Anwodolɛ gua ye ngakyile.

•   Menli ne bie anwodolɛ da ali maa awie mɔ nwu ye yɛɛ bie mɔ ɛdeɛ ɛnla ali.

•   Anwodolɛ ne bie ɛngyɛ na yeahɔ, bie mɔ noko kyɛ yɛɛ alehyenlɛ biala ɔkɔ ɔ nyunlu.

•   Bie wɔ ɛkɛ a bɛbahola bɛamaa yeaha aze anzɛɛ bɛayɛ ye ayile yɛɛ bie noko sɛkye nwonane ne.

 Mgbavolɛ nee mbɛlɛra dɔɔnwo yia anwodolɛ mɔɔ bɛha nwolɛ edwɛkɛ wɔ ɛke la bie mɔ. Wɔ edwɛkɛ ɛhye anu, ɛbanwu mgbavolɛ nee mbɛlɛra nna mɔɔ bɛlɛ anwodolɛ ɛhye mɔ bie la. Saa ɛlɛ ewule bie a, edwɛkɛ mɔɔ bɛhanle la baboa wɔ.

•  GUÉNAELLE

•  ZACHARY

•  ANAÏS

•  JULIANA

 Debie mɔɔ yɛ se maa me la a le kɛ mebalie meado nu kɛ menrɛhola menrɛyɛ ninyɛne bie mɔ. Mekulo kɛ meyɛ ninyɛne dɔɔnwo noko alehyenlɛ ko biala me tɛnlabelɛ ne kakyi.

 Melɛ ewule bie mɔɔ ɔmmaa me adwenle ne nee sonlabaka nvɛyeba ne mɔ ɛnli ngitanwo kpalɛ a. Bɛfɛlɛ ewule ne motor-neuromuscular disorder. Me sonlabaka ne ɛleka ne bie kola woso anzɛɛ dwe bɔkɔɔ. Ɔyɛ se kɛ mebadia, mebadendɛ, mebagenga debie, mebahɛlɛ debie na meade edwɛkɛ mɔɔ awie mɔ ka la abo. Saa ninyɛne nu yɛ se kpalɛ a, me asafo nu mgbanyima nee me yɛ asɔne. Saa bɛyɛ zɔ a, mete nganeɛ kɛ me nwo ɛdɔ me ɛkɛ ne ala.

 Ɔnva nwo ngyegyelɛ biala mɔɔ mebayia ye la menwu ye kɛ Gyihova Nyamenle boa me dahuu. Mengulo kɛ me anwodolɛ ne maa me sa nu to wɔ ye ɛzonlenlɛ nu. Meva meyɛ me bodane kɛ mebaboa awie mɔ meamaa bɛanwu ɛwɔkɛ mɔɔ Gyihova Nyamenle ɛbɔ ye wɔ Baebolo ne anu kɛ ɔnrɛhyɛ azɛlɛ ne bayɛ paladaese na amaneɛnwunlɛ ɛnrɛdɛnla ɛkɛ me bieko la.​—Yekile 21:1-4.

 Dwenle ɛhye anwo: Adenle boni mɔ azo a ɛbahola wɔazukoa Guénaelle na wɔaboa awie mɔ ɛ?​—1 Kɔlentema 10:24.

 Menyianle ɛvolɛ 16 la, bɛnwunle ye kɛ menyia kansa anwo ɛzulolɛ bie mɔɔ ka adwenle ne la. Dɔketama hanle kɛ yeha siane mɔtwɛ pɛ na meawu. Ɔvi zɔhane mekɛ ne too mɔɔ ba la, me nwo ɛtɛtɔle me ɛlɛ.

 Ɔlua ɛleka mɔɔ ewule ne wɔ la ati, me foa ko ɛdwe. Mengola tia, yemɔti dahuu ɔwɔ kɛ awie tɛnla sua nu na ɔboa me.

 Me ewule ne ɛhɔ ɔ nyunlu ɔti, ɔyɛ se kɛ me nee awie mɔ bali adwelie. Ɛnee mekulo azule ɛbialɛ, basketball nee volleyball ɛbɔlɛ. Kɛmɔ mele Gyihova Dasevolɛ la ati ɛnee meta mekɔ daselɛlilɛ. Medie medi kɛ menli dɔɔnwo ɛnze kɛzi ɔyɛ se kɛ ɛngola ɛnyɛ ninyɛne mɔɔ ɛ nye die nwo la.

 Edwɛkɛ mɔɔ wɔ Ayezaya 57:15 la maa me anwosesebɛ kpalɛ ɔluakɛ ɔmaa menwu ye kɛ Gyihova Nyamenle bikye bɛdabɛ mɔɔ ‘bɛnlɛ anyelazo’ la yɛɛ ɔdwenle me nwo. Eza Gyihova ɛbɔ ɛwɔkɛ wɔ Ayezaya 35:6 kɛ mebadia bieko na meazonle ye wɔ kpɔkɛdelɛ kpalɛ nu.

 Ɔdwu mekɛ ne bie a me ewule ne anu yɛ se kpalɛ noko melɛ anwodozo kɛ Gyihova gyi me nzi. Medua asɔneyɛlɛ zo me nee Gyihova tendɛ wɔ mekɛ mɔɔ me rɛle ɛbɔ anzɛɛ ɛzulolɛ kɛha me la. Debie biala ɛnrɛhola ɛnrɛhwe me ɛnrɛvi Gyihova ɛlɔlɛ ne anwo.​—Wulomuma 8:39.

 Bɛbizebizale Zachary edwɛkɛ bɛwiele la ye siane nwiɔ anzi yɛɛ ɔwule a na ɛnee yenyia ɛvolɛ 18. Ɔzɔle diedi mɔɔ ɔlɛ ye wɔ ewudwazo ne mɔɔ Nyamenle ɛva ɛbɔ ɛwɔkɛ la anu kpundii ɔhɔdwule awieleɛ.

 Dwenle ɛhye anwo: Kɛzi asɔneyɛlɛ bahola aboa wɔ kɛ mɔɔ ɔboale Zachary la amaa wɔava ɛ nwo wɔazie Nyamenle ɛlɔlɛ ne anu ɛ?

 Bɛwole me la, yeangyɛ biala yɛɛ menyianle ewule bie mɔɔ ɔbubule me bɔkɔɔ a.

 Ɛnɛ, mekola mefa bulalɛ metia ekyi noko fane dɔɔnwo ne ala mehyia wheelchair nwo amaa meahola meahɔ ɛleka bie mɔ. Me nwo ta woso me arɛlevilɛ nu ɔti ɔyɛ se kɛ mebahola meava me sa meahɛlɛ debie.

 Saa ɛye adwenleadwenle mɔɔ me ewule ne ɛmaa menyia ye la ɛsie ahane a, me ayileyɛlɛ ne yɛ se kpalɛ. Mengɔle ɛleka mɔɔ bɛyɛ mbowule nu ayile la fane dɔɔnwo dapɛne biala. Menyianle ɛvolɛ nnu la yɛɛ bɛyɛle me apelehyɛne mɔɔ limoa a na ɔvi zɔhane mekɛ ne bɛyɛ me ngakyile nsa. Ɛnee ayileyɛlɛ ngakyile nwiɔ mɔɔ li awieleɛ la yɛ se maa me kpalɛ ɔluakɛ menvile sua nu siane nsa amaa me nwo adɔ me ekyi.

 Me abusua ne ɛboa me kpalɛ. Yɛ muala yɛbɔ nu yɛsele na ɛhye maa me ahonle tɔ me azule nu wɔ mekɛ mɔɔ me sa nu kɛdo la. Ɔluakɛ mengola menziezie me nwo la ati, me mame nee me mediema mraalɛ ne mɔ boa me. Ɔyɛ me nyane kɛ mengola menwula mgbɔlaboa mɔɔ wɔ anwuma la. Noko mekakye kɛ mekɛ mɔɔ ɛnee mele kakula la menvale bie menwulale me sa mendiale, ɛnee ɔyɛ ɛzelekɛ kpalɛ!

 Mefa me adwenle mesie mɔɔ mekola meyɛ la azo na tɛ mɔɔ mengola menyɛ la azo ɔ. Melɛbɔ mɔdenle kɛ mebazukoa aneɛ ngakyile. Mengola menli nwɔhoa wɔ snow nu noko mekola meweɛ azule na ɛhye maa me nye die kpalɛ. Kɛ Gyihova Dasevolɛ la, me nye die kɛ mebaha me diedi ne anwo edwɛkɛ meahile awie mɔ wɔ daselɛlilɛ nu. Ɔyɛ me kɛ menli tie me wɔ mekɛ mɔɔ melɛtendɛ la.

 Me awovolɛ ne mɔ hilehilele me mɔlebɛbo ne kɛ me tɛnlabelɛ ne ɛnrɛdɛnla ɛkɛ ne dahuu. Ɔvi zɔhane mekɛ ne, memia diedi mɔɔ melɛ wɔ Gyihova anu nee ɛwɔkɛ mɔɔ yebɔ kɛ ɔbaye amaneɛnwunlɛ mɔɔ me ɛdeɛ ne boka nwo la yeavi ɛkɛ la anu. Ɛhye maa menyia anwosesebɛ.​—Yekile 21:3, 4.

 Dwenle ɛhye anwo: Kɛzi ɛkulo kɛ ɛsukoa Anaïs mɔɔ ɛnva wɔ adwenle ɛnzie wɔ anwodolɛ ne azo a?

 Melɛ ewule bie mɔɔ sɛkye ngoane ngɛkɛba fufule mɔɔ wɔ me nu la. Ewule ɛhye yɛ nyane na ɔka ahonle ne, ɛvovoa ne nee mogya ne. Yeha me kilenzia ne bɔbɔ.

 Menyianle ɛvolɛ bulu la yɛɛ menyianle ewule bie mɔɔ maa me nwo fofo me, mefɛ yɛɛ eza ɔngyɛ na meava ɛya la. Ɔyɛ a mete nganeɛ kɛ nvasoɛ ɛnle me nwo zo.

 Menyianle ɛvolɛ 13 la yɛɛ Gyihova Dasevolɛ bie rale yɛ sua nu ɛkɛ a. Ɔgengale Ayezaya 41:10 mɔɔ Gyihova Nyamenle ka ye wɔ ɛkɛ ne kɛ: “Bɛmmasulo, ɔluakɛ me nee bɛ lua; . . . mebava me konimlilɛ tumi ɛsalɛ ne meazɔ bɛ” la ɔhilele me. Zɔhane mekɛ ne yɛɛ membɔle ɔ bo kɛ me nee Gyihova Alasevolɛ sukoa Baebolo ne a. Ɛvolɛ mɔtwɛ mɔɔ ɛze ɛhɔ la, mevi me ahonle nu mezonle Nyamenle yɛɛ mesika me bo kɛ menrɛmaa me ewule ne ɛnrɛvo me nwo zo. Menwu kɛ Gyihova ɛmaa me “tumi bedevinli” amaa meanyia adwenle kpalɛ.​—2 Kɔlentema 4:7.

 Dwenle ɛhye anwo: Kɛ mɔɔ Ayezaya 41:10 boale Juliana maanle ɔnyianle adwenle kpalɛ la, kɛ ɔkɛyɛ na yeaboa ɛdawɔ noko ɛ?