Ɛnee Mɛle Magedalene anye gyi anwuma, na ɔlɛkyikyi ɔ nye anwo monle. Ye Awulae mɔɔ ɔkulo ye edwɛkɛ kpalɛ la henda baka ne azo. Ɛnee ɔle kɛyɛ ewiazo bulu nee nwiɔ, “noko awozinli hedale azɛlɛ ne kɔsɔɔti azo”! (Luku 23:44, 45) Ɔhwenle ye ɛdanlɛ ne ɔguale ɔ bati na ɔbikyele mraalɛ ne mɔ mɔɔ ɛnee de ɔ nwo ɛkɛ la. Tɛ mitini ekyi bie anu ala a awozinli ne hedale azɛlɛ ne azo a, emomu dɔnehwele nsa kpalɛ. Bie a Mɛle nee awie mɔ gyɛne mɔɔ gyi Gyisɛse anwo ɛkɛ la dele nyɛmoa mɔɔ aleɛ dwo a bɛsu la bie mɔ ane. Ɛzulolɛ kpole hanle bɛdabɛ mɔɔ bɛgyi ɛkɛ la bie mɔ na bɛhanle kɛ: “Amgba, Nyamenle Ara ɛne.” (Mateyu 27:54) Bie a Gyisɛse ɛdoavolɛma nee awie mɔ gyɛne nyianle adwenle kɛ Gyihova ɛlɛda ye nyanelilɛ ali wɔ anyiemgba nee atisesebɛ adenle mɔɔ bɛluale zo bɛhunle ɔ Ra ne la anwo.

Ɛnee Mɛle Magedalene ɛngola ɛnnea mɔɔ ɛlɛkɔ zo la, noko ɛnee ɔngola ɛkɛ ne fi. (Dwɔn 19:25, 26) Ɔda ali kɛ ɛnee Gyisɛse ɛlɛnwu nyane kpalɛ. Ɛnee Gyisɛse mame noko hyia arɛlekyekyelɛ nee moalɛ.

Ɔlua mɔɔ Gyisɛse yɛle maanle Mɛle la ati, ɔdele nganeɛ kɛ ɔwɔ kɛ ɔyɛ biala mɔɔ ɔbahola la ɔmaa ye. Ɛnee ɔle raalɛ mɔɔ ɔ nwo yɛ anwunvɔne yɛɛ bɛmbu ye, noko Gyisɛse hakyile ye ɛbɛlabɔlɛ bɔkɔɔ. Ɔlua Gyisɛse moalɛ zo, kɛkala bɛbu ye yɛɛ ɔlɛ ɛbɛlabɔlɛ mɔɔ gyi bodane zo. Ɔnyianle diedi kpole. Adenle boni azo? Na duzu a yɛbahola yɛazukoa yɛavi ye diedi ne anu a?

Yɛnwu Mɛle Magedalene anwo edwɛkɛ mɔɔ limoa wɔ Baebolo ne anu wɔ mekɛ mɔɔ Gyisɛse yɛle debie maanle ye la. Gyisɛse maanle ɔnyianle fanwodi ɔvile tɛnlabelɛ mɔɔ ɛnle kpalɛ na ɔtu ahonle la anwo. Mekɛ zɔhane, ɛnee sunsum ɛtane ne mɔ ta nyia menli nwo zo tumi, ɛnee bɛwolo bie mɔ bɔbɔ anu na bɛfa bɛ bɛdi gyima. Yɛnze kɛzi sunsum ɛtane ne mɔ nyianle Mɛle Magedalene anwo zo tumi la, noko yɛze kɛ sunsum ɛtane nsuu mɔɔ ati yɛ se kpalɛ la wolole ye. Na ɔlua Gyisɛse Kelaese moalɛ zo, ɔdule bɛ kɔsɔɔti!​—Luku 8:2.

Mɛle nyianle fanwodi na ɔ nwo dɔle ye bɔkɔɔ. Kɛzi ɔbahile ɛhye anwo anyezɔlɛ ɛ? Ɔrayɛle Gyisɛse ɛdoavolɛ mɔɔ ɔdi nɔhalɛ. Eza ɔlile ngyianlɛ bie mɔɔ ɔnwunle ye la anwo gyima. Ɛnee Gyisɛse nee ye ɛzoanvolɛ ne mɔ hyia aleɛ, adɛladeɛ nee ɛleka mɔɔ bɛbala la. Ɛnee bɛnle azukoavolɛ yɛɛ ɛnee bɛnyɛ gyima mɔɔ fa ezukoa ba la wɔ zɔhane mekɛ ne. Ɛnee bɛhyia nwonane afoa nu ninyɛne amaa bɛava bɛ adwenle bɛazie nolobɔlɛ nee ngilehilelɛ gyima ne azo.

Mɛle nee mraalɛ bie mɔ boale maanle bɛlile ngyianlɛ ɛhye anwo gyima. Mraalɛ ne mɔ “vale bɛ ninyɛne boale bɛ.” (Luku 8:1, 3) Ɛnee mraalɛ ɛhye mɔ bie mɔ lɛ ezukoa. Baebolo ne ɛnga kɛ bɛdonle aleɛ, bɛkpole bɛ adɛladeɛ anzɛɛ bɛyɛle dabelɛ nwo ngyehyɛleɛ wɔ namunamu zo bɛmaanle bɛ. Noko bɛvile bɛ ɛhulolɛ nu bɛboale ekpunli ɛhye mɔɔ bɛtu adenle mɔɔ bɛ dodo bayɛ kɛyɛ 20 la. Moalɛ mɔɔ mraalɛ ɛhye mɔ vale maanle la boale Gyisɛse nee ye ɛzoanvolɛ ne mɔ maanle bɛvale bɛ adwenle bɛziele edwɛkɛhanlɛ gyima ne azo kpalɛ. Nɔhalɛ nu, ɛnee Mɛle ze kɛ ɔnrɛhola ɔnrɛdua Gyisɛse kakɛ wɔ mɔɔ yeyɛ yemaa ye la anwo​—noko ɔ nye liele kɛ ɔbayɛ mɔɔ ɔbahola la yeaboa!

Ɛnɛ menli dɔɔnwo ɛmbu menli mɔɔ yɛ ninyɛne ngyikyi ngyikyi boa awie mɔ la. Noko tɛ kɛ Nyamenle te nganeɛ la ɛne. Nea kɛzi ɔ nye liele wɔ mekɛ mɔɔ ɔnwunle kɛ Mɛle ɛlɛyɛ biala mɔɔ ɔbahola la yeaboa Gyisɛse nee ye ɛzoanvolɛ ne mɔ la! Ɛnɛ noko, Kilisienema dɔɔnwo mɔɔ bɛdi nɔhalɛ la fi mɛlɛbɛnwoaze nu yɛ ninyɛne ngyikyi boa awie mɔ. Ɔdwu mekɛ ne bie a ahunlunyele mɔɔ bɛda ye ali anzɛɛ edwɛkɛ kpalɛ mɔɔ bɛka bɔbɔ la boa kpalɛ. Gyihova anye die ɛhye anwo.​—Mrɛlɛbulɛ 19:17; Hibuluma 13:16.

Mɛle Magedalene boka mraalɛ ɛwolaa ne mɔɔ bɛ nee Gyisɛse hɔle Gyɛlusalɛm hɔlile Akpabɛnwo ne wɔ ɛvolɛ 33 Y.M la anwo. (Mateyu 27:55, 56) Mɔɔ ɔdele kɛ bɛhye Gyisɛse na bɛli ye edwɛkɛ wɔ nɔsolɛ zɔhane la, ɔgyegyele ye kpalɛ. Akee mɔɔ rale nzinlii la zɛkyele edwɛkɛ ne. Amɛnlado Pɔnteɛse Paelɛte maanle Dwuu ɛzonlenlɛ nu mgbanyima ne mɔ nee menli ne tinlitinlinle ɔ nwo zo na ɔbuale Gyisɛse ewule fɔlɛ kɛ bɛhɔbɔ ye baka nu. Bie a Mɛle nwunle kɛ ɔ Menle ne anwo ɛyɛ mogya ngome na yewie debie yɛ, bɛva baka tendenle mɔɔ bɛkahu ye zo la bɛzoa ye na ɔlua awɔdenle ne azo.​—Dwɔn 19:6, 12, 15-17.

Ɛnee Mɛle Magedalene nee mraalɛ bie mɔ gyi Gyisɛse “amaneɛnwunlɛ baka ne anwo” wɔ ɛleka mɔɔ bɛbɔle ye baka nu wɔ mekɛ mɔɔ awozinli hedale azɛlɛ ne azo la. (Dwɔn 19:25) Mɛle mɔɔ ɛnee gyi ɛkɛ kɔkpula kɛ Gyisɛse wule la nwunle yɛɛ ɔdele kɛ Gyisɛse ɛlɛka ahile ɛzoanvolɛ Dwɔn mɔɔ ɔkulo ye edwɛkɛ la kɛ ɔnlea ye mame. Ɔdele kɛ Gyisɛse ɛlɛfa nyane azu ahile ye Papa. Yɛɛ ɔdele Gyisɛse edwɛkɛ mɔɔ li awieleɛ mɔɔ ɔhanle kɛ “Yewie,” kolaa na yeawu la. Ɛnee Mɛle ɛlɛdi nyane kpalɛ. Noko mɔɔ Gyisɛse wule la, ɔkɛyɛ kɛ ɛnee ɔtɛgyi ɛkɛ. Nzinlii, ɔhɔgyinlanle nla fofolɛ bie mɔɔ nrenyia sukoavolɛ bie mɔɔ bɛfɛlɛ ye Dwosefi mɔɔ vi Arelematia vale Gyisɛse funli ne dole nu la anwo.​—Dwɔn 19:30; Mateyu 27:45, 46, 57-61.

Mɛle neazo ne mɔɔ yɛnwu mɔɔ yɛbahola yɛayɛ wɔ mekɛ mɔɔ yɛ diema diedinli bie bahɔ sɔnea mɔɔ anu yɛ se anu la. Bie a yɛnrɛhola yɛnrɛzi esiane ne adenle anzɛɛ yɛnrɛhola yɛnrɛye nyane mɔɔ ngyegyelɛ ne bamaa bɛali la yɛnrɛvi ɛkɛ. Noko yɛbahola yɛala anwunvɔnezelɛ nee akɛnrasesebɛ ali. Saa yɛlɛyia ngyegyelɛ na agɔnwolɛ kpalɛ bie wɔ ɛkɛ a, ɔboa kpalɛ. Saa yɛfi nɔhalɛlilɛ nu yɛboa yɛ gɔnwo mɔɔ ɛlɛyia ngyegyelɛ la a, ɔkile kɛ yɛlɛ diedi kpole na ɔkola ɔkyekye ɔ rɛle kpalɛ.​—Mrɛlɛbulɛ 17:17.

Mɔɔ bɛvale Gyisɛse funli ne bɛdole nla ne anu la anzi, Mɛle nee mraalɛ bie mɔ vale nyile evuanlɛ rale kɛ bɛfa bɛakpokpa ye funli ne. (Maake 16:1, 2; Luku 23:54-56) Yemɔti ɔdwazole nwonlomɔ mangyee ne wɔ mekɛ mɔɔ Akpabɛnwo ne ɛpɛ nu la. Pɛ Mɛle nee mraalɛ bie mɔ mɔɔ aleɛ ɛtɛkyenle na bɛlua awɔdenle ne azo bɛlɛkɔ Gyisɛse nla ne azo la anwo nvoninli nea. Mɔɔ bɛlua adenle zo la, ɛnee bɛlɛdwenle kɛ ɔkɛyɛ na bɛahundo bolɛ ɛnlomboɛ ne bɛavi nla ne anloa la anwo. (Mateyu 28:1; Maake 16:1-3) Noko bɛanzia bɛ nzi. Bɛ diedi maanle bɛyɛle mɔɔ bɛbahola la na bɛgyakyile mɔɔ ɛha la bɛmaanle Gyihova.

Ɔbayɛ kɛ ɛnee Mɛle li menli mɔɔ ɛha la anyunlu wɔ mekɛ mɔɔ bɛdwule nla ne anwo la. Ɔgyinlanle arɛlevilɛ nu. Ɛnee bɛhundo bolɛ ne bɛvi ɛkɛ, na ɛhwee ɛnle nla ne anu! Mɛle mɔɔ dahuu ɔkulo kɛ ɔyɛ debie la nriandile hɔhanle mɔɔ yenwu ye la hilele Pita nee Dwɔn. Pɛ Mɛle anwo nvoninli wɔ mekɛ mɔɔ ɔlɛdie ɛnwomenle kpole na ɔlɛfa anyebolo yeaha kɛ: “Bɛye Awulae bɛvi nla ne anu, na yɛnze ɛleka mɔɔ bɛva ye bɛhɔdo a”! Pita nee Dwɔn nriandile hɔle nla ne azo, bɛnwunle kɛ ɛhwee ɛnle nu na bɛziale bɛhɔle bɛ azua nu. *​—Dwɔn 20:1-10.

Mɔɔ Mɛle ziale hɔle nla ne azo la, ɛnee ɔ ngomekye a ɔde ɛkɛ a. Wɔ nwonlomɔ ne anu, Gyisɛse funli ne mɔɔ bɛnnwu ye la anwo nyane maanle Mɛle ɛzunlɛ ne yɛle kpole. Ɔhanle ɔ nwo aze ɔnleanle nla ne anu, na ɛnee ɔnde ɔ bo kɛ ɔnnwu ye Awulae ne la. Mɔɔ ɔnwunle ye la zinli ɔ nwo. Ɛnee anwumabɔvolɛma nwiɔ mɔɔ bɛwulowula adɛladeɛ fufule la dede ɛkɛ! Bɛbizale ye kɛ, “Duzu ati a ɛlɛsu a?” Ɔvale anwowozolɛ ɔhanle mɔɔ yeha yehile ɛzoanvolɛ ne mɔ la bieko: “Bɛye me Awulae bɛvi ɛke, na menze ɛleka mɔɔ bɛva ye bɛhɔdo a.”​—Dwɔn 20:11-13.

Ɔhakyile ɔ nwo, na ɔnwunle kɛ nrenyia bie gyi ɔ nzi ɛkɛ. Yeannwu ahenle kpalɛ, ɔti ɛnee ye adwenle yɛ ye kɛ ahenle mɔɔ nea tola ne azo la ɔ. Nrenyia ne bizale ye bɛtɛɛ kɛ: “Raalɛ ye, duzu ati a ɛlɛsu a? Nwane a ɛkpondɛ ye a?” Mɛle buale kɛ, “Yɛmenle, saa wɔye ye wɔvi ɛke a, kile me ɛleka mɔɔ wɔva ye wɔdo la na mengɔnva ye mengɔ.” (Dwɔn 20:14, 15) Dwenle Mɛle edwɛkɛ ne anwo. Asoo raalɛ zɔhane angomekye bahola Gyisɛse Kelaese mɔɔ ɛnee ɔ nwo yɛ se na ɔgyi ye nrenyia zo la funli ne? Mɛle angyinla andwenle ninyɛne ɛhye mɔ anwo. Mɔɔ ɛnee ɔze ye la ala a le kɛ ɔwɔ kɛ ɔyɛ mɔɔ ɔbahola la.

Saa yɛlɛyia tɛnlabelɛ mɔɔ yɛ alɔbɔlɛ na ɔ bo yɛ nwo zo la a, yɛbahola yɛazukoa Mɛle Magedalene neazo ne. Saa yɛfa yɛ adwenle yɛsie yɛ ngyegyelɛ nee mɔɔ yɛngola ye yɛ la azo ala a, ɔbamaa ɛzulolɛ aha yɛ mɔɔ yɛnrɛyɛ ɛhwee a. Noko saa yɛbɔ kpɔkɛ kɛ yɛbayɛ biala mɔɔ yɛbahola la na yeagyakyi mɔɔ ɛha la yeamaa yɛ Nyamenle ne a, mɔɔ yɛbahola yɛayɛ la bazi yɛ nwo. (2 Kɔlentema 12:10; Felepaema 4:13) Mɔɔ hyia kpalɛ la, Gyihova anye balie yɛ nwo. Ɛhye a Mɛle yɛle a, na Gyihova yilale ye wɔ adenle mɔɔ yɛ nwanwane la azo.

Nrenyia ne mɔɔ ɛnee gyi Mɛle anyunlu ɛkɛ la ɛnle tola zo neavolɛ. Mekɛ bie, ɛnee ɔle kapentanli, akee ɔyɛle kilehilevolɛ yɛɛ Awulae mɔɔ Mɛle kulo ye edwɛkɛ kpalɛ la. Noko yeannwu ye, ɔti ɔhakyile ɔ nye. Mɛle adwenle amba nɔhalɛ edwɛkɛ ɛhye azo kɛ bɛdwazo Gyisɛse bɛra ngoane nu kɛ sunsum nu abɔdeɛ mɔɔ lɛ tumi. Yemɔti ɔhakyile ɔ nwo kɛ sonla noko tɛ nwonane ne mɔɔ ɔvale ɔbɔle afɔle la ɔ. Wɔ ye ewudwazo ne anzi, ɛnee ɔyɛ a menli mɔɔ ze ye kpalɛ bɔbɔ la ɛnnwu ye sonla holɛ.​—Luku 24:13-16; Dwɔn 21:4.

Kɛzi Gyisɛse yɛle maanle Mɛle nwunle ye sonla holɛ ɛ? Ɔlua edwɛkɛkpɔkɛ ko bie mɔɔ ɔhanle la azo: “Mɛle!” Ɔhakyile ɔ nye na ɔdeanle nu kɛ: “Relabonae!” Ɔle Hibulu edwɛkɛkpɔkɛ mɔɔ ɛnee ɔta ɔfa ɔdi gyima. Ye Kilehilevolɛ ne mɔɔ ɔkulo ye edwɛkɛ kpalɛ la ɔ. Ɔ nye liele kpole! Ɔzɔle ye nu dwaa na ɛnee ɔngulo kɛ ɔgyakyi ye.​—Dwɔn 20:16.

Ɛnee Gyisɛse ze mɔɔ wɔ ye adwenle nu la. Gyisɛse zele ye kɛ, “Gyakyi me.” Yɛdie yɛdi kɛ ɔyɛle ɔ nyunlu monvoo na ɔhanle ye bɛtɛɛ wɔ mekɛ mɔɔ ɔlɛdie ɔ nwo ngyikyi ngyikyi yeavi ɔ sa nu la. Na ɔdoale zo kɛ: “Metɛkɔle Selɛ ne anwo lɔ.” Ɛnee mekɛ ɛtɛdwule mɔɔ ɔwɔ kɛ ɔkɔ anwuma a. Ɛnee ɔtɛdɛ gyima ɔyɛ wɔ azɛlɛ ye azo, na ɛnee ɔkulo kɛ Mɛle boa. Ɛnee Mɛle ɛyɛ ɛnzolɛ kɛ ɔtie Gyisɛse kpalɛ. Ɔzele ye kɛ, “Kɔ me mediema ne mɔ ɛkɛ na ka kile bɛ kɛ, ‘Melɛkɔ me Ze nee bɛ Ze, me Nyamenle nee bɛ Nyamenle ne anwo lɔ.’”​—Dwɔn 20:17.

Nea gyima kokye mɔɔ ɔ Menle vale maanle ye a! Mɛle boka ɛdoavolɛma mɔɔ bɛnyianle nwolɛ adenle bɛlimoale bɛnwunle Gyisɛse mɔɔ bɛdwazo ye la anwo, na kɛkala ɔwɔ kɛ ɔmaa awie mɔ te edwɛkpa ɛhye. Nea anyelielɛ nee mɔdenlebɔlɛ mɔɔ ɔvale ɔkpondɛle ɛdoavolɛma ne la! Pɛ kɛzi ɔlɛfa anyelielɛ yeaha edwɛkɛ mɔɔ ɔ nee ɛdoavolɛ ne mɔ ɛva mekɛ dɔɔnwo ɛdwenle nwo la anwo nvoninli: “Menwu Awulae!” Ɔvale anwowozolɛ ɔhanle mɔɔ Gyisɛse ɛva ɛzoa ye la amuala ɔhilele bɛ. (Dwɔn 20:18) Ɛdoavolɛ ne mɔ diele ye ɛdeɛ ne bokale mɔɔ ɛnee bɛde ye dɛba bɛvi mraalɛ ne mɔ mɔɔ hɔle nla ne azo la anwo.​—Luku 24:1-3, 10.

Duzu a mrenyia ne mɔ yɛle a? Mɔlebɛbo ne, bɛanlie bɛanli. Yɛkenga kɛ: “Bɛbule edwɛkɛ ɛhye kɛ ɔle ngoaseasɛm na bɛanlie mraalɛ ne mɔ bɛanli.” (Luku 24:11) Bɛtetele mrenyia ɛhye mɔ wɔ ɛleka mɔɔ bɛnlie mraalɛ bɛnli la; wɔ Dwuuma amaamuo nu, ɛnee mraalɛ ɛngola ɛnli daselɛ wɔ kɔɔto. Ɔkɛyɛ kɛ ɛnee amaamuo zɔhane ɛli ɛdoavolɛ ne mɔ ati mɔɔ bɛnze a. Noko tɛ zɔhane adwenle ne a Gyisɛse nee ɔ Ze lɛ a. Nea nwolɛ kpole mɔɔ bɛmaanle raalɛ zɔhane mɔɔ ɔdi nɔhalɛ la nyianle a!

Mɛle ammaa kɛzi mrenyia ne mɔ yɛle bɛ nyɛleɛ la angyegye ye. Ɛnee ɔze kɛ ɔ Menle die ye di, na yemɔ bɔbɔ ala le kpalɛ. Bɛva edwɛkɛ bie bɛzoa Gyisɛse ɛdoavolɛma kɔsɔɔti kɛ bɛbɔ ye nolo. Baebolo ne fɛlɛ edwɛkɛ zɔhane “Nyamenle Belemgbunlililɛ ne anwo edwɛkpa.” (Luku 8:1) Gyisɛse ambɔ ye ɛdoavolɛma ɛwɔkɛ kɛ awie biala badie bɛ anzɛɛ bahile bɛ gyima ne anwo anyezɔlɛ. Bɛnrɛyɛ zɔ fee. (Dwɔn 15:20, 21) Yemɔti ɔwɔ kɛ Kilisienema kakye Mɛle Magedalene. Yeammaa ɔ mediema diedima adwenle nu keseeyɛlɛ ne ando ɔ sa nu kɛ ɔbava anyelielɛ yeaha Gyisɛse ewudwazo ne anwo edwɛkpa ne!

Nzinlii Gyisɛse yele ɔ nwo hilele ye ɛzoanvolɛ ne mɔ yɛɛ ye ɛdoavolɛma ne anu dɔɔnwo. Mekɛ bie ɔyele ɔ nwo ɔhilele ɛdoavolɛma mɔɔ bo 500 wɔ mekɛ ko anu! (1 Kɔlentema 15:3-8) Ɔda ali kɛ Mɛle diedi yɛle kpole wɔ mekɛ biala mɔɔ ɔbanwu Gyisɛse anzɛɛ ɔbade ɔ nwo edwɛkɛ la. Ɔbayɛ kɛ ɛnee Mɛle boka mraalɛ mɔɔ ɛnee bɛyia wɔ Gyɛlusalɛm wɔ Pɛntekɔso kenle ne wɔ mekɛ mɔɔ bɛwolale sunsum ne bɛguale Gyisɛse ɛdoavolɛma ne anwo zo la anwo.​—Gyima ne 1:14, 15; 2:1-4.

Kɛ ɔde ye biala la, yɛbahola yɛalie yɛali kɛ: Mɛle Magedalene zɔle ye diedi ne anu hɔle awieleɛ. Bɛmaa yɛ muala yɛbɔ kpɔkɛ kɛ yɛbayɛ zɔ! Saa yɛkile mɔɔ Gyisɛse ɛyɛ ɛmaa yɛ la anwo anyezɔlɛ, yɛbɛlɛ yɛ nwo aze yɛsonle awie mɔ na yɛfa yɛ nwo yɛto Nyamenle anwo zo a, ɛnee yɛlɛsukoa Mɛle Magedalene diedi ne.