Ɛnee kakula raalɛ ne vea ɛleka bie, na ɔ nye gyi ɛleka ko wɔ ndɔ ne anu. Ɛnee ye ahonle ɛdu, wɔ mekɛ mɔɔ ɛnee azule Naele ne ɛlɛse ngyikyi ngyikyi la. Mekɛ ɛlɛkɔ, noko ɔhɔle zo ɔhendɛle na ɔzinzale ɔnva nwo kɛ ɛnee ngɛkɛba ɛlɛgyegye ye la. Mɔɔ ɔde ɛkɛ la, ɛnee ɔ nye gyi kɛndɛne bie mɔɔ ɔ diema nrenyia kakula ne la nu la anwo. Pɛ kɛzi ɔ ngome ɔde na ɔlɛdwenle ɔ diema nrenyia ekyi ne mɔɔ anwo ɛyɛ anwunvɔne la anwo nvoninli. Noko ɛnee ɔze kɛ mɔɔ ɔwɔ kɛ ye awovolɛ yɛ la ala a bɛyɛ la; ɛhye ala a bahola abɔ kakula ne anwo bane wɔ mekɛ ɛtane ɛhye anu a.

Ɛnee kakula raalɛ ne ɛlɛda akɛnrasesebɛ kpole ali na ɛnee ɔbayɛ mɔɔ tɛla zɔ la nzinlii ye. Ɛnee subane bie mɔɔ anwo hyia kpalɛ la ɛlɛsɔ ndinli wɔ ye ahonle nu​—diedi. Ɛnee ɔbanyia adenle yeala diedi ali na ɛhye baha ye ɛbɛlabɔlɛ wɔ adenle titili zo. Mɔɔ ɔyɛle kpanyinli la, ye diedi ne boale ye wɔ mekɛ mɔɔ ɔwɔ ye menli ne avinli la. Subane ko ne ala boale ye wɔ mekɛ mɔɔ ɔyɛle nvonleɛ kpole la. Nwane ɔ? Na duzu a yɛsukoa yɛfi ye diedi ne anu a?

Baebolo ne ambɔ kakula zɔhane duma, noko saa yɛka kɛ bɛfɛlɛ ye Meleam a, ɛnee yɛtɛbɔle adalɛ. Ɛnee Meleam le Amelam nee Dwɔkɛbɛde ara raalɛ kpanyinli na ɛnee bɛle ngɛkɛlɛ wɔ Yigyibiti. (Nɔmbɛse 26:59) Nzinlii, bɛravɛlɛle ɔ diema nrenyia kakula ne Mosisi. Ɛnee Aalɔn le Mosisi adiema nrenyia kpanyinli na ɛnee yeli kɛyɛ ɛvolɛ nsa wɔ zɔhane mekɛ ne. Yɛngola yɛnzi ɛvolɛ mɔɔ ɛnee Meleam ɛli la pi noko yɛkola yɛka kɛ ɛnee ɔtɛdwule ɛvolɛ bulu.

Ɛnee Meleam de mekɛ mɔɔ anu yɛ se la anu. Yigyibitima bule ye menli ne mɔɔ le Hibuluma la kɛ bɛ nwo yɛ ɛzulolɛ, ɔti bɛvale bɛ bɛyɛle bɛ ngɛkɛlɛ na bɛhilele bɛ nyane. Mɔɔ ngɛkɛlɛ ne mɔ anwo zonle na bɛ nwo yɛle se la, Yigyibitima nyianle bɛ nwo adwenle ɛtane bie. Falo hanle kɛ bɛhu Hibulu ngakula mrenyia kɔsɔɔti wɔ mekɛ mɔɔ bɛlɛdie bɛ awolɛ la. Ɛnee Meleam ze diedi mɔɔ Hyɛfela nee Pua mɔɔ bɛdie awolɛ lale ye ali na bɛandie belemgbunli ne la.​—Ɛzɛdɔso 1:8-22.

Meleam nwunle diedi mɔɔ ye awovolɛ lale ye ali la. Mɔɔ Amelam nee Dwɔkɛbɛde wole bɛ ra mɔɔ tɔ zo nsa la, bɛvale ye bɛziele too ɔnyianle siane nsa. Bɛammaa belemgbunli ne anwo ɛzulolɛ andɔ bɛ nwo zo yeammaa bɛangu bɛ ra ne. (Hibuluma 11:23) Noko kakula mɔɔ ɛfa ye wɔavea la ɛnla aze, yemɔti nzinlii bɛyɛle debie bie. Ɛnee ɔwɔ kɛ Dwɔkɛbɛde fa kakula ne fea ɛleka mɔɔ saa awie ɛlɛse a ɔbanwu ye na yeava ye yeanlea ye la. Pɛ kɛzi kakula ne mame yɛle asɔne ɛsesebɛ wɔ mekɛ mɔɔ ɔlɛfa ndɔ yeanwo kɛndɛne, yeava bilewu yeaha nu na yeava ɔ ra ne mɔɔ ɔkulo ye edwɛkɛ la yeado nu yeava yeazie ndɔ mɔɔ wɔ Azule Naele ne anloa anu la anwo nvoninli! Yemɔti ɔhanle ɔhilele Meleam kɛ ɔdɛnla ɛkɛ ne na ɔnlea mɔɔ bado kakula ne la.​—Ɛzɛdɔso 2:1-4.

Yemɔti, Meleam hendɛle. Yeangyɛ, ɔnwunle kɛ mraalɛ bie ɛlɛba. Ɛnee bɛnle menli gyɛne bie ala. Ɛnee Falo ara raalɛ ne nee ye azonvolɛ mraalɛ ne mɔ a bɛlɛba bɛarabia wɔ Naele ne anu a. Ɔbayɛ kɛ ɛnee Meleam ahonle ɛdu. Asoo Falo ara raalɛ ne babulu ye papa mɛla zo na yeabɔ Hibulunli adɔma ɛhye anwo bane? Ɔbayɛ kɛ Meleam yɛle asɔne ɛsesebɛ wɔ mekɛ zɔhane.

Falo ara raalɛ ne a limoale nwunle kɛndɛne ne wɔ ndɔ ne anu a. Ɔzoanle ye sonvolɛ raalɛ ko kɛ ɔhɔva ɔrɛlɛ ye. Kɛlɛtokɛ ne ka belemgbunli ara raalɛ ne anwo edwɛkɛ kɛ: “Mɔɔ ɔbukele zolɛ la, ɔnwunle kakula ne, na ɛnee kakula ne ɛlɛsu.” Ndɛndɛ ne ala ɔnwunle mɔɔ ɛzi la: Hibulunli ɛrɛladane bie ɛlɛbɔ mɔdenle kɛ ɔbɔ ɔ ra ne anwo bane. Noko Falo ara raalɛ ne akunlu yelɛyelale ye maanle adɔma ne mɔɔ anwo yɛ fɛ la. (Ɛzɛdɔso 2:5, 6) Mɔɔ Meleam nleanle raalɛ ne anyunlu la, ɔnwunle mɔɔ wɔ ye adwenle nu la. Kakula ne nwunle kɛ, mekɛ ɛra mɔɔ ɔwɔ kɛ ɔkile kɛ ɔlɛ Gyihova nu diedi a. Ɔzile ɔ kɛnra na ɔbikyele belemgbunli ara raalɛ ne nee ye azonvolɛ ne mɔ.

Yɛnze mɔɔ saa Hibulunli kakula ɛhye mɔɔ le akɛlɛ la bɔ mɔdenle kɛ ɔbikye bɛ na ɔ nee bɛ adendɛ a, ɔbado ye la. Noko Meleam bizale belemgbunli ara raalɛ ne kpuya fɔɔnwo bie: “Mengɔnvɛlɛ Hibulu mraalɛ mɔɔ nea ngakula la ko memaa ɔnlea kakula ne ɔmaa wɔ ɔ?” Ɛnee kpuya ne fɛta. Ɛnee Falo ara raalɛ ne ze kɛ ɔnrɛhola ɔnrɛnlea adɔma ne. Bie a ɔdele nganeɛ kɛ, saa bɛtete adɔma ne wɔ ye menli ne avinli a, ɔbaboa; nzinlii ɔbahola yeade ye yeahɔ ye sua nu kɛ ɔ ra nrenyia na yeanlea ye yeamaa yeahɔ sukulu. Ɔbayɛ kɛ Meleam anye liele kpole wɔ mekɛ mɔɔ belemgbunli ara raalɛ ne buale kɛ: “Kɔ!” la.​—Ɛzɛdɔso 2:7, 8.

Meleam vale ɛnriandilɛ hɔle ye awovolɛ ɛkɛ. Nea kɛzi ɔbava anyelielɛ yeaha edwɛkɛ ne yeahile ye mame a! Dwɔkɛbɛde nwunle kɛ Gyihova a ɛlɛdi ninyɛne nwo gyima a, na ɔlile Meleam anzi bɛhɔle Falo ara raalɛ ne ɛkɛ. Bie a Dwɔkɛbɛde bɔle mɔdenle kɛ ɔkomo ye anyelielɛ nee ye ahonle mɔɔ ɛdɔ ye azule nu la azo wɔ mekɛ mɔɔ belemgbunli ara raalɛ ne zele ye kɛ: “Fa kakula ɛhye kɔnlea ye maa me na mebadua wɔ kakɛ” la.​—Ɛzɛdɔso 2:9.

Meleam zukoale ninyɛne dɔɔnwo vanenle ye Nyamenle Gyihova anwo wɔ kenle ko zɔhane. Ɔnwunle kɛ ɔdwenle ye menli nwo yɛɛ ɔtie bɛ asɔneyɛlɛ. Eza ɔnwunle kɛ, tɛ mgbanyinli anzɛɛ mrenyia ala a kola da akɛnrasesebɛ nee diedi ali a. Gyihova tie ye nɔhalɛ azonvolɛ kɔsɔɔti asɔneyɛlɛ. (Edwɛne 65:2) Ɔwɔ kɛ yɛ kɔsɔɔti​—mgbanyinli nee ngakula, mrenyia nee mraalɛ​—kakye edwɛkɛ ɛhye wɔ anwongyelelɛ mekɛ ɛhye anu.

Dwɔkɛbɛde nleanle kakula ne na ɔtetele ye. Yɛbalie yɛali kɛ Meleam hulole ɔ diema nrenyia ne mɔɔ ɔboale ye ɔmaanle ɔnyianle ngoane la. Ɔbayɛ kɛ ɔboale ye ɔmaanle ɔzukoale ɛdendɛlɛ, na mekɛ mɔɔ limoa mɔɔ ɔdele kɛ yebɔ ye Nyamenle Gyihova duma la, ɔ nye liele kpalɛ. Akee mekɛ dwule kɛ bɛfa kakula ne bɛkɔmaa Falo ara raalɛ ne. (Ɛzɛdɔso 2:10) Ɔda ali kɛ ɔyɛle abusua ne nyane kpalɛ wɔ mekɛ mɔɔ ɔlɛfi bɛ nwo la. Ɛnee Meleam anye la kɛ ɔbanwu kɛzi ɔ diema ne mɔɔ Falo ara raalɛ ne donle ye Mosisi, bayɛ ye ninyɛne wɔ mekɛ mɔɔ yeyɛ kpanyinli la. Asoo ɔbamaa ɛlɔlɛ mɔɔ ɔlɛ ɔmaa Gyihova la adɛnla ɛkɛ wɔ mekɛ mɔɔ ɔlɛnyi wɔ Yigyibiti belemgbunli sua nu ɛkɛ la ɔ?

Nzinlii, mualɛ ne lale ali. Mɔɔ Meleam nwunle kɛ ɔ diema nrenyia ne mɔɔ ɛyɛ kpanyinli la ɛkpa kɛ ɔsonle ye Nyamenle ne tɛla kɛ ɔbamaa ɔ nye alie ninyɛne mɔɔ ɔ sa ka ye wɔ Belemgbunli Falo sua nu ɛkɛ anwo la, nea kɛzi ɔ nye liele a! Mɔɔ Mosisi nyianle ɛvolɛ 40 la, ɔgyinlanle ye menli ne afoa. Ɔhunle Yigyibitinli bie mɔɔ ɛnee ɔlɛbo Hibulunli bie la. Kɛmɔ ɛnee Mosisi sulo kɛ bɛbahu ye la ati, ɔnriandile ɔvile Yigyibiti.​—Ɛzɛdɔso 2:11-15; Gyima ne 7:23-29; Hibuluma 11:24-26.

Ɔbayɛ kɛ Meleam ande ɔ diema nrenyia ne nganeɛ bieko wɔ ɛvolɛ 40 mɔɔ ɛnee ɔlɛnea mboane wɔ Medean la anu. (Ɛzɛdɔso 3:1; Gyima ne 7:29, 30) Meleam hɔle zo zile abotane wɔ mekɛ mɔɔ ɛnee ɔlɛyɛ kpanyinli, na mekɛ ko ne ala ye menli ne amaneɛnwunlɛ ɛlɛyɛ kpole la.

Mɔɔ Meleam wɔ ye ɛvolɛ 80 anu la yɛɛ Nyamenle zoanle Mosisi kɛ ɔhɔlie Ye menli ne a. Ɛnee Aalɔn le Mosisi kpɔmavolɛ, Meleam amediema mrenyia nwiɔ ne hɔle Falo ɛkɛ hɔzɛlɛle ye kɛ Nyamenle se ɔmaa ye menli ne ɛhɔ. Ɔda ali kɛ Meleam bɔle mɔdenle biala maanle bɛ anwosesebɛ wɔ mekɛ mɔɔ Falo andie bɛ na bɛziale bɛhɔle ye ɛkɛ ne fane dɔɔnwo la, na Gyihova vale ngyegyelɛ bulu rale Yigyibitima anwo zo vale bɔle bɛ kɔkɔ. Awieleɛ bɔkɔɔ ne, mɔɔ ngyegyelɛ bulu ne hunle Yigyibitima belamunli mralɛ mrenyia ne mɔ amuala la, ɔmaanle Yizilayɛma adenle kɛ bɛhɔ. Nea Meleam mɔɔ anye ɛbolo ɛlɛboa ye menli ne yeamaa bɛavi Yigyibiti wɔ mekɛ mɔɔ Mosisi li bɛ ti la.​—Ɛzɛdɔso 4:14-16, 27-31; 7:1–12:51.

Nzinlii mɔɔ bɛhale Nyevile Kɔkɔlɛ ne yɛɛ Yigyibiti ɛlɔnema ne avinli la, Meleam nwunle kɛ ɔ diema nrenyia Mosisi gyi nyevile ne anloa na yemaa ye kpɔma ne zo. Nyevile ne anu kpakyele! Mɔɔ Mosisi li bɛ nyunlu na bɛlua nyevile ne avinli wɔ azɛlɛ resee zo la, diedi mɔɔ Meleam lɛ ye wɔ Gyihova anu la yɛle kpole. Ɔnwunle kɛ ye Nyamenle ne kola yɛ debie biala na ɔdi ye ɛwɔkɛ biala azo!​—Ɛzɛdɔso 14:1-31.

Mɔɔ menli ne pɛle nyevile ne hɔle ɔ nzi lɔ na nyevile ne ravale Falo nee ye ɛlɔnema ne la, Meleam nwunle kɛ Gyihova lɛ tumi tɛla sogyama mɔɔ anwo yɛ se kpalɛ wɔ ewiade la. Anyelielɛ ngome maanle menli ne dole edwɛne maanle Gyihova. Na Meleam lile mraalɛ ne mɔ anyunlu maanle bɛdole edwɛne ɛhye: “Bɛdo edwɛne bɛmaa Gyihova, ɔluakɛ ye anyunlunyia ɛyɛ kpole. Yevuandi ɛkpɔnwɔ ne nee ye kavolɛ ne yegua nyevile ne anu.”​—Ɛzɛdɔso 15:20, 21; Edwɛne 136:15.

Ɛnee ɔle anwubielɛ kɛnlɛma wɔ Meleam ɛbɛlabɔlɛ nu, na ɔrɛle ɛnrɛvi ye ɛlɛ. Mekɛ mɔɔ bɛkɛlɛ edwɛkɛ ɛhye la, Baebolo ne hanle kɛ Meleam le ngapezonli raalɛ. Meleam a le raalɛ mɔɔ limoa mɔɔ bɛvɛlɛle ye zɔhane a. Ɔboka mraalɛ ekyii mɔɔ Gyihova maanle bɛnyianle nwolɛ adenle titili zɔhane la anwo.​—Ndɛnebuavolɛma 4:4; 2 Arelemgbunli 22:14; Ayezaya 8:3; Luku 2:36.

Baebolo ne kakye yɛ kɛ, Gyihova ɛlɛnea yɛ na ɔkulo kɛ ɔyila yɛ mɔdenlebɔlɛ, yɛ abotane nee ɛhulolɛ mɔɔ yɛlɛ kɛ yɛye ye ayɛlɛ la azo. Kɛ mgbanyinli anzɛɛ ngakula, mrenyia anzɛɛ mraalɛ yɛbahola yɛanyia Gyihova anu diedi. Ɔ nye die diedi zɛhae anwo; na ɔ rɛle ɛnrɛvi ye ɛlɛ, yɛɛ ɔlɛ ɛhulolɛ kɛ ɔbayila yɛ wɔ yɛ diedi ne anwo. (Hibuluma 6:10; 11:6) Ɛhye ati a ɔwɔ kɛ yɛsukoa Meleam diedi ne la.

Saa menli die duma anzɛɛ nyia nwolɛ adenle titili bie mɔ a, ɔle nyilalɛ, noko esiane wɔ nu. Mɔɔ bɛliele Yizilayɛma bɛvile akɛlɛzonlenlɛ nu la, ɔda ali kɛ ɛnee Meleam ɛlie duma wɔ maanle ne anu ɛdɛla raalɛ gyɛne biala. Asoo ɔbayɛ anwomemaazo anzɛɛ mgbanyizonle? (Mrɛlɛbulɛ 16:18) Ɔyɛ alɔbɔlɛ kɛ ɔyɛle zɔ wɔ mekɛ bie anu.

Mɔɔ bɛvile Yigyibiti la anzi siane ekyi, Mosisi liele menli ekpunli bie mɔɔ bɛvi moɔmoa bɛrale la, ɛnee ɔzebia Gyɛtulo nee Mosisi aye Zepɔla nee bɛ mra mrenyia nwiɔ ne ɔ. Mosisi gyale ye wɔ ɛvolɛ 40 mɔɔ ɔlile ye wɔ Medean la anu. Ɔbayɛ kɛ Zepɔla hɔkpɔlale ye abusua ne wɔ Medean, na kɛkala ye papa nee ye ɛlɛkɔ Yizilayɛma azokoɛleɛ ɛkɛ ne. (Ɛzɛdɔso 18:1-5) Nea kɛzi Yizilayɛma ne banlea bɛ wɔ mekɛ mɔɔ bɛrale la! Ɔbayɛ kɛ, ɛnee menli dɔɔnwo kulo kɛ bɛnwu nrenyia ne mɔɔ Nyamenle ɛkpa ye kɛ ɔli bɛ nyunlu ɔmaa bɛvi Yigyibiti la aye ne.

Asoo ɔyɛle Meleam noko fɛ? Bie a alimoa ne ɔyɛle ye fɛ. Noko ɔzɔho kɛ nzinlii ɔyɛle anwomemaazo. Bie a ɔdele nganeɛ kɛ Zepɔla ɛra la mɔɔ, ɔdaye a menli ne adwenle bahɔ ɔ nwo zo a. Ɔti, Meleam nee Aalɔn dendɛle bɛ nzo abo. Yeangyɛ bɛhehanle edwɛkɛ ɛtane mɔɔ yɛ nyane la. Alimoa ne, Zepɔla yɛɛ bɛdendɛle bɛtiale ye a, bɛdendɛle bɛ nzo abo kɛ ɔnle Yizilayɛnli emomu ɔle Kuhyenli. * Noko, bɛyɛle dedee bɛmaanle ɔdwule Mosisi mumua ne anwo zo. Meleam nee Aalɔn hanle kɛ: “Asoo Mosisi angomekye a Gyihova ɛlua ɔ nwo zo ɛdendɛ a? Asoo ɔtɛduale yɛdayɛ noko yɛ nwo zo ɔtɛtendɛle ɔ?”​—Nɔmbɛse 12:1, 2.

Yɛnwu ye wɔ edwɛkɛ zɔhane anu kɛ, ɛnee Meleam nee Aalɔn ɛlɛnyia subane mɔɔ ɛnle kpalɛ fee. Bɛ kunlu andwo kɛzi Gyihova ɛlɛfa Mosisi ali gyima la anwo, yemɔti ɛnee bɛkulo kɛ bɛdabɛ noko bɛnyia tumi na bɛdie duma kpole. Asoo ɛnee Mosisi ɛlɛfa ye tumi ne yeali gyima wɔ adenle ɛtane zo yeakpondɛ duma yeamaa ɔ nwo ɔ? Ɛnee ɔlɛ ye sinlidɔlɛ, noko yeanyɛ anyebolo yɛɛ anwomemaazo. Baebolo ne ka kɛ: “Ɛnee Mosisi le bɛlɛvo tɛla menli kɔsɔɔti mɔɔ wɔ azɛlɛ ye azo la.” Ye biala anu, Meleam nee Aalɔn anyɛ ye boɛ, na bɛvale bɛ ngoane bɛdole esiane nu. Kɛlɛtokɛ ne ka kɛ, “ɛnee Gyihova ɛlɛtie.”​—Nɔmbɛse 12:2, 3.

Ɛkɛ ne ala Gyihova zele mediema nsa ne kɛ bɛrayia wɔ ɛdanlɛsua ne anyunlu. Wɔ ɛkɛ ne, Gyihova dwule wɔ amungu pila ne anu na ɔragyinlanle ɛdanlɛsua ne anuhɔlɛ. Akee Gyihova dendɛle. Ɔdeanle Meleam nee Aalɔn, na ɔmaanle bɛnwunle agɔnwolɛvalɛ titili mɔɔ Ɔ nee Mosisi lɛ nee anwodozo mɔɔ Ɔlɛ wɔ ye nu la. Akee Gyihova bizale bɛ kɛ, “Duzu ati a bɛanzulo kɛ bɛbadendɛ bɛatia me sonvolɛ Mosisi a?” Meleam nee Aalɔn anwo wosole bɛ. Gyihova nwunle kɛ ɔdaye mumua ne a bɛambu ye a, na tɛ Mosisi ɔ.​—Nɔmbɛse 12:4-8.

Ɔbayɛ kɛ Meleam a gyinlanle edwɛkɛ ne anu kpalɛ a yɛɛ ɔ diema nrenyia kakula ne lile ɔ nzi ɔmaanle bɛdendɛle bɛtiale bɛ diema ne aye ne a. Yemɔ maa yɛnwu deɛmɔti bɛhwenle Meleam anzo la. Gyihova maanle kokobɛ guale ye. Ewule ɛtane zɔhane maanle ɔ nwo yɛle “nwohyee kɛ ezukɔtweaba.” Ɛkɛ ne ala Aalɔn bɛlɛle ɔ nwo aze wɔ Mosisi anyunlu na ɔkpale ye kyɛlɛ kɛ ɔyɛ asɔne ɔmaa Meleam. Ɔhanle kɛ: “Mɔɔ yɛyɛ la kile kɛ yɛli ngoaseasɛm.” Mosisi mɔɔ le bɛlɛvo la, zunle vɛlɛle Gyihova kɛ: “O Nyamenle, mebodo wɔ, yɛ ye ayile!” (Nɔmbɛse 12:9-13) Kɛzi mediema mrenyia nwiɔ ne yɛle bɛ nyɛleɛ la kile kɛ bɛkulo bɛ diema raalɛ kpanyinli ne kpalɛ ɔnva nwo kɛ ɔtɔ sinli la.

Gyihova vile anwunvɔnezelɛ nu diele bɛ modolɛ ne. Ɔmaanle Meleam mɔɔ ɛnlu ɔ nwo la dele kpɔkɛ. Noko, ɛnee ɔwɔ kɛ ɔtɛnla azokoɛleɛ ne anzi lɔ kenle nsuu. Ɛnee ɔnla aze kɛ Meleam badie, ɔluakɛ ɛnee menli mɔɔ wɔ azokoɛleɛ ɛkɛ ne la banwu ye na ɔ nyunlu bagua aze. Noko ye diedi liele ye ngoane. Wɔ ye ahonle nu, ɛnee ɔze kɛ ɔ Ze Gyihova di pɛlepɛle na ɔlɛfi ɛlɔlɛ nu yeadenrɛdenrɛ ye. Yemɔti ɔyɛle mɔɔ bɛhanle bɛhile ye la. Ɔti menli ne andu bɛ bo kɔkpula kɛ kenle nsuu ne pɛle nu. Akee Meleam lale diedi ali bieko, ɔmaanle adenle ɔmaanle ‘bɛ nee ye ziale rale.’​—Nɔmbɛse 12:14, 15.

Gyihova tenrɛ menli mɔɔ ɔkulo bɛ la. (Hibuluma 12:5, 6) Ɛnee ɔkulo Meleam kpole kpalɛ, na ɔnrɛdɛnla ɛkɛ ɔnrɛmaa ɔnrɛyɛ anwomemaazo. Ɛnee ndeanlɛ ne yɛ nyane, noko ɔliele ye ngoane. Kɛmɔ ɔvile ahonle nu ɔliele ɛdenrɛdenrɛlɛ ne ɔdole nu la ati, ɔnyianle Nyamenle anyunlu ɛlolɛ bieko. Ɔdɛnlanle aze too asɛɛ Yizilayɛma adendulɛ wɔ fienemgbole ne anu rale awieleɛ. Mɔɔ ɔwule wɔ Kadesh mɔɔ wɔ Zen fienemgbole ne anu la, ɛnee yenyia asɛɛ ɛvolɛ 130. * (Nɔmbɛse 20:1) Wɔ ɛvoya dɔɔnwo anzi, Gyihova hanvole Meleam wɔ nɔhalɛlilɛ nu mɔɔ ɔvile ɔzonlenle la anwo. Ɔluale ngapezonli Maeka anwo zo ɔhakyele ye menli ne kɛ: “Menliele bɛ menvile akɛlɛzonlenlɛ sua nu; Memaanle Mosisi, Aalɔn nee Meleam lile bɛ nyunlu.”​—Maeka 6:4.

Yɛbahola yɛazukoa dɔɔnwo yɛavi Meleam ɛkɛ. Ɔwɔ kɛ yɛbɔ mɔɔ ɛnlɛ ye awie la anwo bane na yɛfi akɛnrasesebɛ nu yɛgyinla mɔɔ le kpalɛ la anzi kɛ mɔɔ ɔyɛle ye wɔ ye ngakula nu la. (Gyemise 1:27) Ɔwɔ kɛ yɛfa anyelielɛ yɛbɔ Nyamenle edwɛkpa ne nolo kɛ mɔɔ ɔyɛle la. (Wulomuma 10:15) Eza ɔwɔ kɛ yɛbɔ mɔdenle yɛkpo subane ɛtane ɛhye mɔ, nungulehwenlɛ nee ɛyavalɛ. (Mrɛlɛbulɛ 14:30) Yɛɛ ɔwɔ kɛ yɛfi mɛlɛbɛnwoaze nu yɛdie Gyihova ndeanlɛ yɛto nu kɛ mɔɔ ɔyɛle la. (Hibuluma 12:5) Saa yɛyɛ ninyɛne ɛhye mɔ a, ɛnee yɛlɛsukoa Meleam diedi ne.