Kyɛkyɛ. Baebolo ne ɛnga kɛ ezukoa le ɛtane yɛɛ ɔnga kɛ ezukoa le ɛtane kɔsɔɔti ndinli. “Ezukoa le ɛtane kɔsɔɔti ndinli” mɔɔ menli ta ka la nee mɔɔ Baebolo ne ka la ɛnle ko. Mɔɔ Baebolo ne ka la a le kɛ “ezukoa nwo anyebolo le ɛtane kɔsɔɔti ndinli.”​—1 Timote 6:10.

•  Duzu a Baebolo ne ka ye wɔ ezukoa nwo a?

•  Duzu ati a Baebolo ne bɔ yɛ kɔkɔ wɔ ezukoa nwo anyebolo nwo a?

•  Kɛ ɔkɛyɛ na yɛanyia ezukoa nwo folɛdulɛ mɔɔ wɔ Baebolo ne anu la azo nvasoɛ ɛ?

•  Baebolo tɛkese ngakyile mɔɔ ka ezukoa nwo edwɛkɛ la

 Baebolo ne die to nu kɛ saa yɛfa ezukoa yɛdi gyima nrɛlɛbɛ nu a, ɔboa yɛ yɛɛ ɔbɔ yɛ “nwo bane” bɔbɔ. (Nolobɔvo 7:12) Bieko, Baebolo ne kanvo menli mɔɔ bie a bɛfa ezukoa bɛkyɛ awie mɔ bɛfa bɛda atiakunlukɛnlɛma ali la.​—Mrɛlɛbulɛ 11:25.

 Mekɛ ko ne ala, Baebolo ne bɔ yɛ kɔkɔ wɔ yɛ adwenle mɔɔ yɛfa yɛazie ezukoa zo la anwo. Ɔka kɛ: “Bɛmmamaa ezukoa nwo anyebolo ba bɛ ɛbɛlabɔlɛ nu, na bɛmaa bɛ kunlu ɛdwo mɔɔ bɛlɛ ye la anwo.” (Hibuluma 13:5) Ɛzukoalɛdeɛ ne a le kɛ, ɔwɔ kɛ yɛnyia ezukoa nwo adwenle kpalɛ na ɔnle kɛ yɛkpondɛ anwonyia. Emomu, ɔwɔ kɛ yɛfa yɛyɛ yɛ bodane kɛ yɛbakpondɛ ninyɛne mɔɔ yɛhyia nwo kpalɛ la, le kɛ aleɛ, adɛladeɛ nee dabelɛ.​—1 Timote 6:8.

 Menli mɔɔ le anyebolo la ɛnrɛnyia dahuu ngoane. (Ɛfɛsɛsema 5:5) Wɔ adenle bie azo, anyebolo le awozonle ɛzonlenlɛ anzɛɛ adalɛ ɛzonlenlɛ. (Kɔlɔsaema 3:5) Bieko, fane dɔɔnwo ne ala, anyeboloma kpo ngyinlazo kpalɛ ɔlua mɔdenle mɔɔ bɛbɔ kɛ bɛbanyia mɔɔ bɛkpondɛ la ati. Mrɛlɛbulɛ tile 28:20 ka kɛ, ‘Bɛdabɛ mɔɔ bɛpele kɛ bɛkɛnyia bɛ nwo ndɛndɛ la ɛnrɛva bɛ nwo ɛnrɛli.’ Bie bɔbɔ a, bɛbava bɛ nwo bɛawula ɛtanelilɛ le kɛ apobɔlɛ, mɛlɛbɛla, menli ɛhyelɛ anzɛɛ sonla ɛhunlɛ nu.

 Saa ezukoa nwo anyebolo ammaa awie ambɔ ɛbɛlatane bɔbɔ a, ɔbahola yeamaa yeayia ngyegyelɛ gyɛne. Baebolo ne ka kɛ ‘menli mɔɔ anye ɛbolo kɛ bɛkɛnyia bɛ nwo la tɔ sɔnea nee ɛhane yɛɛ ngoasea nee munzule atiakunluwɔzo nu.’​—1 Timote 6:9.

 Saa yɛanli ezukoa nzi yɛanyɛ ninyɛne mɔɔ yɛze kɛ ɔle ɛtane na ɔnzɔ Nyamenle anye la a, yɛbanyia ɛbulɛ yɛamaa yɛ nwo, Nyamenle bɛalie yɛ ado nu na yeaboa yɛ. Nyamenle ɛbɔ menli mɔɔ bɔ mɔdenle fi ahonle nu yɛ mɔɔ sɔ ɔ nye la ɛwɔkɛ kɛ: ‘Menrɛgyakyi bɛ ɛlɛ, yɛɛ menrɛkpo bɛ ɛlɛ.’ (Hibuluma 13:5, 6) Eza yemaa yɛnyia anwodozo kɛ “sonla mɔɔ di nɔhalɛ la banyia nyilalɛ dɔɔnwo.”​—Mrɛlɛbulɛ 28:20.