Ngyekyeleɛ ɛlɛka ne le ɛlɛka nwuanzanwuanza mɔɔ Nyamenle maanle Yizilayɛma adehilelɛ ɔmaanle bɛyɛle a. Nuhua a ɛnee “awolɛ ndɛbandɛba nwiɔ ne” mɔɔ bɛhɛlɛ Mɛla Bulu ne wɔ zo la gua a.​—Adendulɛ 25:​8-​10, 16; 31:18.

•   Kɛzi bɛyɛle ye la. Ɛlɛka ne tendenle le mita ko nee ekyi, ye tɛtɛlɛ le mita foa ko nee ekyi, yɛɛ ye anwumahɔlɛ ɔdaye noko ɔle mita foa ko nee ekyi (111 x 67 x 67 cm; 44 x 26 x 26 in.). Bɛvale akasea baka a bɛbobɔle a, yɛɛ bɛholole nvutuke bɛguale ɔ kunlu nee ɔ nzi, eza bɛvale bie bɛlile adwinli bɛbɛnrale ɔ nloa bɛyiale. Kyɛlɔbem nwiɔ mɔɔ bɛva nvutuke bɛyɛle na bɛ nye bɔ zo la wɔ ɛlɛka ne mɔɔ bɛvale nvutuke a bɛyɛle la ati nee ɔ ti. Bɛ mu nwiɔ bɛ nye gyi ɛlɛka ne ati ne anwo yɛɛ bɛdɛlɛdɛlɛ bɛ ndɛba ne mɔ anu bɛmaa yeheda tile ne azo. Ɛlɛka ne lɛ ngɛba nna mɔɔ bɛvale nvutuke bɛyɛle la wɔ ɔ gyakɛ ne anwuma. Bɛva akasea mbaka nwiɔ mɔɔ nvutuke fɔle nwo la bɛwula ngɛba ne mɔ anu na yemɔ a bɛfa bɛsoa Ɛlɛka ne a.​—Adendulɛ 25:10-​21; 37:​6-9.

•   Ɛleka mɔɔ ɛnee ɔgyi. Mɔlebɛbo ne, ɛnee Ɛlɛka ne gyi Nwuanzanwuanza Nu Nwuanzaanwu Ɛleka ne wɔ ndanlɛsua ne anu. Ɛhye le ɛdanlɛsua mɔɔ bɛsonle Nyamenle wɔ nu a na bɛyɛle ye mekɛ ko ne ala mɔɔ bɛyɛle Ɛlɛka ne la. Ɛnee ɛsɔfoma ne nee menli ne ɛnnwu Nwuanzanwuanza Nu Nwuanzaanwu Ɛleka ne. (Adendulɛ 40:​3, 21) Ɛnee ɛsɔfo kpanyinli ne ala a kola kɔ ɛkɛ ne kokye ɛvolɛ biala wɔ Mgbɔdalɛ Kenle ne na ɔnwu Ɛlɛka ne a. (Sɛlɛvolɛma 16:2; Hibuluma 9:7)Nzinlii, bɛvale Ɛlɛka ne bɛziele Sɔlɔmɔn ɛzonlenlɛ sua ne Nwuanzanwuanza Nu Nwuanzaanwu Ɛleka ne.​—1 Arelemgbunli 6:14, 19.

•   Deɛmɔti bɛyɛle la. Ɛnee bɛfa ninyɛne mɔɔ le nwuanzanwuanza mɔɔ bahakye Yizilayɛma kɛ Nyamenle nee bɛ ɛyɛ ngyekyeleɛ wɔ Boka Saenae ne azo la bɛsie Ɛlɛka ne anu. Ɛnee eza nwolɛ hyia kpalɛ wɔ Mgbɔdalɛ Kenle ne.​—Sɛlɛvolɛma 16:​3, 13-17.

•   Ninyɛne mɔɔ ɛnee wɔ nu. Awolɛ ndɛbandɛba ne mɔɔ bɛhɛlɛ Mɛla Bulu ne wɔ zo la a bɛlimoale bɛvale bɛguale Ɛlɛka ne anu a. (Adendulɛ 40:20) Nzinlii bɛvale nvutuke kanrɛlɛ ne mɔɔ mana wɔ nu nee “Aalɔn kpɔma ne mɔɔ kpakyele nya” la bɛbokale nwo. (Hibuluma 9:4; Adendulɛ 16:33, 34; Ɛdianlɛ 17:10) Ɔbayɛ kɛ nzinlii bɛyele kanrɛlɛ ne nee kpɔma ne bɛvile nu, ɔluakɛ mɔɔ bɛvale Ɛlɛka ne bɛhɔle ɛzonlenlɛ sua ne anu la ɛnee bɛnle nu.​—1 Arelemgbunli 8:9.

•   Kɛzi bɛsoa ye la. Ɛnee Livaema ne fa akasea mbaka ne sosɔ Ɛlɛka ne na bɛsoa ye bɛ kɔme zo. (Ɛdianlɛ 7:9; 1 Edwɛkɛsisilɛ 15:15) Ɛnee bɛnyeye mbaka ne mɔ, yemɔti Livaema ne anva bɛ sa anga Ɛlɛka ne ɛlɛ. (Adendulɛ 25:12-​16) Saa bɛlɛsoa ɛlɛka ne a, bɛfa “mgbɛnu ɛdanlɛ” ne mɔɔ kyɛ Nwuanzanwuanza ɛleka ne nee Nwuanzanwuanza Nu Nwuanzaanwu Ɛleka ne anu la bɛgua Ɛlɛka ne azo.​—Ɛdianlɛ 4:​5, 6. *

•   Mɔɔ ɔkile la. Ɛnee Ɛlɛka ne kile kɛ Nyamenle wɔ menli ne avinli. Kɛ neazo la, amungu ne mɔɔ ɛnee finde Ɛlɛka ne azo wɔ Nwuanzanwuanza Nu Nwuanzaanwu Ɛleka ne nee Yizilayɛma azokoɛleɛ ne la le sɛkɛlɛneɛ mɔɔ kile kɛ Gyihova wɔ bɛ avinli yɛɛ eza ɔkile nyilalɛ. (Sɛlɛvolɛma 16:2; Ɛdianlɛ 10:33-​36) Bieko, Baebolo ne ka kɛ Gyihova “belemgbunli ebia gyi tease abɔdeɛma azo,” ɛhye kile kyɛlɔbem nwiɔ ne mɔɔ wɔ Ɛlɛka ne azo la. (1 Samoɛle 4:4; Edwɛndolɛ 80:1) Yemɔti, kyɛlɔbem ne mɔ gyi ɛkɛ maa Gyihova “ehwili ne.” (1 Edwɛkɛsisilɛ 28:18) Ɔlua mɔɔ Ɛlɛka ne kile la ati, mekɛ mɔɔ bɛvale bɛhɔle Zayɔn la, Belemgbunli Devidi hanle kɛ Gyihova “wɔ Zayɔn”.​—Edwɛndolɛ 9:​11.

•   Ye aluma gyɛne. Baebolo ne fa aluma ngakyile fɛlɛ zɔhane ɛlɛka nwuanzanwuanza ne. Bie a le “Daselɛ Ɛlɛka ne,” “ngyekyeleɛ ɛlɛka ne,” ‘Gyihova Ɛlɛka ne,’ yɛɛ “Ɛlɛka ne mɔɔ kile Gyihova tumi kpole ne.”​—Ɛdianlɛ 7:89, NW; Dwɔhyua 3:6, 13, NW; 2 Edwɛkɛsisilɛ 6:41, NW.

   Ɛnee bɛfɛlɛ Ɛlɛka ne ati ne “mgbɔdalɛ ɛlɛka,” anzɛɛ “anwunvɔnezelɛ ebia ne.” (1 Edwɛkɛsisilɛ 28:11; King James Version) Duma ɛhye maa yɛnwu gyima titili mɔɔ tile ne yɛ wɔ Mgbɔdalɛ Kenle ne la, wɔ mekɛ mɔɔ Yizilayɛ ɛsɔfo kpanyinli ne bakponde nane ne mogya wɔ tile ne azo nee ɔ nyunlu ɛkɛ la. Ɛhye mɔɔ ɛsɔfo kpanyinli ne yɛ la kpɔda anzɛɛ keda “ɔ nwo, ye sua nu amra nee Yizilayɛma kɔsɔɔti” ɛtane zo.​—Sɛlɛvolɛma 16:14-17.

Ngyekyeleɛ ɛlɛka ne tɛbɔ ɛkɛ ɔ?

 Daselɛ biala ɛngile kɛ ɔtɛbɔ ɛkɛ. Baebolo ne maa yɛnwu ye kɛ Ɛlɛka ne anwo ɛngyia bieko ɔluakɛ bɛva “ngyekyeleɛ fofolɛ” ne mɔɔ gyi Gyisɛse afɔlebɔlɛ ne azo la bɛzie ngyekyeleɛ zɔhane agyakɛ anu. (Gyɛlɛmaya 31:31-33; Hibuluma 8:13; 12:24) Baebolo ne hanle kɛ mekɛ bie bara mɔɔ Nyamenle menli ɛnrɛnwu ngyekyeleɛ ɛlɛka ne yɛɛ bɛnrɛhakye ye bɔbɔ.​—Gyɛlɛmaya 3:​16.

 Mɔɔ bɛvale ngyekyeleɛ fofolɛ ne bɛziele ɛkɛ la, Dwɔn nwunle ngyekyeleɛ ɛlɛka ne wɔ anwuma wɔ ɛnyelɛzodeɛnwunlɛ nu. (Yekile 11:15, 19) Sɛkɛlɛneɛ adenle zo Ɛlɛka ɛhye gyi ɛkɛ ne maa Nyamenle mɔɔ ɔwɔ ɛkɛ nee nyilalɛ mɔɔ vi ngyekyeleɛ fofolɛ ne anu bara la.

Ɛnee Ngyekyeleɛ Ɛlɛka ne yɛ nwanwane ninyɛne ɔ?

 Kyɛkyɛ. Ngyekyeleɛ ɛlɛka ne mɔɔ ɛnee wɔ bɛ avinli la ɛngile kɛ bɛbali konim. Kɛ neazo la, mɔɔ Yizilayɛma nee Eyaema ɛlɛkɔ ahɔho la, ɛnee Ngyekyeleɛ Ɛlɛka ne wɔ bɛ azokoɛleɛ ne noko Yizilayɛma anli konim ɔluakɛ bɛ nuhua ko anli nɔhalɛ. (Dwɔhyua 7:​1-6) Nzinlii, Filisitiama noko lile bɛ nwo zo konim ɔnva nwo kɛ bɛvale ngyekyeleɛ ɛlɛka ne bɛhɔle konle ne la. Bɛlile bɛ nwo zo konim ɔlua ɛtane mɔɔ Yizilayɛ ɛsɔfoma Hɔfenae nee Fenɛhaze yɛle la ati. (1 Samoɛle 2:12; 4:1-11) Filisitiama vale Ɛlɛka ne hɔle noko Nyamenle maanle ngyegyelɛ rale bɛ nwo zo too hɔkpulale kɛ bɛvale bɛziale bɛhɔle Yizilayɛ la.​—1 Samoɛle 5:11–6:​5.