Ɔka ekyii Irma, mɔɔ wɔ Germany la nyia ɛvolɛ 90. Ɔyiale esiane mgbole nwiɔ yɛɛ bɛyɛle ye apelehyɛne fane dɔɔnwo, yemɔti ɛnee akee ɔngola ɔnli daselɛ wɔ azua nu bieko kɛ dɛba ne la. Irma dua ngɛlata ɛhɛlɛlɛ zo ka ye diedi ne anwo edwɛkɛ kile ye mbusuafoɔ nee agɔnwolɛma. Anwosesebɛmaanlɛ ngɛlata mɔɔ Irma kɛlɛ maa awie mɔ la ka bɛ ahonle kpalɛ, ɔti ɔyɛ a bɛta bɛfɛlɛ ye bɛbiza ye kenle mɔɔ bɛ sa baha fofolɛ la. Eza menli dɔɔnwo kɛlɛ ye kɛlata bɛfa bɛda ye ase, na bɛka bɛkile ye kɛ ɔhɛlɛ bɛ bieko. Irma ka kɛ: “Ɛhye mɔ amuala maa me nye die na me nwo yɛ se wɔ sunsum nu.”

Irma eza kɛlɛ ngɛlata kɔmaa menli mɔɔ bɛwɔ ɛleka mɔɔ bɛnea wuliravolɛma la. Ɔka kɛ: “Raalɛ kpanyinli bie vɛlɛle me na ɔhanle ɔhilele me kɛ me ngɛlata ne mɔ kyekyele ɔ rɛle kpole wɔ mekɛ mɔɔ ɔ hu wule la. Yeva ngɛlata ne mɔ yevea ye Baebolo ne anu, na ɔta ɔkenga ye nɔsolɛ nu. Raalɛ gyɛne noko mɔɔ ɔ hu wule ɛtɛkyɛle la hanle kɛ, me ngɛlata ne mɔ boa ye kpalɛ tɛla ye ɛsɔfo ne ngilehilelɛ ne mɔ. Ɛnee kpuya dɔɔnwo kye ye adwenle mɔɔ ɔkulo kɛ ɔnyia nwolɛ mualɛ a, ɔti ɔbizale me saa ɔbahola yearakpɔla me a.”

Irma agɔnwo bie mɔɔ ɔnle Dasevolɛ mɔɔ ɔdule ɔhɔdɛnlanle moa ekyi la zele ye kɛ anrɛɛ ɔhɛlɛ ye. Irma ka kɛ: “Raalɛ ne vale me ngɛlata ne mɔ amuala ziele, mɔɔ ɔwule la, ɔ ra raalɛ bie vɛlɛle me na ɔhanle ɔhilele me kɛ yegenga ngɛlata mɔɔ mengɛlɛle ye mame la amuala na ɔbizale me saa mebahola meavi me ɛhulolɛ nu meahɛlɛ ye zɔhane ngɛlata ne mɔɔ gyi Baebolo ne azo la bie a.”

Irma anye die ye ɛzonlenlɛ gyima ne anwo kpalɛ. Ɔka kɛ: “Mesɛlɛ Gyihova dahuu kɛ ɔboa me ɔmaa mengɔ zo menzonle ye. Ɔnva nwo kɛ mengola menyɛ azua nu daselɛlilɛ bieko la, meyɛ mɔɔ mebahola la.”