Nwuanzanwuanza mɔɔ yɛyɛ la kile kɛ yɛtwe yɛ nwo yɛavi debie mɔɔ anwo ɛnde la anwo. Hibulu edwɛkɛ kpɔkɛ mɔɔ bɛhile ɔ bo “nwuanzanwuanza” la vi edwɛkɛ kpɔkɛ mɔɔ kile “debie mɔɔ bɛye bɛzie ahane” la anu. Ɔti, debie mɔɔ anwo te la le debie mɔɔ bɛye bɛvi ninyɛne gyɛne nwo ɔluakɛ nwolɛ te.

 Nyamenle le nwuanzanwuanza tɛla awie biala. Baebolo ne ka kɛ: ‘Awie ɛnle nwuanzanwuanza kɛ Gyihova angome ala.’ * (1 Samoɛle 2:2) Ɔti, Nyamenle a lɛ nwolɛ adenle fa nwuanzanwuanzayɛlɛ nwo ngyinlazo maa a.

 Yɛbahola yɛaha kɛ Nyamenle debie biala le “nwuanzanwuanza,” titili ninyɛne mɔɔ bɛfa bɛdi gyima wɔ ye ɛzonlenlɛ nu la. Kɛ neazo la, Baebolo ne ka kɛ yɛlɛ:

•   Azɛlɛ nwuanzanwuanza: Nyamenle hanle hilele Mosisi wɔ kpɔkɛ ne mɔɔ ɛnee ɛlɛsɔ la anwo kɛ: “Azɛlɛ ne mɔɔ ɛgyi zolɛ la le nwuanzanwuanza.”​—Adendulɛ 3:2-5.

•   Ayia nwuanzanwuanza: Ɛnee tete Yizilayɛma di ɛzonlenlɛ nu ɛvoyia mɔɔ bɛfɛlɛ ye “ayia nwuanzanwuanza” la bɛfa bɛsonle Gyihova.​—Sɛlɛvolɛma 23:37, New World Translation.

•   Ninyɛne nwuanzanwuanza: Wɔ tete ne, ɛnee bɛfɛlɛ ninyɛne mɔɔ ɛnee bɛfa bɛdi gyima wɔ Gyɛlusalɛm ɛzonlenlɛ sua ne anu la “ninyɛne nwuanzanwuanza.” (1 Arelemgbunli 8:4) Ɛnee bɛbu ninyɛne nwuanzanwuanza ɛhye mɔ kpalɛ noko ɛnee bɛnzonle bɛ. *

 Ɛhɛe. Nyamenle ɛmaa Kilisienema mɛla kɛ: “Bɛyɛ nwuanzanwuanza, ɔluakɛ mele nwuanzanwuanza.” (1 Pita 1:16) Nɔhalɛ nu, alesama mɔɔ ɛnli munli la ɛnrɛhola ɛnrɛdwu Nyamenle nwuanzanwuanzayɛlɛ ngyinlazo mɔɔ di munli la anwo. Noko akee, alesama mɔɔ di Nyamenle tenlene ngyinlazo ne mɔ azo la ‘anwo te yɛɛ bɛsɔ Nyamenle anye.’ (Wulomuma 12:1) Awie mɔɔ bɔ mɔdenle kɛ ɔmaa ɔ nwo ade la da ye ali wɔ ye edwɛkɛhanlɛ nee ye nyɛleɛ nu. Kɛ neazo la, ɔdi Baebolo folɛdulɛ mɔɔ se, ‘bɛmaa bɛ nwo ɛde na bɛhwe bɛ nwo bɛvi adwɔmane ɛbɛla nwo’ la azo.​—1 Tɛsalonaekama 4:3; 1 Pita 1:15.

 Ɛhɛe. Saa awie kpo kɛ ɔbali Nyamenle tenlene ngyinlazo ne mɔ azo a, Nyamenle ɛnrɛbu ye kɛ ɔ nwo te bieko. Kɛ neazo la, bɛhɛlɛle Baebolo buluku mɔɔ bɛfɛlɛ ye Hibuluma la bɛhɔmaanle “mediema mɔɔ bɛ nwo te” la, noko bɛbɔle bɛ kɔkɔ kɛ “bɛnlea boɛ na bɛ nuhua bie annyia ahonle ɛtane mɔɔ ɛnlɛ diedi la.”​—Hibuluma 3:1, 12.

 Adalɛ Edwɛkɛ: Saa awie angya a, ɔmaa ɔyɛ nwuanzanwuanza kpalɛ.

 Nɔhalɛ Edwɛkɛ: Kilisienenli bie bahola azi kpɔkɛ kɛ ɔnrɛgya ɛdeɛ, noko saa awie angya a ɔngile kɛ yemɔ a bamaa ɔ nwo ade wɔ Nyamenle anye zo a. Ɔle nɔhalɛ kɛ menli mɔɔ ɛtɛgyale la bahola azonle Nyamenle mɔɔ debie ɛndwehwe bɛ adwenle a. (1 Kɔlentema 7:32-34) Noko akee, Baebolo ne maa ɔda ali kɛ menli mɔɔ bɛgya la noko anwo bahola ade. Nɔhalɛ nu, yeanyɛ boɛ fee la Gyisɛse ɛzoanvolɛ ne mɔ ko​—Pita​—gyale.​—Mateyu 8:14; 1 Kɔlentema 9:5.