Gyihova Alasevolɛ ɛnva bɛ nwo ɛnwulowula maanyɛlɛ nu ɔlua mɔɔ Baebolo ne ka la ati. Yɛndendɛ yɛntia mɛla, yɛndo ɛ ra yɛmmaa maanyɛlɛ eku anzɛɛ maanyɛlɛma, yɛmkpondɛ dibilɛ wɔ arane nu yɛɛ yɛnde atua yɛntia arane. Yɛdie yɛdi kɛ Baebolo ne fa deɛmɔti yɛyɛ ɛhye la anwo ngilehilenu maa.

•   Yɛdi Gyisɛse mɔɔ kpole maanyɛlɛ nu dibilɛ la neazo nzi. (Dwɔn 6:15) Ɔhilehilele ye ɛdoavolɛma ne kɛ “bɛnle ewiade ne afoa” na ɔmaanle nuhua lale ɛkɛ ne kɛ ɔnle kɛ bɛgyinla afoa biala wɔ maanyɛlɛ edwɛkɛ nu.​—Dwɔn 17:14, 16; 18:36; Maake 12:13-17.

•   Yɛdi nɔhalɛ yɛmaa Nyamenle Belemgbunlililɛ ne. Gyisɛse hanle nwolɛ edwɛkɛ kɛ: “Bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala.” (Mateyu 24:14) Kɛ menli mɔɔ gyi Nyamenle Belemgbunlililɛ ne agyakɛ anu la bɛmaa yɛ gyima kɛ yɛbɔ ye ɛralɛ ne anwo nolo, yɛngyinla afoa biala wɔ maanyɛlɛ nu, bɔbɔ wɔ ɛleka mɔɔ yɛwɔ la.​—2 Kɔlentema 5:20; Ɛfɛsɛsema 6:20.

•   Kɛmɔ yɛngyi afoa bie la ati, yɛkola yɛka edwɛkpa ne mɔɔ fale Nyamenle Belemgbunlililɛ ne anwo la yɛkile menli kɔsɔɔti mɔɔ debie ɛnzi yɛ adenle a. Yɛbɔ mɔdenle kɛ yɛbalua yɛ edwɛkɛhanlɛ nee yɛ nyɛleɛ zo yɛahile kɛ yɛlɛ anwodozo kɛ Nyamenle Belemgbunlililɛ ne a bali ewiade ngyegyelɛ nwo gyima a.​—Edwɛndolɛ 56:11.

•   Kɛmɔ yɛmmaa maanyɛlɛ ɛmkpakyekpakye yɛ nu la ati, koyɛlɛ wɔ yɛ nu wɔ ewiade amuala. (Kɔlɔsaema 3:14; 1 Pita 2:17) Mɔɔ nee ɛhye ɛnle ko la, ɛzonlenlɛ mɔɔ fa bɛ nwo wula maanyɛlɛ nu la maa mgbakyemgbakyenu ba menli mɔɔ wɔ nu la avinli.​—1 Kɔlentema 1:10.

 Yɛbu maanle mgbanyima. Yɛnva yɛ nwo yɛnwula maanyɛlɛ nu ɛdeɛ noko yɛbu tumi mɔɔ maanle mgbanyima lɛ la. Ɛhye nee mɛla mɔɔ wɔ Baebolo ne anu la le ko: “Bɛmaa awie biala ɛbɛlɛ ɔ nwo aze ɛmaa tumivolɛma ne.” (Wulomuma 13:1) Yɛdi mɛla zo, yɛtua yɛ adwule, na yɛboa mɔdenle mɔɔ arane bɔ kɛ ɔfa ye maanlema ngyianlɛdeɛ yeamaa bɛ la. Yɛnyɛ debie biala yɛnva yɛndu arane bie, emomu yɛdi Baebolo folɛdulɛ mɔɔ se bɛyɛ asɔne bɛmaa “arelemgbunli nee tumivolɛma amuala” la azo, titili wɔ mekɛ mɔɔ bɛlɛsi kpɔkɛ bie mɔɔ baha nwolɛ adenle mɔɔ yɛlɛ yɛsonle la.​—1 Timote 2:1, 2.

 Eza yɛdie yɛto nu kɛ awie mɔ lɛ nwolɛ adenle si kpɔkɛ kɛ bɛbava bɛ nwo bɛawula maanyɛlɛ nu. Kɛ neazo la, yɛnzɛkye ɛradolɛ yɛɛ yɛngyegye menli mɔɔ si kpɔkɛ kɛ bɛbado ɛ ra la.

 Asoo kenle nsa ye ala a yɛse yɛngyi afoa biala a? Kyɛkyɛ. Ɛzoanvolɛma nee alimoa Kilisienema bie mɔ zile kpɔkɛ kɛ bɛnrɛgyinla afoa biala. Beyond Good Intentions buluku ne ka kɛ: “Ɛnee alimoa Kilisienema ze ye kɛ ɔwɔ kɛ bɛdi maanle mgbanyima eni ɛdeɛ noko bɛanva bɛ nwo bɛanwunlonwunla maanyɛlɛ nu.” Zɔhane ala a, On the Road to Civilization buluku ne ka kɛ alimoa Kilisienema “kpole maanyɛlɛ nu dibilɛ biala” a.

 Asoo afoa biala mɔɔ yɛngyinla la fa ngyegyelɛ ba maanle bie banebɔlɛ zo ɔ? Kyɛkyɛ. Yɛle menli mɔɔ kulo anzodwolɛ, ɔti ɔwɔ kɛ maanle mgbanyima ka bɛ ahonle to bɛ azule nu. Suzu amaneɛ mɔɔ National Academy of Sciences of Ukraine bɔle wɔ 2001 la anwo. Amaneɛbɔlɛ ne hanle yɛ afoa biala mɔɔ yɛngyinla la anwo edwɛkɛ kɛ: “Ɛnɛ bie a menli bie mɔ anye ɛnrɛlie kpɔkɛ mɔɔ Gyihova Alasevolɛ ɛzi la anwo; ɛhye ati a Nazi nee Communist tumililɛ ne buale bɛ fɔlɛ tete ne la a.” Noko Alasevolɛ ne mɔ “hɔle zo lile mɛla zo bɔbɔ wɔ mekɛ mɔɔ Soviet arane ne hilele bɛ nyane la. Bɛvile bɛ ahonle nu bɛyɛle gyima wɔ ɛya ngakyile nee kɔmpɛlɛ nu na bɛangyegye Communist arane ne.” Amaneɛbɔlɛ ne dwula ye kɛ, ɛnɛ noko, Gyihova Alasevolɛ diedi ne, “ɛngyegye banebɔlɛ wɔ maanle biala anu.”