Bɛwole me wɔ San Juan Chancalaito, sua ekyi bie mɔɔ wɔ Chiapas, Mexico la azo. Me awovolɛ le Cholma, menli ekpunli bie mɔɔ bɛ bo vi Maya la. Me awovolɛ wole ngakula 12, na ɛnee metɔ zo nnu. Mele kakula la, Gyihova Alasevolɛ nee yɛ zukoale Baebolo ne. Ɔyɛ alɔbɔlɛ kɛ meanva Baebolo ne anu folɛdulɛ meambɔ me ɛbɛla wɔ me ngakula nu la.

 Menlile ɛvolɛ 13 la, membɔle ɔ bo kɛ meno nyile ɛtane na menyɛle awule. Zɔhane mekɛ ne mendɔle gua zo na menluoluale nu. Menyianle ɛvolɛ 16 la, ɛnee meyɛ gyima wɔ wee ɛya bie anu. Menyɛle gyima wɔ ɛkɛ ne too asɛɛ ɛvolɛ ko. Kenle ko nɔsolɛ bie mɔɔ ɛnee yɛlɛfa wee dɔɔnwo bie yɛapɛ azule la, menli bie mɔɔ bɛdabɛ noko bɛyɛ wee nwo gyima la vale adu nee yɛ rahonle. Mendɔle azule ne anu na menweɛle mengɔle file zo. Nzinlii ye menriandile mengɔle United States.

 Mengɔle zo mendɔnenle nyile ɛtane wɔ United States, ɛhye vale me hɔle ngyegyelɛ dɔɔnwo anu. Menyianle ɛvolɛ 19 la, bɛhyele me bɛdole efiade ɔluakɛ menwuale debie yɛɛ anrɛɛ meku awie. Membokale eku bie anwo wɔ efiade ɛkɛ ne na menvale me nwo menwulale basabasayɛlɛ nu. Ɛhye maanle mgbanyima ne mɔ vale me hɔdole efiade gyɛne mɔɔ ɛkɛ ne banebɔlɛ nu yɛ se la wɔ Lewisburg, Pennsylvania.

 Mendwule Lewisburg efiade ɛkɛ ne la, akee me subane zɛkyele bɔkɔɔ. Kɛmɔ ɛnee eku ne tattoo wɔ me nwo la ati, yeanyɛ se kɛ mebaboka eku zɔhane anwo wɔ efiade ɛkɛ ne. Akee menyɛle ninyɛne mgbane mgbane na konle ala a ɛnee meko a. Kenle ko bie konle dɔle me eku ne nee eku gyɛne avinli. Yɛvale baseball baka nee mbulalɛ mɔɔ yɛfa yɛyɛ exercise la yɛhonle kpalɛ. Amaa menli mɔɔ nea efiade ɛkɛ ne akpɔda konle ne la bɛdole tear gas. Nzinlii, mgbanyima mɔɔ nea efiade ɛkɛ ne la vale me hɔdole ɛleka mɔɔ pilizama mɔɔ yɛ amumuyɛ wɔ la. Ɛnee melɛ ahonle kpole kpalɛ yɛɛ membu debie. Ɛnee me aleɛ mɔɔ medi meda la a le konle. Nɔhalɛ nu, ɛnee me nye die nwo. Ɛnee menli me nyɛleɛ ne anwo nyane.

 Mɔɔ bɛvale me bɛhɔle ɛleka ɛhye la, ɛnee ɔta ɔka me ngome. Ɔti membɔle ɔ bo kɛ mekenga Baebolo ne amaa mekɛ ne ahɔ ndɛ wɔ me nye zo. Nzinlii, raalɛ bie mɔɔ nea efiade ɛkɛ ne la maanle me You Can Live Forever in Paradise on Earth buluku ne. a Buluku ɛhye mɔɔ bɛfa bɛsukoa Baebolo ne mɔɔ mengengale la maanle mengakyele ninyɛne dɔɔnwo mɔɔ Gyihova Alasevolɛ nee me zukoale wɔ me ngakula nu la. Yemɔ anzi, mendwenledwenlenle kɛzi me subane ɛtane nee ninyɛne mgbane mgbane mɔɔ meyɛ la ɛmaa me nwo ɛyɛ alɔbɔlɛ la anwo. Eza mendwenlenle me abusua ne anwo. Kɛmɔ ɛnee me mediema mraalɛ nwiɔ ɛrayɛ Gyihova Alasevolɛ la ati, ɔrale me ti anu kɛ, ‘Bɛbadɛnla aze dahuu.’ Akee membizale me nwo kɛ, ‘Duzu ati a menrɛhola a?’ Mekɛ zɔhane a menzile kpɔkɛ kɛ mebayɛ nzenzaleɛ a.

 Noko akee, ɛnee meze ye kɛ mehyia moalɛ amaa meahakyi. Ɔti, menlimoale menzɛlɛle Gyihova Nyamenle kɛ ɔboa me. Akee, mengɛlɛle Gyihova Alasevolɛ ɔfese ne mɔɔ wɔ United States la na menganle kɛ bɛ nee me ɛrazukoa Baebolo ne. Ɔfese ne yɛle ngyehyɛleɛ maanle asafo mɔɔ bikye me la rakpondɛle me. Mekɛ zɔhane, ɛnee bɛmmaa awie biala mɔɔ ɛnle me busuanli la ɛmmakpɔla me. Ɔti, Dasevolɛ bie hɛlɛle me kɛlata na ɔvale Baebolo mbuluku ɔnwoanle me, ɛhye maanle kpɔkɛ mɔɔ membɔle kɛ mekakyi la anu yɛle se.

 Mendule agyakɛ mɔɔ anwo hyia la wɔ mekɛ mɔɔ menzile kpɔkɛ kɛ mefi eku ne mɔɔ me nee bɛ ɛdu wɔ ɛvolɛ dɔɔnwo anu la. Ɛnee yɛ kpanyinli ne noko wɔ ɛleka mɔɔ mewɔ la, ɔti mengɔle ye ɛkɛ wɔ mekɛ mɔɔ ɛnee yɛlɛdielie yɛ nye la na menganle mengilele ye kɛ mekulo kɛ meyɛ Gyihova Dasevolɛ. Mɔɔ ɔhanle la zinle me nwo, ɔse: “Saa ɔle wɔ anyebolo edwɛkɛ ɛdeɛ a, ɛnee yɛ ye zɔ. Menrɛhola menrɛzi Nyamenle adenle. Noko saa ɛkulo kɛ ɛfi ɛku ne anu ala ɛdeɛ a, ɛnee ɛze mɔɔ bado wɔ la.”

 Ye ɛvolɛ nwiɔ anzi menli mɔɔ yɛ gyima wɔ efiade ɛkɛ ne la nwunle kɛ me subane ɛlɛkakyi. Ɛhye maanle bɛnyianle me nwo abotane. Kɛ neazo la, ɛnee saa bɛ nee me ɛlɛkɔ amaa meahɔbia a, bɛnva handcuff bɛngua me sa bieko. Nrenyia bie mɔɔ nea ɛkɛ ne la maanle me anwosesebɛ kɛ memmagyakyi nzenzaleɛ mɔɔ melɛyɛ la. Nɔhalɛ nu, ɔka ekyii na bɛaye me la mgbanyima ne mɔ vale me hɔle efiade bie mɔɔ ɔbikye ɛleka mɔɔ mewɔ la, na ɛnee ɛkɛ ne banebɔlɛ ne anu ɛnyɛ se. Menlale efiade ɛvolɛ bulu la, bɛyele me na bɛvale pilizama kale bɛvale me bɛhɔle Mexico wɔ 2004.

 Mengɔle Mexico la, yeangyɛ yɛɛ menwunle Gyihova Alasevolɛ Belemgbunlililɛ Asolo a. Mengɔle me debiezukoalɛ mɔɔ limoa la wɔ mekɛ mɔɔ ɛnee mewula me efiade tɛladeɛ la​​—ɛnee yemɔ ala a le me tɛladeɛ mɔɔ le kpalɛ a. Alasevolɛ ne mɔ liele me kɛnlɛma ɔnva nwo kɛ ɛnee me anwoziezielɛ ɛnle kpalɛ la. Mekɛ mɔɔ menwunle bɛ atiakunlukɛnlɛma ne la mendele nganeɛ kɛ meboka nɔhalɛ Kilisienema anwo. (Dwɔn 13:35) Wɔ ayia zɔhane abo mgbanyima ne mɔ yɛle ngyehyɛleɛ mɔɔ bamaa me nee awie azukoa Baebolo ne la. Ye ɛvolɛ ko anzi bɛzɔnenle me kɛ Gyihova Dasevolɛ wɔ September 3, 2005.

 Membɔle dahuu ɛzonlenlɛ gyima ne abo wɔ January 2007, siane ko biala mefa dɔnehwele 70 mekilehile awie mɔ Baebolo ne. Menwiele Mediema Mrenyia Mɔɔ Bɛtɛgyale Baebolo Sukulu (mɔɔ ɛnɛ bɛfɛlɛ ye Belemgbunlililɛ Edwɛkpakavolɛma Sukulu) ne la wɔ 2011. Sukulu ɛhye ɛboa me ɛmaa meli me ɛzonlelilɛ mɔɔ melɛ wɔ asafo ne anu la anwo gyima.

 Mengyale me ye Pilar wɔ ɛvolɛ 2013. Ɔyɛ ɔfa ɔbɔ ngoayɛ kɛ ɔyɛ se ɔmaa ye kɛ ɔbalie me ɛbɛlabɔlɛ nu edwɛkɛ mɔɔ meka mekile ye la yeali. Megyakyi me ɛbɛlabɔlɛ dɛba ne bɔkɔɔ. Me nee me ye yɛdie yɛdi kɛ kɛzi mede ye kɛkala la le daselɛ mɔɔ kile kɛ Baebolo ne kakyi sonla.​—Wulomuma 12:2.

 Mete nganeɛ kɛ Gyisɛse edwɛkɛ mɔɔ wɔ Luku 19:10 la fale me nwo. Ɔhanle wɔ ɛkɛ ne kɛ: “Membale kɛ mebakpondɛ bɛdabɛ mɔɔ bɛminli la na mealie bɛ ngoane.” Mende nganeɛ bieko kɛ meminli. Yɛ menluolua nu mengyegye awie mɔ bieko. Baebolo ne ɛboa me ɛmaa menyia asetɛnla mɔɔ gyi bodane zo, me nee menli de anzodwolɛ nu yɛɛ mɔɔ tɛla biala la me nee Gyihova me bɔvolɛ ne ɛnyia agɔnwolɛvalɛ kpalɛ.