Bɛta bɛfɛlɛ Gyisɛse “Nyamenle Ara” wɔ Baebolo ne anu. (Dwɔn 1:49) Edwɛkɛ “Nyamenle Ara” maa yɛnwu kɛ Nyamenle a le Bɔvolɛ ne a anzɛɛ ngoane biala mɔɔ Gyisɛse ɛdeɛ ne boka nwo la Ɛvileka a. (Edwɛndolɛ 36:9; Yekile 4:11) Baebolo ne ɛngile kɛ Nyamenle wole kakula kɛ mɔɔ alesama yɛ la.

 Wɔ Baebolo ne anu, eza bɛfɛlɛ anwumabɔvolɛma “nɔhalɛ Nyamenle ne amra.” (Dwobu 1:6, NW) Baebolo ne ka kɛ, ɛnee Adam, sonla mɔɔ limoa, le “Nyamenle ara.” (Luku 3:38) Noko, kɛmɔ ɛnee Gyisɛse le Nyamenle abɔdeɛ mɔɔ limoa, mɔɔ Nyamenle mumua ne a bɔle ye la ati, Baebolo ne ka Gyisɛse anwo edwɛkɛ kɛ ɔle Nyamenle belamunli Ralɛ.

•  Ɛnee Gyisɛse wɔ anwuma kolaa na bɛawo ye wɔ azɛlɛ ye azo ɔ?

•  Duzu a Gyisɛse yɛle kolaa na yeara azɛlɛ ye azo a?

 Ɛhɛe. Ɛnee Gyisɛse le sunsum nu abɔdeɛ wɔ anwuma kolaa na bɛawo ye kɛ sonla wɔ azɛlɛ ye azo. Gyisɛse mumua ne hanle ɔ nwo edwɛkɛ kɛ: “Mevi anwuma mera.”​—Dwɔn 6:38; 8:23.

 Nyamenle bɔle Gyisɛse kolaa na yeabɔ debie gyɛne biala. Baebolo ne ka Gyisɛse anwo edwɛkɛ kɛ:

•   “Yemɔ a ɔle Nyamenle . . . abɔdeɛ muala anu belamunli ralɛ a.”​—Kɔlɔsaema 1:15.

•   Yemɔ a ɔle “Nyamenle abɔdeɛ mɔlebɛbo” a.​—Yekile 3:14.

 Gyisɛse maanle ngapezo mɔɔ fale ahenle mɔɔ “ye abusua ɛlɔnwɔne ne abo vi tete” anwo la rale nu.​—Maeka 5:2; Mateyu 2:4-6.

 Ɛnee ɔlɛ gyinlabelɛ kpole wɔ anwuma. Gyisɛse hanle gyinlabelɛ ɛhye mɔɔ ɛnee ɔlɛ la anwo edwɛkɛ wɔ ye asɔneyɛlɛ nu: “Egya, akee fa anyunlunyia ne mɔɔ ɛnee melɛ ye wɔ ɛ nwo lɔ kolaa na wɔabɔ ewiade ye la wula me anyunlunyia.”​—Dwɔn 17:5.

 Ɔboale ɔ Ze ɔmaanle ɔbɔle ninyɛne mɔɔ ɛha la. Gyisɛse nee Nyamenle bɔle nu yɛle gyima kɛ “gyimayɛvo mɔɔ ɛbe.” (Mrɛlɛbulɛ 8:30, NW) Baebolo ne ka Gyisɛse anwo edwɛkɛ kɛ: “Bɛluale ɔ nwo zo a bɛbɔle debie biala mɔɔ wɔ anwuma nee azɛlɛ ye azo a.”​—Kɔlɔsaema 1:16.

 Nyamenle luale Gyisɛse anwo zo maanle abɔdeɛ mɔɔ ɛha la rale. Sunsum nu abɔdeɛ mɔɔ ɛha yɛɛ anwuma nee aze boka nwo. (Yekile 5:11) Yɛbahola yɛava kɛzi Nyamenle nee Gyisɛse bɔle nu yɛle gyima la yɛatoto awie mɔɔ yɛ sua pelane nee suasivolɛ mɔɔ bɛlɛbɔ nu bɛayɛ gyima la anwo. Ahenle mɔɔ yɛ pelane ne la dɔlɔ sua ne, na suasivolɛ ne anlea zo azi.

 Ɛnee ɔle Edwɛkɛ ne. Wɔ Baebolo ne anu, kolaa na Gyisɛse ara azɛlɛ ye azo la, ɛnee bɛfɛlɛ ye “Edwɛkɛ ne.” (Dwɔn 1:1) Nɔhalɛ nu, ɛhye kile kɛ Nyamenle luale ɔ Ra ne anwo zo vale adehilelɛ maanle sunsum nu abɔdeɛ mɔɔ ɛha la.

 Eza ɔbayɛ kɛ Gyisɛse yɛle kpɔmavolɛ maanle Nyamenle wɔ mekɛ mɔɔ ɔwɔ azɛlɛ ye azo la. Ɔbayɛ kɛ Nyamenle luale Edwɛkɛ ne, mɔɔ le Gyisɛse anwo zo vale adehilelɛ maanle Adam nee Yive wɔ Yidɛn tola ne anu. (Mɔlebɛbo 2:16, 17) Ɔbayɛ kɛ Gyisɛse a le anwumabɔvolɛ ne mɔɔ hilele tete Yizilayɛma adenle wɔ fienemgbole ne anu mɔɔ ɛnee ɔwɔ kɛ Yizilayɛma tie ye kpalɛ la.​—Adendulɛ 23:20-23. *