Edwɛkɛ “Gyɛlusalɛm Fofolɛ ne” finde fane nwiɔ wɔ Baebolo ne anu, ɔle sɛkɛlɛneɛ adenle zo suakpole mɔɔ gyi ɛkɛ maa Gyisɛse ɛdoavolɛma bie mɔ mɔɔ bɛ nee ye bali tumi wɔ anwuma wɔ Nyamenle Belemgbunlililɛ ne anu la. (Yekile 3:12; 21:2) Baebolo ne kile kɛ bɛkola bɛfɛlɛ ekpunli ɛhye Kelaese atɔfolɛ ne.

1.   Gyɛlusalɛm Fofolɛ ne wɔ anwuma. Baebolo ne ka Gyɛlusalɛm Fofolɛ ne anwo edwɛkɛ biala a, ɔka kɛ ɔvi anwuma, ɛleka mɔɔ anwumabɔvolɛma sinza suakpole ne nlenkɛ ne mɔ la ɔlɛdwu aze. (Yekile 3:12; 21:2, 10, 12) Eza kɛzi suakpole ne le kpole kpalɛ la kile kɛ ɔnle azɛlɛ ye azo. Ɔle sua mɔɔ ye tendenle, ye tɛtɛlɛ nee ye anwumahɔlɛ sɛ, biala le kɛyɛ “kilomita 2,220.” (Yekile 21:16) Ɔti sua ne bane ne mɔ anwumahɔlɛ bayɛ kɛyɛ kilomita 560 (mayɛlɛ 350).

2.   Gyisɛse ɛdoavolɛma mɔɔ le Kelaese atɔfolɛ raalɛ ne a ka bɔ nu yɛ Gyɛlusalɛm Fofolɛ ne a. Bɛfɛlɛ Gyɛlusalɛm Fofolɛ ne “atɔfolɛ ne, Boaneralɛ ne aye ne.” (Yekile 21:9, 10) Boaneralɛ ne gyi ɛkɛ ne maa Gyisɛse Kelaese wɔ sɛkɛlɛneɛ adenle zo. (Dwɔn 1:29; Yekile 5:12) “Boaneralɛ ne aye ne,” Kelaese atɔfolɛ ne gyi ɛkɛ maa Kilisienema mɔɔ nee Gyisɛse badɛnla anwuma la. Baebolo ne fa agɔnwolɛvalɛ mɔɔ wɔ Gyisɛse nee Kilisienema ɛhye mɔ avinli la toto kɛzi nrenyia nee ɔ ye ɛdeɛ ne de la anwo. (2 Kɔlentema 11:2; Ɛfɛsɛsema 5:23-25) Bieko, “bɛhɛlɛ aluma 12 mɔɔ le Boaneralɛ ne ɛzoanvolɛma 12 ne aluma” wɔ Gyɛlusalɛm Fofolɛ ne adiabo awolɛ ne anwo. (Yekile 21:14) Edwɛkɛ ɛhye boa maa yɛnwu Gyɛlusalɛm Fofolɛ ne, ɔluakɛ bɛzi Kilisienema mɔɔ bahɔ anwuma la “bɛzie adiabo ne mɔɔ ɛzoanvolɛma nee ngapezoma ne mɔ wulale la azo.”​—Ɛfɛsɛsema 2:20.

3.   Gyɛlusalɛm Fofolɛ ne boka tumililɛ bie anwo. Ɛnee tete Gyɛlusalɛm le Yizilayɛ suakpole, ɛkɛ ne a Belemgbunli Devidi, ɔ ra Sɔlɔmɔn nee bɛ bo zo amra lile tumi wɔ Gyihova “belemgbunli ebia” zo a. (1 Edwɛkɛsisilɛ 29:23) Gyɛlusalɛm mɔɔ ɛnee bɛfɛlɛ ye “suakpole nwuanzanwuanza” la gyi ɛkɛ maa Nyamenle tumililɛ mɔɔ Devidi sua nu amra di zolɛ belemgbunli la. (Nihɛmaya 11:1) Bɛfɛlɛ Gyɛlusalɛm fofolɛ ne noko “suakpole nwuanzanwuanza,” na bɛdabɛ mɔɔ bɛ nee Gyisɛse bayɛ “arelemgbunli na bɛanlea azɛlɛ ye azo” la a wɔ nu a.​​—Yekile 5:​9, 10; 21:2.

4.   Gyɛlusalɛm Fofolɛ ne bamaa menli mɔɔ de azɛlɛ ye azo la anyia nyilalɛ. Bɛha Gyɛlusalɛm Fofolɛ ne anwo edwɛkɛ kɛ “ɔvi Nyamenle anwo lɔ wɔ anwuma ɔlɛdwu aze,” na ɔkile kɛ Nyamenle balua zo yeamaa ninyɛne ayɛ boɛ wɔ azɛlɛ ye azo. (Yekile 21:2) Edwɛkɛ ɛhye fa Gyɛlusalɛm fofolɛ ne toto Nyamenle Belemgbunlililɛ ne mɔɔ Nyamenle balua zo yeamaa ye ɛhulolɛdeɛ ‘ayɛ ɛkɛ wɔ azɛlɛ ye azo kɛ anwuma la’ anwo. (Mateyu 6:​10) Nyilalɛ ɛhye mɔ boka bodane mɔɔ Nyamenle lɛ maa alesama la anwo:

   •   Ɛtane bavi ɛkɛ. “Nzule ne mɔɔ maa ngoane” mɔɔ fi Gyɛlusalɛm Fofolɛ ne anu ba la boa “ngoane mbaka” ne mɔ mɔɔ “bɛfa bɛyɛ maanle maanle ne mɔ ayile” la. (Yekile 22:​1, 2) Nwonane nee sunsum nu ayileyɛlɛ ɛhye baye ɛtane avi ɛkɛ na yeamaa alesama ali munli kɛ mɔɔ ɛnee Nyamenle kpondɛ la.​​—Wulomuma 8:21.

   •   Nyamenle nee alesama banyia agɔnwolɛvalɛ kpalɛ. Ɛtane ɛmaa alesama nee Nyamenle avinli ɛde. (Ayezaya 59:2) Ɛtane mɔɔ bɛbaye bɛavi ɛkɛ ne bɔkɔɔ la bamaa ngapezo ɛhye ara nu kɛ: “Nyamenle ɛdanlɛsua ne wɔ alesama avinli, na ɔ nee bɛ badɛnla na bɛayɛ ye menli. Na Nyamenle mumua ne nee bɛ badɛnla.”​​—Yekile 21:3.

   •   Nyane nee amaneɛnwunlɛ bavi ɛkɛ. Nyamenle balua ye Belemgbunlililɛ ne azo yeakyikyi “bɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko.”​—Yekile 21:4.