 Kɔlentema 1:3.

•  Duzu ati a yɛkola yɛfa anwodozo yɛka kɛ esiane ɛnle anzohwenlɛ mɔɔ vi Nyamenle ɛkɛ a?

•  Asoo esiane mɔɔ ɛlɛsisi la le sɛkɛlɛneɛ mɔɔ kile kɛ yɛde awieleɛ mekɛ nu?

•  Kɛzi Nyamenle boa menli mɔɔ esiane to bɛ la ɛ?

•  Asoo Baebolo ngyinlazo bahola aboa yɛ amaa yɛaziezie yɛ nwo yɛamaa esiane?

•  Baebolo ngyehyɛnu mɔɔ kyekye menli mɔɔ esiane ɛdo bɛ arɛle la

 Kɛzi esiane sisi la nee kɛzi Nyamenle vale tumi mɔɔ wɔ abɔdeɛ nu lile gyima wɔ Baebolo ne anu la ɛnle ko.

•   Esiane kola ku awie biala yɛɛ ɔkola ɔboda awie biala. Noko, saa Nyamenle fa tumi mɔɔ wɔ abɔdeɛ nu la di gyima wɔ ndɛnebualɛ nu a, ɔfa ɔsɛkye ɛtanevolɛma angomekye. Kɛ neazo la, mekɛ mɔɔ Nyamenle sɛkye tete azuamgbole Sodɔm nee Gomɔla la, yeanzɛkye sonlakpalɛ Lɔɔto nee ɔ mra mraalɛ nwiɔ ne. (Mɔlebɛbo 19:29, 30) Nyamenle nleanle menli mɔɔ ɛnee wɔ ɛkɛ ne zɔhane mekɛ ne la ahonle nu na ɔzɛkyele bɛdabɛ mɔɔ ɔnwunle bɛ kɛ bɛle amumuyɛma la.​—Mɔlebɛbo 18:23-32; 1 Samoɛle 16:7.

•   Fane dɔɔnwo ne ala, saa esiane bazi a, bɛbɔ nwolɛ kɔkɔ ekyi bie anzɛɛ bɛmbɔ ye fee. Noko, Nyamenle bɔle amumuyɛma kɔkɔ kolaa na yeava tumi mɔɔ wɔ abɔdeɛ nu la yeazɛkye bɛ. Menli mɔɔ diele kɔkɔbɔlɛ ne mɔ la nyianle ngoane.​—Mɔlebɛbo 7:1-5; Mateyu 24:38, 39.

•   Wɔ adenle bie azo, alesama boka nwolɛ bie a esiane bie mɔ sisi a. Kɛzi? Ɔlua ninyɛne mɔɔ ɛbɔ yɛ ɛyia mɔɔ bɛsɛkye ye, yɛɛ azua mɔɔ bɛsisi wɔ ɛleka mɔɔ azɛlɛkpusulɛ nee azuyilɛ bahola azi la azo. Eza bɛsisi bie wɔ ɛleka mɔɔ maanle nu tɛnlabelɛ ne ɛnle kpalɛ la. (Yekile 11:18) Tɛ Nyamenle a maa alesama sisi kpɔkɛ ɛhye mɔ a, ɔti ɔnle kɛ yɛbɔ ye somolɛ.​—Mrɛlɛbulɛ 19:3.

 Ɛhɛe, Baebolo ne hanle dole ɛkɛ ne kɛ esiane basisi wɔ “mekɛ ɛhye awieleɛ ne” anzɛɛ “mekɛ mɔɔ li awieleɛ la” anu. (Mateyu 24:3; 2 Timote 3:1) Kɛ neazo la, Gyisɛse hanle mekɛ mɔɔ yɛwɔ nu la anwo edwɛkɛ kɛ: “Ɛhɔne nee azɛlɛkpusulɛ bara ɛleka dɔɔnwo.” (Mateyu 24:7) Ɔnrɛhyɛ, Nyamenle bamaa ninyɛne mɔɔ maa yɛte nyane na yɛnwu amaneɛ mɔɔ esiane boka nwo la ara awieleɛ.​—Yekile 21:3, 4.

•   Nyamenle dua ye Edwɛkɛ Baebolo ne azo kyekye menli mɔɔ esiane to bɛ la arɛle. Baebolo ne maa yɛnyia anwodozo kɛ Nyamenle dwenle yɛ nwo na saa yɛlɛnwu amaneɛ a ɔte yɛ nyanelilɛ bo. (Ayezaya 63:9; 1 Pita 5:6, 7) Eza ɔka ɛwɔkɛ mɔɔ yebɔ kɛ ɔbaye esiane yeavi ɛkɛ ne mekɛ bie la anwo edwɛkɛ.​—Nea “ Baebolo ngyehyɛnu mɔɔ kyekye bɛdabɛ mɔɔ esiane ɛdo bɛ arɛle la.”

•   Nyamenle dua ye azonvolɛ nwo zo boa menli mɔɔ esiane to bɛ la. Nyamenle maa ye azonvolɛ mɔɔ wɔ azɛlɛ ye azo la sukoa neazo mɔɔ Gyisɛse yɛle la. Bɛhanle bɛdole ɛkɛ ne kɛ Gyisɛse bakyekye “menli mɔɔ arɛle ɛbɔ la” nee “menli mɔɔ di nyane la” arɛle. (Ayezaya 61:1, 2) Nyamenle azonvolɛ noko bɔ mɔdenle yɛ zɔ.​—Dwɔn 13:15.

   Nyamenle eza dua ye azonvolɛ nwo zo fa nwonane afoa nu moalɛ maa menli mɔɔ esiane kɛdo bɛ la.​—Gyima ne 11:28-30; Galeehyeama 6:10.

 Ɛhɛe. Ɔwɔ nuhua kɛ bɛangɛlɛ Baebolo ne kɛ bɛfa bɛaziezie yɛ bɛamaa esiane ɛdeɛ, noko ɔlɛ ngyinlazo mɔɔ bahola aboa a. Kɛ neazo la:

•   Yɛ mɔɔ esiane si a ɛbayɛ la anwo ngyehyɛleɛ. Baebolo ne ka kɛ, “Sonla mɔɔ anye gyi ɔ ti anwo la nwu munzule na ɔtwe ɔ nwo ɔfea.” (Mrɛlɛbulɛ 22:3) Nrɛlɛbɛ wɔ nu kɛ yɛbalimoa yɛayɛ mɔɔ esiane si a yɛbayɛ la anwo ngyehyɛleɛ. Ngyehyɛleɛ ɛhye mɔ bie a le kɛ ɛbaboɔboa ninyɛne mɔɔ saa esiane si a ɛbava wɔabɔ ɛ nwo bane la anloa na ɛ nee wɔ abusua ne ɛzuzu ɛleka mɔɔ esiane si a bɛbayia la anwo.

•   Bu ngoane tɛla anwonyia. Baebolo ne ka kɛ: “Yɛanva ɛhwee yɛamba ewiade, yɛɛ yɛnrɛva ɛhwee yɛnrɛvi nu yɛnrɛhɔ.” (1 Timote 6:7, 8) Ɔwɔ kɛ yɛnyia ɛhulolɛ kɛ yɛbagyakyi yɛ azua nee yɛ anwonyia ɛkɛ amaa yɛahola yɛanyia ngoane wɔ esiane mekɛ nu. Ɔwɔ kɛ yɛkakye kɛ yɛ ngoane sonle bolɛ kpole kpalɛ tɛlɛ nwonane afoa nu debie biala.​—Mateyu 6:25.