Kyɛkyɛ, ɔnle zɔ fee. Emomu, saa yɛnwu kɛ diedi bie mɔɔ yɛlɛ la nee Baebolo ne anu edwɛkɛ bie ɛnyia a, yɛkakyi yɛ diedi ne.

 Kolaa na yɛabɔ ɔ bo kɛ yɛyɛ Ngɛlɛlera Nwuanzanwuanza Ewiade Fofolɛ Ngilebɛbo ne wɔ 1950 la, yɛyɛle neɛnleanu wɔ Baebolo ne anu. Yɛgyinlanle Baebolo mɔɔ ɛnee ɔwɔ ɛkɛ ne zɔhane mekɛ ne la azo a yɛhyehyɛle yɛ diedi ne mɔ a. Suzu neazo ekyi mɔɔ fale mɔɔ Gyihova Alasevolɛ ɛlie ɛli ɔvi mekɛ tendenle la anwo na ɛdawɔ mumua ne nea saa ɔ nee mɔɔ Baebolo ne ka la le ko a.

1.   Mɔɔ yɛdie yɛdi: Nyamenle ɛnle Nsa Ko. July 1882 Zion’s Watch Tower ne hanle kɛ: “Yɛ kengavolɛma ze kɛ yɛdie Gyihova, Gyisɛse nee Sunsum nwuanzanwuanza ne yɛdi, noko yɛnlie Nyamenle ko mɔɔ wɔ nu menli nsa anzɛɛ nsa ko ngilehilelɛ ne yɛndo nu ɔluakɛ ɔnvi Baebolo ne anu.”

     Mɔɔ Baebolo ne ka la: “[Gyihova] yɛ Nyamenle ne le [Gyihova] kokye.” (Mɛla ne 6:4, Nzema Baebolo) “Yɛmɛ yɛze Nyamenle kokye ne ala, yemɔ a le Selɛ ne mɔɔ bɔle ninyɛne kɔsɔɔti na yɛde aze yɛmaa ye la; yɛɛ Awulae ko, Gyisɛse Kelaese, mɔɔ ɔlua ɔ nwo zo a bɛbɔle ninyɛne kɔsɔɔti na ɔlua ɔ nwo zo yɛde aze la.” (1 Kɔlentema 8:6, Nzema Baebolo) Gyisɛse mumua ne hanle kɛ: ‘Selɛ ne le kpole tɛla me.’​—Dwɔn 14:28, Nzema Baebolo.

2.   Mɔɔ yɛdie yɛdi: Bɛngile ɛtanevolɛma nyane dahuu wɔ hɛɛle senle nu. June 1882 Zion’s Watch Tower ne kpale edwɛkɛtile “Ɛtane Ahatualɛ A Le Ewule” vile Wulomuma 6:23 ne wɔ King James Baebolo ne anu na ɔhanle kɛ: “Nea kɛzi edwɛkɛ sikalɛ ɛhye anu la ɛkɛ a. Ɔyɛ nwanwane kɛ menli dɔɔnwo mɔɔ bɛka kɛ bɛdie Baebolo ne bɛto nu kɛ Nyamenle Edwɛkɛ la kilehile debie mɔɔ le ngakyile ɔfi ɛhye anwo la. Bɛsi zo kɛ bɛdie bɛdi yɛɛ Baebolo ne kilehile kɛ ɛtane ahatualɛ a le dahuu nyanenwunlɛ wɔ hɛɛle senle nu.”

     Mɔɔ Baebolo ne ka la: “Awie biala mɔɔ kɛyɛ ɛtane la, bawu.” (Yizikeɛle 18:4, 20 Nzema Baebolo) Tɛ anzohwenlɛ mɔɔ menli mɔɔ dwazo tia Nyamenle la banyia ye la a le dahuu nyanenwunlɛ wɔ senle nu emomu ‘bɛbazɛkye bɛ’ bɔkɔɔ.”​​—2 Tɛsalonaekama 1:9, Nzema Baebolo.

3.   Mɔɔ yɛdie yɛdi: Nyamenle Belemgbunlililɛ ne le arane mɔɔ wɔ ɛkɛ ne amgba, ɔnle debie mɔɔ wɔ yɛ ahonle nu. December 1881 Zion’s Watch Tower ne hanle ye wɔ Nyamenle Belemgbunlililɛ ne anwo kɛ: “Kolaa na bɛava Belemgbunlililɛ ne bɛazie ɛkɛ ne la, bɛbaye ewiade arelemgbunlililɛ kɔsɔɔti bɛavi ɛkɛ.”

     Mɔɔ Baebolo ne ka la: “Mekɛ mɔɔ maanle maanle ɛhye mɔ wɔ zolɛ la Nyamenle bamaa maanle ko avinde, na ɔbahomo maanle zɔhane mɔ anwo zo yeamaa bɛagolo. Maanle ɛhye badɛnla ɛkɛ ne dahuu, awie ɛnrɛhola ɛnrɛzɛkye ye kenle bie maanle nu, yɛɛ awie mɔ gyɛne ɛnrɛhola ɛnrɛlie maanle ne ɛnrɛbu.”​—“Daneɛle 2:44, Nzema Baebolo.

 Kyɛkyɛ, yɛfa Baebolo ngilebɛbo ngakyile yɛdi gyima wɔ yɛ daselɛlilɛ gyima ne anu. Ɔwɔ nu kɛ yɛmaa menli mɔɔ kulo kɛ sukoa Baebolo ne la Ewiade Fofolɛ Ngilebɛbo ne bie mɔɔ bɛndua ɛhwee ɛdeɛ, noko yɛfa anyelielɛ yɛ nee menli mɔɔ bɛkulo kɛ bɛfa bɛdabɛ mumua ne bɛ Baebolo bɛdi gyima la sukoa.