‘Ngoane buluku’ ne mɔɔ eza bɛfɛlɛ ye “teasema buluku” anzɛɛ “ngakyelɛ buluku” ne la a le buluku ne mɔɔ menli mɔɔ bɛbanyia dahuu ngoane ahyɛlɛdeɛ ne la aluma wɔ nu la. (Yekile 3:5; 20:12; Malakae 3:16) Saa Nyamenle bahɛlɛ awie duma a, ɔgyi tieyɛ mɔɔ ɔbayɛ yeamaa ye la azo.​—Dwɔn 3:16; 1 Dwɔn 5:3.

 Nyamenle kakye ye nɔhalɛ azonvolɛ ko biala duma na ɔle kɛ asɛɛ yehɛlɛ ye wɔ buluku nu ‘ɔvi mekɛ mɔɔ bɛbɔle ewiade la.’ (Yekile 17:8) Yɛbaha kɛ Ebɛle mɔɔ ɛnee le nɔhavo la a le awie mɔ limoa mɔɔ bɛhɛlɛle ye duma wɔ ngoane buluku ne anu a. (Hibuluma 11:4) Ɛhye ɛnle aluma mɔɔ bɛhɛlɛ ala, emomu ngoane buluku ne maa yɛnwu kɛ Gyihova le ɛlɔlɛ Nyamenle mɔɔ “ze bɛdabɛ mɔɔ bɛle ye ɛdeɛ la.”​—2 Temɔte 2:19; 1 Dwɔn 4:8.

Bɛkola bɛkyikyi aluma bɛfi ‘ngoane buluku’ ne anu ɔ?

 Ɛhɛe. Nyamenle hanle hilele tete Yizilayɛ anzosesebɛma kɛ: “Ahenle ne mɔɔ ɛyɛ ɛtane ɛtia me la, yemɔ yɛɛ mebaye ye duma meavi buluku ne anu a.” (Adendulɛ 32:33) Noko saa yɛdi nɔhalɛ a, yɛ duma baha “teasema buluku” ne anu.​—Yekile 20:12.