Gyihova Dasevolɛ bie mɔɔ bɛfɛlɛ ye Marta mɔɔ wɔ Guatemala la ɛlɛsukoa Kekchi aneɛ ne amaa yeaha Baebolo ne anu edwɛkɛ yeahile menli mɔɔ ka zɔhane aneɛ ne la. Kenle ko bie ɔnwunle kɛ nrenyia bie vi asopiti bie anu ɛlɛkɔ. Mɔɔ Marta nwunle ye la, ɔzuzule kɛ bie a ɔvi Kekchi namule bie mɔɔ wɔ awoka zo mɔɔ Gyihova Alasevolɛ ɛnda ɛngɔga edwɛkɛ ne wɔ ɛkɛ la anu. Ɔhɔle ɔ nwo ɛkɛ na ɔhanle Kekchi ekyi mɔɔ ɔte la ɔhilele ye.

Marta bizale nrenyia ne saa ɔkulo kɛ ɔsukoa Baebolo ne a. Ɔvale anyelielɛ ɔliele ɔdole nu, noko ɔhanle kɛ ɔnlɛ ezukoa mɔɔ ɔbava yeadua a. Marta hanle hilele ye kɛ Gyihova Alasevolɛ nee menli sukoa Baebolo ne mɔɔ bɛnlie ezukoa biala a. Eza Marta hanle hilele ye kɛ ɔ nee ye bazukoa Baebolo ne wɔ fonu ne azo yɛɛ ye abusua ne amuala bahola azukoa bie. Nrenyia ne liele dole nu. Kɛmɔ nrenyia ne te Spanish na ɔkola ɔkenga la ati, Marta vale Spanish Ngɛlɛlera Nwuanzanwuanza​—Ewiade Fofolɛ Ngilebɛbo Baebolo ne bie maanle ye. Eza ɔvale Duzu A Baebolo Ne Kilehile Amgba A? buluku ne bie wɔ Kekchi aneɛ nu ɔmaanle ye. Ye dapɛne bieko, nrenyia ne, ɔ ye nee ɔ mra nwiɔ bɔle ɔ bo kɛ bɛ nee Marta sukoa Baebolo ne wɔ fonu zo. Ɔ nee bɛ zukoale Baebolo ne fane nwiɔ dapɛne biala. Marta ka kɛ: “Kɛmɔ ɛnee mengola menga Kekchi aneɛ ne kpalɛ la ati, ɛnee yɛsukoa ye wɔ Spanish nu na nrenyia ne ahilehile mɔɔ yɛkaha la anu ahile ɔ ye. Ɛnee ngakula ne mɔ te Spanish.”

Ɛnee nrenyia ɛhye le ɛsɔfo. Ɔbɔle ɔ bo kɛ ɔfa mɔɔ ɔlɛsukoa yeavi Baebolo ne anu la yeahilehile ye asɔnema ne. Asɔnema ne anye liele mɔɔ bɛdele la anwo na bɛbizale ye ɛleka mɔɔ ɔzukoale ninyɛne fofolɛ ɛhye mɔ ɔvile la. Mɔɔ ɔhanle ye Baebolo ɛzukoalɛ ne anwo edwɛkɛ ɔhilele bɛ la, bɛbɔle ɔ bo bɛrale ngoko ngoko bɛrazukoale bie. Yeangyɛ, menli kɛyɛ 15 yiale nu dapɛne biala kɛ bɛ nee Marta sukoa Baebolo ne wɔ fonu zo. Nzinlii bɛvale maekulofonu bɛdole fonu ne anwo amaa awie biala ade mɔɔ ɔlɛka la.

Mɔɔ Marta hanle Baebolo ɛzukoalɛ ɛhye anwo edwɛkɛ hilele ye asafo nu mgbanyima ne la, bɛ nuhua ko hɔle namule ne mɔɔ sukoavoma ne wɔ la azo. Ɔhanle ɔhilele bɛ kɛ bɛradie bagua nu ɛdendɛlɛ bie mɔɔ maangyebakyi zo neavolɛ * ne bamaa wɔ namule bie azo la. Ɛnee ɔwɔ kɛ bɛfa kale bɛpɛ adenle dɔnehwele ko na eza bɛtia dɔnehwele nwiɔ kolaa na bɛadwu namule zɔhane azo. Sukoavoma ne liele dole nu na bɛ nuhua 17 hɔle.

Dapɛne ekyi pɛle nu la, maangyebakyi zo neavolɛ ne nee Alasevolɛ gyɛne hɔlile kenle nna wɔ sukoavoma ne anwo ɛkɛ. Nwonlomɔ biala bɛnea Kekchi vidio ne mɔ mɔɔ wɔ jw.org azo la bie na bɛsukoa Nwane Mɔ A Ɛlɛyɛ Gyihova Ɛhulolɛdeɛ Ɛnɛ A? brohyua ne. Ɔdwu ewiazo a, bɛnea JW Broadcasting gyimalilɛ ne mɔ foa bie. Eza maangyebakyi zo neavolɛ ne maanle sukoavo biala nyianle awie mɔɔ ɔ nee ye bazukoa Baebolo ne la.

Wɔ kenle nna ne anu amuala, eza Alasevolɛ ne mɔ hanle edwɛkɛ ne wɔ Kekchi namunamu mɔɔ bikye ɛkɛ ne la anu na bɛvɛlɛle menli kɛ bɛrɛla debiezukoalɛ titili bie abo. Wɔ debiezukoalɛ zɔhane abo, mediema ne mɔ hanle hilele menli 47 ne mɔɔ rale la kɛ bɛ nuhua ko biala ɛmaa bɛ nee ye ɛzukoa Baebolo ne. Mbusua 11 liele dole nu kɛ bɛbazukoa.

Siane ekyi pɛle nu la, asafo nu mgbanyima ne mɔ yɛle ngyehyɛleɛ amaa bɛayɛ debiezukoalɛ wɔ namule zɔhane azo dapɛne awieleɛ biala. Kɛkala, menli kɛyɛ 40 kɔ debiezukoalɛ dahuu. Na mekɛ mɔɔ mediema ne mɔ yɛle Gyisɛse ewule Ngakyelɛlilɛ ne wɔ ɛkɛ ne la, bɛ nye liele kɛ menli 91 rale bie la.

Saa Marta kakye kɛzi edwɛkɛ ɛhye bɔle ɔ bo nee mɔɔ ɛvi nu ɛra la a, ɔka kɛ: “Me nye sɔ mɔɔ Gyihova ɛyɛ la. Ɔdwu mekɛ ne bie a mete nganeɛ kɛ menrɛhola menrɛyɛ dɔɔnwo. Noko Nyamenle bahola ava yɛ ali gyima aboa awie mɔ. Ɔdaye a ɛnee ɔze mɔɔ wɔ menli mɔɔ de namule zɔhane azo la ahonle nu a, na ɔhwenle bɛ ɔrabokale ye menli ne anwo. Gyihova kulo bɛ.”