Yilaegya dele nrɛlaleɛ ne: Belemgbunli Ehabe ɛwu. Bie a yɛbava yɛ nye yɛabu ngapezonli kpanyinli ne mɔɔ ɛlɛsosɔ ɔ kɛsa anu na ɔlɛdwenle mɔɔ hɔle zo wɔ ɔ nee Belemgbunli Ehabe atisesebɛ avinli wɔ ɛvolɛ dɔɔnwo anu anwo la. Yilaegya ɛgyinla ngyegyelɛ dɔɔnwo anloa! Belemgbunli Ehabe nee ɔ ye belemgbunli raalɛ Gyɛzɛbɛle kpondɛle Yilaegya yɛɛ bɛnwunlonwunlanle ye kɛ bɛku ye bɔbɔ. Belemgbunli ne ambɔ mɔdenle kɛ ɔsi Gyɛzɛbɛle mɔɔ ɔkulo kɛ bɛku Gyihova ngapezoma dɔɔnwo la adenle. Kɛmɔ ɛnee Ehabe nee Gyɛzɛbɛle le angomedi la ati, bɛyɛle bɛ adwenle kɛ bɛku Neebɔto, nrenyia tenlenenli bie nee ɔ mra mrenyia ne mɔ. Ɔti, Gyihova maanle Yilaegya hanle ndɛnebualɛ edwɛkɛ mɔɔ fale Ehabe ewule nee ye sua nu amra mɔɔ bɛ bo zo babɔ la anwo edwɛkɛ ɔhilele ye. Kɛkala, akee Nyamenle edwɛkɛ ne ɛlɛba nu. Ehabe wule kɛ mɔɔ Gyihova hanle la.​—1 Arl. 18:4; 21:1-26; 22:37, 38; 2 Arl. 9:26.

Noko, ɛnee Yilaegya ze kɛ ɔwɔ kɛ ɔkɔ zo ɔnyia abotane. Gyɛzɛbɛle tɛte aze, na ɔhɔle zo ɔnyianle ye abusua nee maanle ne anwo zo tumi ɛtane. Yilaegya bayia ngyegyelɛ dɔɔnwo, na ɛnee ɔwɔ kɛ ɔkile ɔ gɔnwo nee ye agyadivolɛ Yilaehya ninyɛne dɔɔnwo. Ɔti, bɛmaa yɛzuzu Yilaegya gyimalilɛ nsa mɔɔ li awieleɛ la anwo. Saa yɛnwu kɛzi ye diedi ne boale ye maanle ɔgyinlanle kpundii la a, ɔbamaa yɛanwu adenle kpalɛ mɔɔ yɛbalua zo yɛamia yɛ diedi ne anu wɔ ngyegyelɛ mekɛ ɛhye anu la.

Ehabe nee Gyɛzɛbɛle ara nrenyia Ehazaya rayɛle Yizilayɛ belemgbunli. Kɛ anzɛɛ ɔbazukoa debie yeavi ye awovolɛ subane ɛtane ne anu la, ɔlile bɛ amumuyɛ nyɛleɛ ne anzi. (1 Arl. 22:52) Ehazaya noko zonlenle Beeyale. Beeyale ɛzonlenlɛ maa bɛyɛ ninyɛndane, le kɛ ɛzonlenlɛ sua nu tuutuu ɛbɛla ɛbɔlɛ yɛɛ bɛ mra mɔɔ bɛfa bɛbɔ afɔle la. Asoo debie baha Ehazaya amaa yeahakyi ye nyɛleɛ na yeaboa ye menli ne yeamaa bɛahwe bɛ nwo bɛavi amumuyɛyɛlɛ zɛhae anwo na bɛali nɔhalɛ bɛamaa Gyihova ɔ?

Esiane dole belemgbunli ɛhye mɔɔ le kpavolɛ na ɔmemaa ɔ nwo zo la arɛlevilɛ nu. Ɔvi ye sua ne ati zo bane ne azo ɔdɔle aze na ɔbodale kpole bie. Ɛnee ye ngoane la esiane nu, noko yeamkpondɛ Gyihova moalɛ. Emomu, ɔzoanle soanvolɛma wɔ Filisitiama mɔɔ le agbɔvolɛ la suakpole Ɛkelɔn azo kɛ bɛhɔbiza bozonle Beeyalezibɛbe saa ɔbade kpɔkɛ a. Gyihova anye anlie ɔ nwo fee. Ɔzoanle anwumabɔvolɛ wɔ Yilaegya ɛkɛ na ɔzele ye kɛ ɔhɔzi zɔhane soanvolɛma ne adenle. Ngapezonli ne maanle bɛziale bɛhɔle belemgbunli ne ɛkɛ na ɔvale nrɛlaleɛ mɔɔ anloa yɛ se la ɔhɔmaanle ye. Ehazaya yɛle ɛtane kpole, ɔluakɛ ɔyɛle ye nyɛleɛ kɛ asɛɛ Yizilayɛ ɛnlɛ Nyamenle biala. Gyihova hanle kɛ Ehazaya ɛnrɛde kpɔkɛ.​—2 Arl. 1:2-4.

Ehazaya mɔɔ yeannu ɔ nwo la bizale kɛ: “Kɛ nrenya ne mɔɔ hanle ɛhye mɔ hilele bɛ la si de ɛ?” Soanvolɛma ne hanle tɛladeɛ mɔɔ ngapezonli ne wula la anwo edwɛkɛ, na ndɛndɛ ne ala Ehazaya hanle kɛ: ‘Yilaegya ɔ.’ (2 Arl. 1:7, 8) Ɔwɔ kɛ yɛyɛ ye nzonlɛ kɛ, Yilaegya tetele ninyɛne zo wɔ ye ɛbɛlabɔlɛ nu amaa yeahola yeazonle Nyamenle kpalɛ, ye anwoziezielɛ maa bɛnwu ye zɔ. Ɔda ali kɛ bɛnrɛhola bɛnrɛha ɛhye bɛnrɛvale Ehazaya anzɛɛ ye awovolɛ mɔɔ bɛ nye bolo menli ninyɛne la anwo. Yilaegya neazo ne kakye yɛ ɛnɛ kɛ yɛva Gyisɛse folɛdulɛ ne mɔɔ ɔse yɛtete ninyɛne zo wɔ yɛ ɛbɛlabɔlɛ nu yɛli gyima amaa yɛahola yɛava yɛ nye yɛazie ninyɛne mɔɔ anwo hyia kpalɛ azo la.​—Mat. 6:22-24.

Ɛnee Ehazaya kulo kɛ ɔdi nzenranlɛ, ɔti ɔzoanle sogyama 50 nee bɛ safohyenle kɛ bɛhɔhye Yilaegya. Mɔɔ bɛnwunle Yilaegya “wɔ boka bie azo” * la, safohyenle ne zele Yilaegya kɛ belemgbunli se ‘bɛrava ye bɛrɛla’​—ɔbayɛ kɛ bɛkahu ye. Dwenle nwo nea! Ɔnva nwo kɛ ɛnee sogyama zɔhane ze kɛ Yilaegya le “Nyamenle sonla” la bɛyɛle kɛ bɛnwunlonwunla ye. Nea kɛzi bɛvonle a! Yilaegya zele safohyenle ne kɛ: “Saa mele Nyamenle sonla a ɛnee senle vi anwuma ɛrayela wɔ nee wɔ ɛlɔnema abulanlu ne.” Akee Nyamenle yɛle ye zɔ! “Senle vi anwuma rayelale safohyenle ne nee ye ɛlɔnema abulanlu ne.” (2 Arl. 1:9, 10) Esiane zɔhane mɔɔ dole sogyama ne la maa yɛnwu kɛ saa menli ɛmbu Gyihova azonvolɛ anzɛɛ bɛbu bɛ nye bɛgua bɛ nwo zo a, ɔ nye ɛnlie nwolɛ fee.​—1 Ek. 16:21, 22.

Ehazaya zoanle sogyama 50 nee bɛ safohyenle bieko. Safohyenle mɔɔ tɔ zo nwiɔ la ɛzɛkye bɔbɔ ɛdɛla alimoa ɛdeɛ ne. Mɔɔ de a le kɛ, yeanzukoa debie yeanvi mrenyia 51 ne mɔɔ bɛwule mɔɔ bie a ɛnee bɛ nzonle tɛgua boka ne azo la anu. Bieko, tɛ adenle mɔɔ enililɛ ɛnle nu mɔɔ safohyenle mɔɔ limoa luale zo zele Yilaegya kɛ belemgbunli se ‘bɛrava ye bɛrɛla’ la ala a ɔzukoale a, eza ɔvale edwɛkɛ kpɔkɛ “kɛkala” ɔzɔle zo! Ngoaseade boni ɛne! Ɔti ɔ nee ɔ sa zo ne mɔ wule kɛ mɔɔ alimoa ekpunli ne wule la. Ahenle mɔɔ yɛle ngoaseade kpole la a le belemgbunli ne. Ɛhwee anga ye ahonle, ɔti eza ɔzoanle sogyama ekpunli mɔɔ tɔ zo nsa. Ɔyɛ anyelielɛ kɛ safohyenle ɛhye mɔɔ tɔ zo nsa la le nrɛlɛbɛvolɛ. Ɔbɛlɛle ɔ nwo aze ɔhɔkpale Yilaegya kyɛlɛ kɛ ɔmmamaa ɔ nee ye menli ne wu. Yilaegya mɔɔ le Nyamenle sonla la lale Gyihova anwunvɔnezelɛ ne ali wɔ mekɛ mɔɔ ɔdiele safohyenle bɛlɛvo ne la. Gyihova anwumabɔvolɛ zele Yilaegya kɛ ɔ nee sogyama ne ɛhɔ. Yilaegya diele na eza ɔhanle Gyihova ndɛnebualɛ ne ɔhilele belemgbunli amumuyɛ ne bieko. Ehazaya wule kɛ mɔɔ Nyamenle hanle la. Ɔlile tumi ɛvolɛ nwiɔ ala.​—2 Arl. 1:11-17.

Kɛzi Yilaegya holale gyinlanle menli mɔɔ le anzosesebɛ na bɛte atua la nyɛleɛ ne anloa ɛ? Kpuya zɔhane anwo hyia ɛnɛ, ɔnle zɔ ɔ? Asoo awie mɔɔ ɛdwenle ɔ nwo kpole la andie folɛ kpalɛ mɔɔ ɛdule ye la na ɔhɔle zo ɔyɛle debie mɔɔ ɛnle kpalɛ la ɔmaanle ɛlile nyane ɔ? Kɛzi yɛbahola yɛagyinla arɛlebɔlɛ zɛhae anloa ɛ? Yɛbahola yɛazukoa debie yɛavi Yilaegya mɔɔ sogyama ne nwunle ye wɔ “boka bie azo” la anu. Yɛnze debie titili mɔɔ ɔti ɛnee Yilaegya wɔ ɛkɛ la, noko yɛbalie yɛali kɛ kɛmɔ ɔkulo asɔneyɛlɛ la ati, ɔnwunle kɛ ɛleka koonwu zɔhane bamaa yeanyia adenle yeabikye ye ɛlɔlɛ Nyamenle ne. (Gye. 5:16-18) Yɛdayɛ noko, yɛbahola yɛakpondɛ mekɛ yɛ nee Nyamenle ali ngitanwo dahuu, yɛabɔ ye duma wɔ asɔneyɛlɛ nu na yɛava yɛ ngyegyelɛ nee yɛ amaneɛnwunlɛ yɛado ɔ nyunlu. Ɛhye bamaa yɛahola yɛagyinla menli mɔɔ yɛ nee bɛ de mɔɔ bɛyɛ bɛ ninyɛne basabasa na bɛ nye ɛnla ɛkɛ la nyɛleɛ ne anloa.

Akee mekɛ dwule kɛ ɔwɔ kɛ Yilaegya fa ye gyimalilɛ ne to ɛkɛ. Yɛ mɔɔ ɔyɛle la nzonlɛ. Mɔɔ ɔ nee Yilaehya ɛlɛfi sua Gelegale azo la, Yilaegya zele Yilaehya kɛ ɔhendɛ ɛkɛ na ɔ ngomekye ɔbahɔ Bɛtɛle mɔɔ bayɛ kɛyɛ kilomita 11 (ma 7) la. Yilaehya buale kɛ: “Meka tease [Gyihova] nee ɛdawɔ kɛ menrɛkpɔkye me nwo menrɛvi ɛ nwo ɛlɛ.” Mɔɔ bɛ mu nwiɔ bɛdwule Bɛtɛle la, Yilaegya zele Yilaehya kɛ ɔ ngomekye ɔbahɔ Gyɛleko, mɔɔ ɔbayɛ kɛyɛ kilomita 22 (ma 14) adenle la. Yilaehya buale ye kɛ alimoa ɛdeɛ ne la. Fane nsa ne azo mɔɔ bɛdwule Gyɛleko la, edwɛkɛ ko ne ala zile bieko kolaa na bɛahɔ Azule Dwɔdan ne anloa mɔɔ bayɛ kɛyɛ kilomita 8 (ma 5) adenle la. Eza kpavolɛ ne angakyi ye adwenle fee. Yeandwe ɔ nwo yeanvi Yilaegya anwo ɛlɛ!​—2 Arl. 2:1-6.

Ɛnee Yilaehya ɛlɛda subane mɔɔ anwo hyia la ali​—nɔhalɛ ɛlɔlɛ. Ɛlɔlɛ ɛhye a Wulutu lale ye ali hilele Nawome a, ɛlɔlɛ ne mɔɔ fa ɔ nwo beta awie anzɛɛ debie a ɔndwe ɔnzia la. (Wut. 1:15, 16) Nyamenle azonvolɛ kɔsɔɔti hyia subane zɔhane anwo ɛnɛ tɛla mekɛ biala. Asoo yɛnwu kɛzi ɛhye anwo hyia kɛ mɔɔ Yilaehya nwunle ye la ɔ?

Ɔda ali kɛ, nɔhalɛ ɛlɔlɛ mɔɔ Yilaehya lale ye ali la maanle Yilaegya anwosesebɛ. Ɔlua ɛhye ati, Yilaehya nwunle Yilaegya nwanwane debie mɔɔ li awieleɛ. Wɔ Dwɔdan Azule ne mɔɔ se ndɛndɛ na ɔle kuma la anloa Yilaegya vale ye ɛdanlɛ ne finle azule ne anu. Azule ne kpakyele nwiɔ! Ɛnee eza “Nyamenle kpɔmavolɛma asa azo ne mɔ anu abulanlu” mɔɔ ɔbayɛ kɛ bɛboka mrenyia mɔɔ bɛlɛtete bɛ amaa bɛali nɔhalɛ ɛzonlenlɛ nyunlu wɔ maanle ne anu anwo la ɛlɛnea nwanwane deɛ ɛhye. (2 Arl. 2:7, 8) Ɔbayɛ kɛ Yilaegya a ɛnee nea zɔhane ndetelɛ ngyehyɛleɛ ne azo a. Mekɛ bie, Yilaegya dele nganeɛ kɛ ɔ ngomekye a ɔdi nɔhalɛ wɔ maanle ne anu a. Ɔvi mekɛ zɔhane, Gyihova ɛyila Yilaegya abotanezilɛ ne azo yemaa yenwu kɛzi Ye azonvolɛ ɛnyia anyuhɔlɛ kpole la.​—1 Arl. 19:10.

Mɔɔ bɛpɛle Dwɔdan ne la, Yilaegya zele Yilaehya kɛ: “Biza me debie mɔɔ menyɛ memaa wɔ la kolaa na bɛarava me bɛahɔ.” Ɛnee Yilaegya ze kɛ mekɛ ɛdwu kɛ bɛbafa ye bɛkɔ. Ɔ nye ambolo nwolɛ adenle nee duma mɔɔ ɔ gɔnwo kpavolɛ ne banyia la. Emomu, ɛnee Yilaegya kulo kɛ ɔboa ye kɛ mɔɔ ɔbahola biala la. Ɛhye ala a Yilaehya bizale a: “Mebodo wɔ, maa menyia wɔ sunsum ne mɔnwo.” (2 Arl. 2:9) Tɛ sunsum nwuanzanwuanza mɔɔ Yilaegya ɛnyia la a, ɔkulo kɛ ɔnyia ye mɔnwo nwiɔ a. Emomu, ɛnee ɔlɛbiza agyadeɛ kpole anzɛɛ mɔnwo nwiɔ mɔɔ wɔ mɛla adenle zo bɛfa bɛmaa belamunli ralɛ nrenyia amaa yeahola yeali ye ɛzonlelilɛ fofolɛ kɛ abusua tile anwo gyima la. (Mɛla 21:17) Kɛ awie mɔɔ ɔbali Yilaegya agya wɔ Nyamenle ɛzonlenlɛ nu la, ɔnwunle kɛ ɔwɔ kɛ ɔnyia Yilaegya akɛnrasesebɛ sunsum ne bie amaa yeahola yeayɛ gyima ne.

Yilaegya bɛlɛle ɔ nwo aze vale edwɛkɛ ne wulale Gyihova asa. Saa Gyihova maa Yilaehya nwu Yilaegya wɔ mekɛ mɔɔ Nyamenle ɛlɛfa ngapezonli kpanyinli ne ahɔ la a ɛnee ɔkile kɛ Nyamenle bamaa Yilaehya anyia mɔɔ ɔbizale la. Yeangyɛ, mɔɔ agɔnwolɛma kpalɛ nwiɔ ne ɛlɛtendɛ na ‘bɛ gyakɛ wɔ zo’ la, azibɛnwo debie bie zile!​—2 Arl. 2:10, 11.

Kɛnlaneɛ bie vindele anwomanyunlu na ɔbikyele bɛ. Bie a yɛbahola yɛapɛ ɛnelɛ bie mɔɔ le kɛ anwoma kpole mɔɔ ɛlɛtu mɔɔ rale arɛlevilɛ nu yɛɛ debie bie mɔɔ ta mɔɔ bikyele mrenyia nwiɔ ne, na bie a mɔɔ bɛnwunle ye la maanle bɛ avinli dele la anwo nvoninli. Mɔɔ bɛnwunle ye la le ehwili, konle ehwili mɔɔ ta kɛ senle la. Ɛnee Yilaegya ze kɛ ye mekɛ ɛdwu. Ɔvole ehwili ne anu ɔ? Kɛlɛtokɛ ne anga. Ye biala anu, ɔdele nganeɛ kɛ anwoma kpole ne mɔɔ ɛlɛtu la ɛlɛmaa ye zo ahɔ anwomanyunlu!

Ɔzinle Yilaehya anwo wɔ mekɛ mɔɔ ɔlɛnea la. Kɛmɔ Yilaehya nwunle nwanwane deɛ ɛhye mɔɔ ɛnee ɛlɛsi la ati, ɔnwunle kɛ amgba Gyihova bamaa yeanyia Yilaegya akɛnrasesebɛ sunsum ne “mɔnwo.” Noko Yilaehya lile nyane kpole wɔ mekɛ mɔɔ ɔlɛdwenle nwolɛ la. Ɛnee ɔnze ɛleka mɔɔ ɔ gɔnwo kpanyinli ne ɛlɛkɔ a, noko bie a ɛnee ɔ nye ɛnla kɛ ɔbanwu Yilaegya bieko. Yilaegya deanle nu kɛ: “Egya! Egya! Yizilayɛ konle ehwili ne nee menli mɔɔ ka mgbɔnwɔ ne mɔ la, bɛmɛ ɛhye o!” Ɔnleanle ye kilehilevolɛ ne too ɔminlinle; akee Yilaehya vale nyane dele ye tɛladeɛ ne anu nwiɔ.​—2 Arl. 2:12.

Mɔɔ Yilaegya wɔ anwomanyunlu la, ɔdele kɛ ɔ gɔnwo kpavolɛ ne ɛlɛsu na ɔmaanle ɔdaye noko ɔzunle ɔ? Ye biala anu, ɛnee ɔze kɛ agɔnwolɛ zɛhae ɛboa ye ɛmaa yegyinla ngyegyelɛ bie mɔ anloa. Ɔti, ɔwɔ kɛ yɛsukoa Yilaegya neazo ne na yɛfa menli mɔɔ kulo Nyamenle na bɛkulo bɛyɛ ye ɛhulolɛdeɛ la agɔnwolɛ!

Nienwu bieko a Yilaegya hɔle a? Ɛzonlenlɛ bie mɔ kilehile kɛ bɛ nee ye hɔle anwuma wɔ Nyamenle anwo lɔ. Noko ɛhye ɛnrɛhola ɛnrɛyɛ nɔhalɛ. Ɛvolɛ dɔɔnwo anzi, Gyisɛse Kelaese hanle kɛ awie biala ɛtɛkɔle anwuma lɔ kɛ mɔɔ ɔyɛle la. (Dwɔn 3:13) Ɔti saa yɛkenga kɛ “anwoma kpole ne manle Yilaegya zo ɔ nee ye hɔle anwuma” a, ɔwɔ kɛ yɛbiza kɛ, Anwuma boni ɔ? (2 Arl. 2:11) Wɔ Baebolo ne anu, tɛ ɛleka mɔɔ Gyihova de la ala a, bɛfɛlɛ ye “anwuma” a, ɛleka mɔɔ amungu ne wɔ wɔ anwomanyunlu mɔɔ nloma ne mɔ tu duolua la noko boka nwo. (Edw. 147:8) Zɔhane anwuma ne​—anwomanyunlu a bɛvale Yilaegya bɛhɔle a. Akee boni bieko?

Gyihova maanle ye ngapezonli ne mɔɔ ɔkulo ye la gyimalilɛ fofolɛ wɔ ɛleka bie mɔɔ bikye Dwuda belemgbunlililɛ ne la. Wɔ kɛyɛ ɛvolɛ nsuu anzi, Baebolo kɛlɛtokɛ hilele kɛ ɛnee Yilaegya tɛyɛ gyima wɔ ɛkɛ. Mekɛ zɔhane, ɛnee Belemgbunli Gyɛhɔlam atisesebɛ a ɛlɛdi tumi wɔ Dwuda a. Ɔgyale Ehabe nee Gyɛzɛbɛle ara raalɛ, ɔti ɛnee bɛ subane ɛtane ne ɛlɛnyia menli nwo zo tumi. Gyihova maanle Yilaegya hɛlɛle ndɛnebualɛ edwɛkɛ hɔmaanle Gyɛhɔlam. Gyɛhɔlam ewule yɛle alɔbɔlɛ kɛ mɔɔ bɛhanle bɛdole ɛkɛ la. Mɔɔ ɛnle kpalɛ la a le kɛ, kɛlɛtokɛ ne dwulale ye kɛ: “Awie biala anli ye ewule nwo nyane.”​—2 Edwɛkɛsisilɛ 21:12-20.

Nea ngakyile mɔɔ ɛnee wɔ zɔhane amumuyɛnli ne nee Yilaegya avinli a! Yɛnze mekɛ nee kɛzi Yilaegya wule la ɛdeɛ. Noko yɛze kɛ yeanyɛ kɛ Gyɛhɔlam ɛdeɛ ne mɔɔ awie biala anli ye ewule nwo nyane la. Yilaehya anwo lɔle ɔ gɔnwo ne. Zɔhane ala a ɛnee ɔde wɔ ngapezoma nɔhavoma ɛhendeɛ ne afoa nu a. Asɛɛ ɛvolɛ 1,000 pɛle nu, noko ɛnee Gyihova bu Yilaegya kɛ ɔsonle bolɛ ɔluakɛ ɔmaanle ngapezonli zɔhane mɔɔ ɔkulo ye la vindele wɔ ɛhakyilɛ deɛnwunlɛ ne anu. (Mateyu 17:1-9) Ɛkulo kɛ ɛsukoa Yilaegya amaa wɔanyia diedi mɔɔ kola gyinla ngyegyelɛ nloa la ɔ? Mmamaa ɛ rɛle fi kɛ ɛbava menli mɔɔ kulo Nyamenle la agɔnwolɛ, amaa wɔahola wɔava wɔ adwenle wɔazie Gyihova ɛzonlenlɛ zo na wɔavi wɔ ahonle nu wɔayɛ asɔne dahuu. Ɔrɛla ye kɛ ɛdawɔ noko Gyihova bahulo wɔ na wɔala ye ahonle nwo dahuu!