Baebolo ne ka mɔɔ tu sie fa ba la anwo edwɛkɛ mɔɔ yɛ alɔbɔlɛ. Ɔka kɛ: “Sonla mɔɔ dahuu nea anwoma ne la ɛnrɛlua debie biala, yɛɛ mɔɔ nea kɛ anwomanyunlu si de la, ɛnrɛbu ye bɛyɔba.”​—Nolobɔvo ne 11:4.

 Suzu debie mɔɔ fa tu sie ba nee kɛzi ɛbagyakyi subane ɛhye la.

 Nɔhalɛ edwɛkɛ ne a le kɛ, gyima ne bie zonle kpalɛ ɔti ɔnyɛ se kɛ ɛbabu ɛ nye wɔagua zo na wɔadu wɔazie. Ninyɛne bie mɔ mɔɔ baboa la ɛne.

•   Kyehyɛ gyima ne anu ngyikyi ngyikyi. Kakula bɛlɛra bie mɔɔ bɛfɛlɛ ye Melissa la ka kɛ, “Saa menwu ye kɛ meha amozi somaa a, mebɔ mɔdenle kɛ mebayɛ gyima ne ngyikyi ngyikyi amaa meahola meawie.”

•   Bɔ ɔ bo ndɛ. “Saa ɛ sa ka gyima ne ala a bɔ ɔ bo, saa bɔbɔ ɔwɔ kɛ ɛfa ɛboka ninyɛne mɔɔ ɛbayɛ la anwo anzɛɛ ɔwɔ kɛ ɛkɛlɛ kɛzi ɛbayɛ ye la a yɛ ye zɔ”​—Vera.

•   Kpondɛ moalɛ. Bie a ɛnee wɔ awovolɛ nee wɔ kilehilevolɛma ɛyia ngyegyelɛ ɛhye bie ɛlɛ. Ɛbahola wɔanyia nvasoɛ wɔavi bɛ anwubielɛ ne anu. Bɛbahola bɛaboa wɔ bɛamaa wɔanyia gyima ne anwo adwenle na eza wɔayɛ nwolɛ ngyehyɛleɛ kpalɛ.

 Nzuzulɛ “Yɛ ngyehyɛleɛ. Ɛhye kile kɛ, ɔwɔ kɛ ɛyɛ ngyehyɛleɛ na ɛbɔ mɔdenle kɛ ɛbali zo na ɛhye boa kpalɛ​—ɛkola ɛyɛ debie biala mɔɔ ɔhyia kɛ ɛyɛ la.”​—Abbey.

 Fane dɔɔnwo ne ala, bie a gyima mɔɔ ɔwɔ kɛ ɛyɛ la le ninyɛne mɔɔ ɔngyɛ na yeavonle wɔ la. Ɔti saa ɛ nye ɛnlie gyima mɔɔ ɔwɔ kɛ yɛ la anwo a, boni a ɛbayɛ a? Sɔ mɔɔ doa zo la nea.

•   Dwenle deɛmɔti ɔwɔ kɛ ɛyɛ ye ndɛ la anwo. Kɛ neazo la, dwenle kɛzi ɛwie gyima ne a ɛ nye balie la anwo. Kakula raalɛ bie mɔɔ bɛfɛlɛ ye Amy la ka kɛ, “Saa mewie me gyima wɔ ye mekɛ nloa anzɛɛ mewie na mekɛ ne ɛtɛdwule a, ɔmaa me nye die na mekola medie me ɛnwomenle.”

•   Kakye mɔɔ bavi nu ara la. Saa ɛka amozi a, ɔmaa ɛfɛ yɛɛ ɔmaa ɔyɛ se kɛ ɛbayɛ wɔ gyima ne boɛ. Baebolo ne ka kɛ: “Mɔɔ sonla kɛlua la yɛɛ ɔbu a.”​— Galeehyeama 6:7.

•   Maa ɔdɛnla wɔ adwenle nu kɛ mekɛ ne ɛbikye. Kakula bɛlɛra bie mɔɔ bɛfɛlɛ ye Alicia la ka kɛ, “Ɛhye boa me ɔmaa mefa mesie me adwenle nu kɛ asɛɛ mekɛ ne ɛdwu noko bie a ɛnee yeha kenle ko anzɛɛ nwiɔ. Akee mesia menea ngyehyɛleɛ ne azo a menwu ye kɛ melɛ mekɛ.”

 Nzuzulɛ “Ɛbahola wɔamaa ɛ nwo anwosesebɛ. Ka kile ɛ nwo kɛ ɛbahola wɔayɛ mɔɔ ɔhyia kɛ ɛyɛ la mɔɔ ɛhwee ɛmpepɛ ɛ gyakɛ anu a. Saa meka edwɛkɛ ɛhye mekile me nwo a, ɔmaa meyɛ mɔɔ ɔwɔ kɛ meyɛ la.”​—Alexis.

 Kakula nrenyia bie mɔɔ bɛfɛlɛ ye Nathan la ka kɛ, “Menli dɔɔnwo ka kɛ mele tu sie na ɛhye ɛnle kpalɛ! Bɛnze kɛzi gyima dɔɔnwo gua me nwo zo la!” Saa ɛte nganeɛ kɛ Nathan a, ɛnee sɔ ɛhye nea.

•   Dimoa yɛ gyima mɔɔ ɛnyɛ se la. Kakula bɛlɛra bie mɔɔ bɛfɛlɛ Amber la ka kɛ, “Awie hanle hilele me kɛ saa gyima bie ɛnlie mekɛ dɔɔnwo a menlimoa menyɛ yemɔ ndɛndɛ. Gyima ne bie a le sua nu ɛkyikyilɛ, tɛladeɛ ɛhendalɛ, ahyɛnze ɛkpudalɛ nee call ɛyɛlɛ.”

•   Yɛ ngyehyɛleɛ. Baebolo ne ka kɛ: “Bɛnwu mɔɔ le kpalɛ la.” (Felepaema 1:10) Kɛzi ɛbava ɛhye wɔali gyima wɔ wɔ ɛbɛlabɔlɛ nu ɛ? Kakula bɛlɛra bie mɔɔ bɛfɛlɛ ye Anna la ka kɛ, “Mekɛlɛ gyima mɔɔ melɛ nee mekɛ mɔɔ ɔwɔ kɛ mefa meyɛ la meto ɛkɛ. Noko mɔɔ hyia kpalɛ la, mekɛlɛ mekɛ mɔɔ mekulo kɛ mebɔ ɔ bo nee mekɛ mɔɔ ɔwɔ kɔ mewie la.”

 Asoo yemɔ bamaa ɛ nwo ahyele wɔ somaa ɔ? Dwenle nwo bieko! Nɔhalɛ ne a le kɛ, saa ɛyɛ ngyehyɛleɛ a, ɔmaa ɛkola ɛdi wɔ mekɛ zo na tɛ mekɛ ne a bali ɛ nwo zo a. Yemɔ te wɔ ɛvɛlɛ zo. Kakula bɛlɛra bie mɔɔ bɛfɛlɛ ye Kelly la ka kɛ, “Saa meyɛ nwolɛ ngyehyɛleɛ a ɔmmaa mempele me nwo yɛɛ ɔmaa menwu gyima ne anye zo kpalɛ.”

•   Mmamaa ninyɛne twehwe wɔ adwenle. Jennifer ka kɛ, “Memaa awie biala nwu ye wɔ sua nu kɛ melɛbɔ me gyima ne abo. Yemɔti saa ɔwɔ kɛ meyɛ debie a meka mekile bɛ kɛ bɛmaa menlimoa menyɛ kolaa na meabɔ ɔ bo. Eza menua me fonu ne.”

 Nzuzulɛ “Gyima mɔɔ ɔwɔ kɛ ɛyɛ la ɛnrɛvi ɛkɛ ne kyesɛ ɛyɛ. Mmamaa gyima ne ɛyɛlɛ yɛ wɔ adwenleadwenle emomu bɔ ɔ bo yɛ. Ɛyɛ ye zɔhane a ɛbahola wɔalie ɛ menle nzinlii.”​—Jordan.