Suzu nzuzulɛ ɛhye mɔ mɔɔ gyi Baebolo ne azo la anwo:

1.   Yɛ ninyɛne pɛpɛɛpɛ. Da anyelielɛ nee ɛbulɛ ali kile ɛ gɔnwo mɔ gyimayɛvoma, noko saa bɛda nla nwo anyelielɛ ali bɛkile wɔ a, maa bɛnwu kɛ ɛ nye ɛnlie nwo.​—Mateyu 10:16; Kɔlɔsaema 4:6.

2.   Siezie ɛ nwo kpalɛ. Saa ɛwula adɛladeɛ mɔɔ ɛnle kpalɛ la a, ɔbamaa menli anyia ɛ nwo adwenle mɔɔ ɛnfɛta. Baebolo ne ka kɛ ‘yɛziezie yɛ nwo kɛnlɛma wɔ adenle mɔɔ kile kɛ yɛze deɛ na nyiane wɔ yɛ nye zo la azo.’​—1 Temɔte 2:9.

3.   Kpa wɔ agɔnwolɛma nrɛlɛbɛ nu. Saa ɛ nee menli mɔɔ fa bɛ nwo twihwili awie mɔ anzɛɛ bɛdie anyezohulolɛ bɛto nu la tu a, bɛbayɛ wɔ zɔhane ala.​—Mrɛlɛbulɛ 13:20.

4.   Kpo ngoayɛ mgbane mgbane. Saa ɛ nee awie mɔ ɛlɛbɔ adawu na bɛ edwɛkɛ ne kakyi ‘anyiemgba edwɛkɛ, ɛdendɛlɛ ɛtane yɛɛ ngoayɛ mgbane mgbane’ a, pɛ zo kɔ.​—Ɛfɛsɛsema 5:4.

5.   Mmadie edwɛkɛ biala mɔɔ awie mɔ baha la ɛto nu. Kɛ neazo la, saa bɛka bɛkile wɔ kɛ ɛkpɔne gyima a ɛhendɛ wɔ mekɛ mɔɔ bɛnlɛ ngyinlazo kpaziwɔkɛ biala a, ɔwɔ kɛ ɛnea boɛ.​—Mrɛlɛbulɛ 22:3.

6.   Si ɛ gyakɛ aze. Saa awie fa nla gyegye wɔ a, ka ye wienyi kile ye kɛ ɛ nye ɛnlie ye nyɛleɛ ne anwo. (1 Kɔlentema 14:9) Kɛ neazo la, ɛbahola wɔaha kɛ: “Ɛfa ɛ nwo ɛtwihwi me na me nye ɛnlie nwo. Gyakyi.” Ɛbahola wɔahɛlɛ ahenle ne kɛlata wɔaha mɔɔ ɛzi, kɛzi ɛte nganeɛ nee mɔɔ ɛkulo kɛ ɔyɛ ye kenle fofolɛ la wɔahile ye. Maa ɔnwu kɛ wɔ kpɔkɛzilɛ ne gyi ɛbɛlabɔlɛ kpalɛ nwo ngyinlazo nee wɔ ɛzonlenlɛ nu diedi zo.​—1 Tɛsalonaekama 4:3-5.

7.   Kpondɛ moalɛ. Saa awie kɔ zo fa nla gyegye wɔ a, kpondɛ moalɛ wɔ ɛ gɔnwo, wɔ busuanli anzɛɛ awie mɔɔ ɛ nee ye yɛ gyima anzɛɛ awie mɔɔ bahola aboa wɔ la ɛkɛ. (Mrɛlɛbulɛ 27:9) Menli dɔɔnwo mɔɔ bɛfa nla bɛgyegye bɛ la ɛnwu ye kɛ bɛyɛ asɔne a ɔboa bɛ. Saa ɛtɛyɛle asɔne ɛlɛ bɔbɔ a, mmabu ɛ nye ɛgua moalɛ mɔɔ ɛbahola wɔanyia wɔavi Gyihova “arɛlekyekyelɛ Nyamenle” ne ɛkɛ la azo.​—2 Kɔlentema 1:3.

 Nla mɔɔ bɛfa bɛgyegye la ɛmmaa menli dɔɔnwo anye ɛnlie wɔ gyima nu, noko Baebolo ne bahola aboa wɔ.