Awie biala bahola ali nyane. Baebolo ne ka kɛ, “Tɛ menli mɔɔ anwo yɛ ndɛ la a dahuu di konim wɔ ɛnriandilɛ nu a, yɛɛ tɛ anwosesebɛma angome a dahuu di konim wɔ konle nu a. Tɛ mekɛ ne amuala a bɛdi ye moavolɛ a.” (Nolobɔvo ne 9:11) Mgbavolɛ nee mbɛlɛra bie mɔ noko lile nyane. Kɛzi bɛgyinlanle ɔ nloa ɛ? Suzu neazo nwiɔ bie anwo.

•  REBEKAH

•  CORDELL

 Menyianle ɛvolɛ 14 la yɛɛ me awovolɛ bɔle ewole a.

 Menganle kɛ menlie menli kɛ me awovolɛ babɔ ewole, bie a me papa kɔ ekyii na yeara. Me papa kulo me mame​—duzu ati a ɔbagyakyi ye a? Duzu ati a ɔbagyakyi me ɛkɛ a?

 Ɛnee ɔyɛ se ɔmaa me kɛ mebaha mɔɔ ɔlɛkɔ zo la anwo edwɛkɛ meahile awie. Ɛnee mengulo kɛ medwenle nwo. Ɔyɛ a ɛnee mefa ɛya mɔɔ mennwu ye a. Adwenleadwenle dɔle me nwo yɛɛ ɛnee mengola da.

 Menyianle ɛvolɛ 19 la, kansa hunle me mame. Ɛnee ɔle me gɔnwo kpalɛ.

 Me awovolɛ ewolebɔlɛ ne zinle me nwo, noko me mame ewule ne mɔɔ, ɔgyegyele me kpole kpalɛ. Nyanelilɛ ne ɛtɛfile ɛkɛ. Nafelɛ bɔbɔ mɔɔ mengola bie da fee yɛɛ adwenleadwenle ne tɛbɔ ɛkɛ.

 Mekɛ ko ne ala ninyɛne dɔɔnwo boale me. Kɛ neazo la, Mrɛlɛbulɛ 18:1 bɔ yɛ kɔkɔ kɛ, ɔnle kɛ yɛtwe yɛ nwo yɛfi menli nwo, ɔti mebɔ mɔdenle kɛ mebava folɛdulɛ zɔhane meayɛ gyima.

 Bieko, kɛ Gyihova Dasevolɛ la, mebɔ mɔdenle kɛ mebagenga yɛ mbuluku ne mɔ mɔɔ maa anwosesebɛ la. Nuhua ko mɔɔ boale me wɔ mekɛ mɔɔ me awovolɛ bɔle ewole la a le Questions Young People Ask​—Answers That Work. Mekakye kɛ mengengale tile ko bie mɔɔ se “Can I Be Happy in a Single-Parent Family?” mɔɔ wɔ Volume 2 ne anu la.

 Ngɛlɛlera ko mɔɔ maanle mengyinlanle me adwenleadwenle nloa la a le Mateyu 6:25-34. Gyisɛse bizale wɔ ngyɛnu 27 ne kɛ: “Bɛ nuhua boni a dwenledwenle a ɔbahola yeava mekɛ ekyi yeaboka ye ngoane mekɛ nwo a?”

 Yɛ muala yɛbayia ngyegyelɛ noko mezukoa debie mevi neazo mɔɔ me mame yɛle la anu kɛ kɛzi yɛbagyinla sɔnea ɛhye mɔ anloa la anwo hyia kpalɛ. Ɔyiale ngyegyelɛ dɔɔnwo​—ewolebɔlɛ nee anwondolɛ mɔɔ anu yɛ se la​—noko ɔnyianle adwenle kpalɛ yɛɛ Nyamenle anu diedi mɔɔ ɔlɛ la anga aze too ɔwule. Me rɛle ɛnrɛvi Gyihova anwo ninyɛne mɔɔ ɔhilehilele me la ɛlɛ.

 Dwenle ɛhye anwo: Kɛzi Baebolo ne nee yɛ mbuluku ne mɔ mɔɔ ɛbagenga la baboa wɔ yeamaa wɔagyinla nyanelilɛ nloa ɛ?​—Edwɛndolɛ 94:19.

 Menyianle ɛvolɛ 17 la, me papa wule me nye zo. Ye ewule ne yɛle me nyane dɛlale debie biala. Me rɛle bɔle kpole kpalɛ.

 Ɛnee mesuzu kɛ ɔtɛwule, ɛnee menlie menli kɛ ɔdaye a bɛva ɛdanlɛ ne bɛheda ɔ ti zo la. Menganle kɛ, ‘Aleɛ kye a ɔbadwazo.’ Ɛnee mennwu mɔɔ meyɛ a.

 Yɛle Gyihova Alasevolɛ yɛɛ yɛ asafo ne anu amra boale yɛ kpalɛ wɔ mekɛ mɔɔ me papa wule la. Bɛmaanle yɛ aleɛ, bɛ nee yɛ dɛnlanle na bɛ nee yɛ yɛle ko mekɛ tendenle. Moalɛ mɔɔ bɛvale bɛmaanle yɛ la maanle menwunle kɛ Gyihova Alasevolɛ le nɔhalɛ Kilisienema.​—Dwɔn 13:35.

 Ngɛlɛlera mɔɔ ɛboa me kpalɛ la a le 2 Kɔlentema 4:17, 18. Ɔka kɛ: “Amaneɛnwunlɛ ne le mekɛ ezinra nu debie yɛɛ ɔnyɛ ɛlomboɛ bɔbɔ ɛdeɛ, noko ɔfa anyunlunyia mɔɔ le kpole kpalɛ na ɔwɔ ɛkɛ ne dahuu la ɔbɛlɛ yɛ; na yɛnva yɛ nye yɛndo ninyɛne mɔɔ bɛnwu bɛ la azo, emomu ninyɛne mɔɔ bɛnnwu bɛ la azo. Ɔluakɛ ninyɛne mɔɔ bɛnwu bɛ la le mekɛ ezinra nu ɛdeɛ, na ninyɛne mɔɔ bɛnnwu bɛ la wɔ ɛkɛ ne dahuu.”

 Ngyɛnu mɔɔ li awieleɛ la ka me ahonle kpalɛ. Ɛnee me papa amaneɛnwunlɛ ne le mekɛ ezinra nu debie, noko kenle bie ɛwɔkɛ mɔɔ Nyamenle ɛbɔ la wɔ ɛkɛ dahuu. Me papa ewule ne maanle mendwenlenle mɔɔ melɛyɛ ye wɔ ɛbɛlabɔlɛ nu la anwo na menyɛle nzenzaleɛ wɔ ninyɛne mɔɔ mekulo kɛ meyɛ la anu.

 Dwenle ɛhye anwo: Kɛzi ngyegyelɛ bahola aboa wɔ yeamaa wɔanlea ninyɛne mɔɔ wɔva wɔzie ɛ nye zo la anu ɛ?​—1 Dwɔn 2:17.