Ɛnee Artur mɔɔ le maangyebakyi zo neavolɛ wɔ Armenia la ɛhɔ Gyihova Alasevolɛ asafo bie ɛkpɔlalɛ. Ɔnwunle kɛ ɛnee asafo ne ɛnyɛ bagua nu daselɛlilɛ, mɔɔ le daselɛlilɛ ne mɔɔ bɛfa Baebolo mbuluku bɛgua ehwili zo bɛyɛ la bie. Kɛmɔ ɛnee bɛkpondɛ kɛ bɛmaa asafo ne anwosesebɛ bɛmaa bɛyɛ daselɛlilɛ ɛhye bie la ati, Artur nee ɔ ye Anna nee Dasevolɛ gyɛne mɔɔ bɛfɛlɛ ye Jirayr la vale ehwili mɔɔ mbuluku wɔ zo la hɔziele sua ekyi bie azo. Bɛvale bɛziele ɛleka mɔɔ menli dɔɔnwo ta se ɛkɛ ne la.

Yeangyɛ, menli mɔɔ ɛlɛpɛ nu wɔ ɛkɛ ne la hilele nwolɛ anyelielɛ na bɛvale mbuluku. Noko nzinlii, dwazotiama adwenle hɔle adenle fofolɛ ɛhye mɔɔ bɛlɛfa zo bɛali daselɛ la azo. Ɛsɔfoma nwiɔ rale ehwili ne anwo, na bɛ nuhua ko vale ɔ gyakɛ bɔle ehwili ne dole ye aze mɔɔ yeambɔ bɛ kɔkɔ biala a. Akee ɔpɛle Artur anye zo ɔmaanle ye ɛhwɛleɛ ne dɔle aze. Artur, Anna yɛɛ Jirayr bɔle mɔdenle kɛ bɛmaa ɛsɔfo ne mɔ ɛya ne aha aze noko yeanyɛ boɛ. Ɛsɔfo ne mɔ tietiale ehwili ne azo na bɛmaanle mbuluku ne mɔ zandele. Bɛbɔle Alasevolɛ ne mɔ aholoba na bɛnwunlonwunlanle bɛ na bɛvile ɛkɛ ne bɛhɔle.

Artur, Anna yɛɛ Jirayr hɔbɔle sua ne azo kpolisima amaneɛ. Bɛhilehilele mɔɔ zile la anu bɛhilele kpolisima ne na bɛhanle Baebolo ne anu edwɛkɛ ekyi bɛhilele bɛ nee gyimayɛvoma gyɛne mɔɔ wɔ ɛkɛ ne la. Akee bɛvale Alasevolɛ nsa ne bɛhɔle kpolisi kpanyinli ne ɔfese. Alimoa ne, ɛnee ɔkpondɛ kɛ bɛka edwɛkɛ mɔɔ zile la amuala bɛkile ye. Noko mɔɔ ɔnwunle kɛ Artur mɔɔ le tendenle belane la nee ɛsɔfo ne ango wɔ mekɛ mɔɔ ɔpɛle ɔ nye zo la, yeambiza mɔɔ zile la anwo kpuya bieko, emomu ɔbɔle ɔ bo kɛ ɔbiza mɔɔ Alasevolɛ ne mɔ die di la anwo edwɛkɛ. Ɛhye maanle bɛlile adwelie too dɔnehwele nna! Kpolisi kpanyinli ne anye liele mɔɔ ɔdele la anwo na ɔhanle kɛ: “Ɛzonlenlɛ boni ɛne! Mebara bie!”

Aleɛ hyenle na Artur bɔle bagua nu daselɛlilɛ bo la, nrenyia bie mɔɔ nwunle mɔɔ zile la rale ɔ nwo ɛkɛ. Nrenyia ne hanvole Artur kɛ ɔziele ɔ nwo dii na yeanyɛ ye bie la. Ɔhanle ɔzɔle zo kɛ, ɔlua mɔɔ ɔnwunle ye la ati ɔnlɛ ɛbulɛ ɔmmaa ɛsɔfo ne mɔ bieko.

Ye nɔsolɛ nu, kpolisi kpanyinli ne vɛlɛle Artur maanle ɔrale bɛ ɛkɛ ne bieko. Noko yeanga edwɛkɛ ne mɔɔ zile la anwo ɛhwee, emomu ɔbizale Baebolo ne anu kpuya dɔɔnwo. Kpolisima nwiɔ noko rabokale adwelielilɛ ne anwo.

Aleɛ hyenle la Artur ziale hɔle kpolisi kpanyinli ne ɛkɛ kɛ ɔkaye yɛ vidio ne mɔ mɔɔ gyi Baebolo ne azo la bie yeahile ye. Kpolisi kpanyinli ne vɛlɛle kpolisima gyɛne kɛ bɛranlea vidio ne bie.

Ɛsɔfo ne mɔ subane ɛtane ne ati, kpolisima dɔɔnwo dele edwɛkɛ ne wɔ mekɛ mɔɔ limoa la. Ɛhye maanle bɛ nye liele Gyihova Alasevolɛ ne mɔ anwo kpalɛ.