Bɛwole me bɛdole Kateleke asɔne ne anu wɔ Rochester, New York. Me awovolɛ tetele agyalɛ nu wɔ mekɛ mɔɔ ɛnee meli ɛvolɛ mɔtwɛ la. Ɔti ɛnee me nee me mame tɛnla sua mɔɔ ehyiavolɛma a tɛnla nu la anu wɔ dapɛne ne anu na me nee me papa ahɔdɛnla azukoavolɛ sua nu wɔ dapɛne awieleɛ. Mɔɔ menwunle kɛzi me mame ɛlɛfɛ anlea ngakula nsia la, mendwenlenle nwolɛ kɛ ɔwɔ kɛ meyɛ sukoavolɛ amaa meaboa me abusua ne.

 Ɛnee me papa kulo kɛ medi boɛ wɔ ɛbɛlabɔlɛ nu, ɔti ɔyɛle ngyehyɛleɛ ɔmaanle mengɔneɛnleanle sukulu bie mɔɔ ɛlie duma mɔɔ bɛkile kɛzi bɛnea hotɛle zo la anu. Me nye liele nwo na mengɔle bie, na ɛnee medwenle kɛ Nyamenle ɛlɛbua asɔne mɔɔ menyɛle kɛ mekulo kɛ meyɛ sukoavolɛ na me nye die la. Menvale ɛvolɛ nnu menzukoale kɛzi bɛnea hotɛle zo, gyima nwo mɛla yɛɛ kɛzi bɛnea ezukoa zo la, noko wɔ mekɛ zɔhane amuala, ɛnee melɛyɛ gyima wɔ hotɛle bie mɔɔ bɛto kyakya wɔ nu la anu wɔ Las Vegas, Nevada.

 Menyianle ɛvolɛ 22 la, ɛnee bɛmaa meboa kpanyinli ne mɔɔ nea hotɛle ne mɔɔ bɛto kyakya wɔ ɛkɛ ne azo la. Ɛnee bɛbu me kɛ menyia me nwo ɔluakɛ fane dɔɔnwo ne ala ɛnee medi aleɛ kpalɛ yɛɛ meno nza mɔɔ ye bolɛ yɛ se la. Ɛnee me gɔnwo mɔ gyimayɛvoma ka kɛ, “Kakye kɛ ezukoa a le debie mɔɔ nwolɛ hyia kpalɛ wɔ ewiade ye a.” Ɛnee bɛdwenle kɛ ezukoa a fa nɔhalɛ anyelielɛ ba a.

 Ɛnee me gyima a le kɛ mebanlea meamaa azukoavolɛ mɔɔ bato kyakya wɔ Las Vegas la asa aha mɔɔ bɛhyia nwo la. Ɛnee bɛlɛ ezukoa ɛdeɛ noko ɛnee ɔzɔho kɛ bɛ nye ɛnlie. Medame noko me anyelielɛ minlinle. Nɔhalɛ nu, ɛnee melɛnyia ezukoa ɛdeɛ, noko adwenleadwenle dɔle me nwo yɛɛ ɛnee mengola da. Akee mendwenlenle nwo kɛ meku me nwo. Me sa nu dole wɔ ɛbɛlabɔlɛ nu na membizale Nyamenle wɔ asɔneyɛlɛ nu kɛ, “Nienwu a mebahola meanyia nɔhalɛ anyelielɛ a?”

 Zɔhane mekɛ ne, ɛnee me mediema mraalɛ nwiɔ mɔɔ bɛrayɛ Gyihova Alasevolɛ la ɛra Las Vegas. Ɔwɔ nuhua kɛ meanlie bɛ mbuluku ne mɔ ɛdeɛ, noko menliele mendole nu kɛ me nee bɛ bagenga medame mumua ne me Baebolo ne. Ɛnee bɛhɛlɛ Gyisɛse edwɛkɛ ne mɔ kɔkɔlɛ wɔ me Baebolo ne anu. Kɛmɔ ɛnee medie edwɛkɛ biala mɔɔ Gyisɛse hanle la meto nu la ati, me mediema mraalɛ ne mɔ hanle Gyisɛse anwo edwɛkɛ titili hilele me. Medame mumua ne noko mengengale Baebolo ne.

 Ninyɛne dɔɔnwo mɔɔ mengengale la zinle me nwo. Kɛ neazo la, Gyisɛse hanle kɛ: “Wɔ bɛ nzɛlɛlɛ nu, bɛmmaka edwɛkɛ ko ne ala fane dɔɔnwo kɛ mɔɔ menli mɔɔ sonle awozonle yɛ ye la. Ɔluakɛ bɛmɛ, bɛdwenle kɛ saa bɛka edwɛkɛ dɔɔnwo a yɛɛ Nyamenle kɛdie bɛ a.” (Mateyu 6:7, The New American Bible) Noko, ɛsɔfo bie vale Gyisɛse nvoninli maanle me na ɔhanle kɛ saa meka Yɛ Ze Mɔɔ Wɔ Anwuma fane bulu na meka Ahye O Mɛle (Hail Marys) fane bulu mekile nvoninli ne a, Nyamenle bava ezukoa dodo biala mɔɔ mehyia la amaa me. Noko saa meyɛ asɔne ɛhye mɔ dahuu a, ɛnee ɔngile kɛ melɛka edwɛkɛ ko ne ala fane dɔɔnwo ɔ? Eza mengengale Gyisɛse edwɛkɛ mɔɔ se: “Bɛmmafɛlɛ awie biala bɛ ze wɔ azɛlɛ ye azo, ɔluakɛ bɛ Ze kokye, na yemɔ ala a wɔ anwuma lɔ la.” (Mateyu 23:9, NAB) Na mendwenlenle nwo kɛ, ‘Duzu ati a me nee me gɔnwo mɔ Katelekema fɛlɛ yɛ ɛsɔfo ne mɔ “Father” ɛ?’

 Mɔɔ mengengale Gyemise buluku ne wɔ Baebolo ne anu la, membɔle ɔ bo mendwenlenle mɔɔ melɛfa me ɛbɛlabɔlɛ meayɛ la anwo kpalɛ. Gyemise hɛlɛle ye wɔ tile 4 ne kɛ: “Bɛnze kɛ saa bɛ nee ewiade tila agɔnwolɛ a ɛnee bɛyɛ Nyamenle agbɔvolɛ ɔ? Sonla mɔɔ fa ewiade ye agɔnwolɛ la kile kɛ ɔle Nyamenle kpɔvolɛ.” (Gyemise 4:4, NAB) Ngyɛnu 17 ne bɔbɔ a hanle me kpalɛ a: “Sonla ne mɔɔ ze debie kpalɛ mɔɔ ɔwɔ kɛ ɔyɛ na yeanyɛ la, ɔle ɛtane ɔmaa ye.” Akee menvɛlɛle me mediema mraalɛ ne mɔ na menganle mengilele bɛ kɛ megyakyi hotɛle gyima ne, ɔluakɛ menwu ye kɛ ninyɛne mɔɔ ɛnle kpalɛ le kɛ kyakya ɛdolɛ nee anyebolo nyɛleɛ a kɔ zo wɔ ɛkɛ a.

 Ɛnee mekulo kɛ agɔnwolɛvalɛ mɔɔ me nee Nyamenle, me awovolɛ yɛɛ me mediema ne mɔ lɛ la yɛ kpalɛ. Ɔti, membɔle kpɔkɛ kɛ mebamaa me ɛbɛlabɔlɛ ayɛ sikalɛ amaa meahola meayɛ ɛhye. Noko ɛnee ɔnla aze kɛ mebayɛ nzenzaleɛ ne. Kɛ neazo la, menyianle nwolɛ adenle mɔɔ zɔle me nleanle la, bɛhanle kɛ mendoa me hotɛle gyima ne azo na bɛbabɔ me ahatualɛ ne anwo fane nwiɔ anzɛɛ nsa. Noko mɔɔ menyɛle nwolɛ asɔne menwiele la, menzile kpɔkɛ kɛ menrɛdoa zo. Mengyakyile gyima ne na memkpondɛle ɛleka ekyi wɔ me mame azɛlɛ zo membɔle gyima fofolɛ bo. Ɛnee mefa wolɔba mefɔle mbuluku mɔɔ menli mɔɔ yɛ gyima wɔ restaurant kɛlɛ bɛ aleɛ ne mɔ aluma wɔ nu la anwo.

 Baebolo ne boale me maanle menzile kpɔkɛ kpalɛ ɛdeɛ, noko ɛnee mengɔ Gyihova Alasevolɛ ayia ne mɔ. Me mediema mraalɛ ne mɔ bizale me debie mɔɔ mengulo ye wɔ Alasevolɛ ne mɔ anwo la, na membuale bɛ kɛ: “Ɔluakɛ bɛ Nyamenle Gyihova ne tete mbusua nu. Mekɛ mɔɔ menyia me nee abusua ne bɔ nu la a le Bolonyia nee awolɛkenle ɛlilɛ mekɛ, noko bɛmɛ bɛnli ɛvoyia ɛhye mɔ.” Me mediema mraalɛ ne mɔ anu ko bɔle ɔ bo kɛ ɔsu na ɔbizale me kɛ: “Kenle mɔɔ ɛha wɔ ɛvolɛ ne anu ɛdeɛ, ɛnrɛrakpɔla yɛ ɔ? Yɛ nye balie nwo kɛ ɛbarakpɔla yɛ mekɛ biala mɔɔ ɛkulo la. Noko wɔmɔ, ɛvoyia ɛhye mɔ anu ala a ɛkulo kɛ ɛbakpɔla yɛ a​—ɔluakɛ ɛte nganeɛ kɛ ɔle wɔ gyima kɛ ɔwɔ kɛ ɛba la ati.” Ye edwɛkɛ ne hanle me ahonle kpalɛ na me nee ye zunle.

 Mɔɔ mendele ɔ bo kɛ Gyihova Alasevolɛ ne mɔ kulo bɛ mbusua kpalɛ na me adwenle ɛdeɛ ne ɛndenrɛ la, membɔle kpɔkɛ kɛ mebahɔ bɛ ayia ne mɔ ko wɔ Belemgbunlililɛ Asalo mɔɔ bikye me la. Wɔ ɛkɛ ne, menyiale Kevin mɔɔ ɛnee ze Baebolo ne anu kilehile kpalɛ la, na ɔ nee me bɔle Baebolo ɛzukoalɛ bo.

 Kevin nee ɔ ye maanle bɛ ɛbɛlabɔlɛ yɛle sikalɛ amaa bɛanyia mekɛ bɛaboa awie mɔ bɛamaa bɛade Baebolo ne abo. Bɛzieziele ezukoa amaa bɛahola bɛaboa Alasevolɛ ne mɔ ɔfese ɛsisilɛ wɔ Africa nee Central America. Ɛnee bɛ nye die kpalɛ na eza bɛkulo bɛ nwo. Mendwenlenle nwo kɛ, ‘Ɛbɛlabɔlɛ zɛhae a mekpondɛ a.’

 Kevin vale kɛzi Edwɛkpatɛlɛvolɛ gyima ne yɛ anyelielɛ la anwo vidio hilele me na menzile kpɔkɛ kɛ mebayɛ bie. Wɔ siane nsia anzi mɔɔ ɛnee mezukoa Baebolo ne kpalɛ la, bɛzɔnenle me kɛ Gyihova Dasevolɛ wɔ 1995. Kɛ anrɛɛ mebazɛlɛ Nyamenle kɛ ɔmaa menyia me nwo la, membɔle ɔ bo menyɛle asɔne kɛ: “Mmamaa medi ehyia anzɛɛ menyia me nwo.”​—Mrɛlɛbulɛ 30:8.

 Kɛkala, mele sukoavolɛ kpalɛ​—tɛ nwonane nu, emomu sunsum nu. Menyiale me kulovolɛ Nuria wɔ Honduras, yɛbɔle nu yɛzonlenle kɛ edwɛkpatɛlɛvolɛma wɔ Panama na kɛkala yɛlɛsonle wɔ Mexico. Nea kɛzi edwɛkɛ ɛhye mɔɔ wɔ Baebolo ne anu mɔɔ se: “Gyihova nyilalɛ a maa sonla nyia ɔ nwo a, na Ɔnva nyanelilɛ biala ɔmboka nwo” la le nɔhalɛ a!​—Mrɛlɛbulɛ 10:22.