Ɔle nɔhalɛ kɛ Baebolo ne ɛnga kyakyadolɛ nwo edwɛkɛ dɔɔnwo ɛdeɛ, noko Baebolo nu ngyinlazo bie mɔ maa yɛnwu kɛ Nyamenle bu kyakyadolɛ kɛ ɔle ɛtane.​—Ɛfɛsɛsema 5:​17. *

•   Anyebolo a maa bɛto kyakya a na Nyamenle kyi. (1 Kɔlentema 6:9, 10; Ɛfɛsɛsema 5:3, 5) Menli mɔɔ to kyakya la anye la kɛ bɛbanyia ezukoa dɔɔnwo bɛavi menli mɔɔ anli la ɛkɛ, noko Baebolo ne tendɛ tia menli mɔɔ bɛ nye bolo awie mɔ ninyɛne la.​—Adendulɛ 20:17; Wulomuma 7:7; 13:​9, 10.

•   Ɛto kyakya ngyikyi bɔbɔ a, ɔbamaa wɔanyia zukoa nwo anyebolo mɔɔ fa munzule ba la.​—1 Temɔte 6:9, 10.

•   Menli mɔɔ to kyakya la fa bɛ nwo to diedi mgbane anzɛɛ saleɛ nwo zo. Noko akee, Nyamenle bu diedi ɛhye kɛ ɔle awozonle ɛzonlenlɛ, na ɔnlie ɔndo nu wɔ ye ɛzonlenlɛ nu.​—Ayezaya 65:11.

•   Kɛ anrɛɛ yɛbanyia ɛhulolɛ yɛamaa debie mɔɔ yɛanvɛ nwolɛ la, Baebolo ne tu yɛ folɛ kɛ yɛyɛ gyima ɛsesebɛ. (Nolobɔvo ne 2:24; Ɛfɛsɛsema 4:28) Menli mɔɔ di mɔɔ Baebolo ne ka la azo la, “Di aleɛ mɔɔ bɛyɛ nwolɛ gyima la.”​—2 Tɛsalonaekama 3:10, 12.

•   Kyakyadolɛ bahola amaa yɛanyia ɛzulɛ sunsum mɔɔ Baebolo ne ɛnlie ɛndo nu la.​—Galeehyeama 5:​26.