Duzu A Le Kelaese Ɛralɛ Ne?

BƆ

Baebolo ne bua kɛ

Ngɛlɛlera ne ka Kelaese mɔɔ bara kenle bie yearabua menli mɔɔ wɔ azɛlɛ ye azo ndɛne la anwo edwɛkɛ dɔɔnwo. * Kɛ neazo la, Mateyu 25:31-33 ka kɛ:

“Saa sonla Ra ne [Gyisɛse Kelaese] ba wɔ ye anyunlunyia nu mɔɔ ye anwumabɔvolɛma kɔsɔɔti boka ɔ nwo la a, ɔbadɛnla aze wɔ ye anyunlunyia belemgbunli ebia ne azo. Bɛbaboɔboa maanle maanle ne amuala anloa wɔ ɔ nyunlu, na ɔbahyɛ menli ne anu nwiɔ kɛ mɔɔ mboaneneavolɛ ye mboane fi mbɔnkye nu la. Na ɔbava mboane ne yeagua ɔ sa fema zo na yeava mbɔnkye ne yeagua ye bɛne zo.”

Ndɛnebualɛ ɛhye boka “anwongyelelɛ kpole” ne mɔɔ sumunli kɛ ewiade bɔle ɔ bo badwu ɛnɛ bie ɛtɛsile ɛlɛ la anwo. Anwongyelelɛ ɛhye bahɔwie wɔ Amagɛdɔn konle ne anu. (Mateyu 24:21; Yekile 16:16) “Bɛbava dahuu ɛzɛkyelɛ bɛahwe” Kelaese agbɔvolɛ mɔɔ bɛha bɛ nwo edwɛkɛ wɔ mbɔnkye ɛrɛlɛ ne anu la anzo. (2 Tɛsalonaekama 1:9; Yekile 19:11, 15) Mɔɔ nee ɛhye le ngakyile la, ye nɔhalɛ azonvolɛ mɔɔ bɛle mboane ne la banyia “dahuu ngoane” nwo anyelazo.—Mateyu 25:46.

Mekɛ boni a Kelaese bara a?

Gyisɛse hanle kɛ: “Mɔɔ fale kenle zɔhane nee dɔnehwele ne anwo la ɛdeɛ, awie biala ɛnze.” (Mateyu 24:36, 42; 25:13) Noko akee, ɔhanle “sɛkɛlɛneɛ” mɔɔ bala ali yeamaa bɛanwu ye kɛ ye ɛralɛ ne ɛdwu la anwo edwɛkɛ.—Mateyu 24:3, 7-14; Luku 21:10, 11, 11.

Asoo Kelaese bara wɔ sunsum nu anzɛɛ nwonane nu?

Bɛdwazole Gyisɛse la ɔnyianle sunsum nu sonlabaka, yemɔti ɔbara kɛ sunsum nu abɔdeɛ na tɛ nwonane nu ɔ. (1 Kɔlentema 15:45; 1 Pita 3:18) Ɔlua ɛhye ati, kenle mɔɔ aleɛ kye a Gyisɛse bawu la ɔhanle ɔhilele ye ɛzoanvolɛma ne kɛ: “Yeha mekɛ ekyi bie, ewiade ne ɛnrɛnwu me bieko.”—Dwɔn 14:19.

Kelaese ɛralɛ ne anwo adalɛ edwɛkɛ mɔɔ ɛlie duma

Adalɛ edwɛkɛ: Saa Baebolo ne ka kɛ menli banwu Gyisɛse kɛ ‘ɔlua anwuma amungu nu ɔlɛba’ a, ɔkile kɛ bɛbava bɛ nye banwu Gyisɛse ɛralɛ ne.—Mateyu 24:30.

Nɔhalɛ edwɛkɛ: Baebolo ne ta fa amungu ka debie mɔɔ yɛ nye ɛnnwu ye la anwo edwɛkɛ. (Sɛlɛvolɛma 16:2; Ɛdianlɛ 11:25; Mɛla ne 33:26) Kɛ neazo la, Nyamenle hanle hilele Mosisi kɛ: “Nea, mebalua amungu kumɔɔnwo bie anu meara.” (Adendulɛ 19:9) Mosisi anva ɔ nye annwu Nyamenle. Zɔhane ala a, Kelaese mɔɔ ‘balua anwuma amungu nu ara’ la kile kɛ menli balie ado nu kɛ yera ɔnva nwo kɛ bɛnrɛva bɛ nye bɛnrɛnwu ye la.

Adalɛ edwɛkɛ: Ɔwɔ kɛ yɛfa edwɛkɛ “ɛnyelɛ muala banwu ye” mɔɔ fale Kelaese ɛralɛ ne anwo mɔɔ wɔ Yekile 7:1 la zɔhane ala.

Nɔhalɛ edwɛkɛ: Ɔyɛ a bɛfa Giliki edwɛkɛkpɔkɛ “ɛnyelɛ” nee “ɛnwunlɛ” bɛdi gyima wɔ Baebolo ne anu bɛkile debie mɔɔ awie ɛlie ɛdo nu la emomu ɔngile debie mɔɔ bɛfa bɛ nye banwu ye. * (Mateyu 13:15; Luku 19:42; Wulomuma 15:21; Ɛfɛsɛsema 1:18) Baebolo ne ka kɛ Gyisɛse mɔɔ bɛdwazo ye la a le “mɔɔ ɔ ngome . . . ɔde wienyi mɔɔ bɛngola bɛmbikye ye . . . mɔɔ awie biala ɛngola ɛnnwu ye la.” (1 Timote 6:16) Yemɔti “ɛnyelɛ muala banwu ye” ɔluakɛ menli balie ado nu kɛ Gyisɛse a le awie mɔɔ Nyamenle balua ɔ nwo zo abua ndɛne a.—Mateyu 24:30.

Adalɛ edwɛkɛ: Edwɛkɛ mɔɔ wɔ 2 Dwɔn 7 la kile kɛ Gyisɛse bara wɔ nwonane nu.

Nɔhalɛ edwɛkɛ: Baebolo ngyɛnu ne ka kɛ: “Mɛlɛbɛlama dɔɔnwo ɛra ewiade, bɛdabɛ mɔɔ bɛnga ye bagua nu kɛ Gyisɛse Kelaese rale nwonane nu la.”

Wɔ ɛzoanvolɛ Dwɔn mekɛ zo, bie mɔɔ anlie ali kɛ Gyisɛse rale azɛlɛ ye azo kɛ sonla la. Ɛnee bɛfɛlɛ bɛ Nrɛlɛbɛvolɛma mɔɔ die ninyɛne ngakyile di. Bɛhɛlɛle 2 Dwɔn 7 kɛ bɛfa bɛbɔ bɛ adalɛ edwɛkɛ ne bɛagua.

^ Ɔwɔ nuhua kɛ menli dɔɔnwo fa edwɛkɛ “ɛralɛ bieko” kile Kelaese ɛralɛ ne ɛdeɛ, noko edwɛkɛ ɛhye ɛnle Baebolo ne anu.

^ Nea The New Thayer’s Greek-English Lexicon of the New Testament (1981), mukelɛ 451 nee 470.